Sri Lanka: Ayubowan

Nachemne churzwilige Stop in Bangkok (inkl. Sunnecreme choufe) simer fasch um Mitternacht in Sri Lanka glandet. Dr Flug isch überne Stunde (!) länger gangä us plant da z Flugi schins nid überem offnige Gwässer zuegla isch 🤯
Üse Gastgeber, womer es Zimmer ir Nöchi vom Flughafä buechet hei, isch so lieb gsi u het knappi einehaubstund uf üs gwartet. Lang ischs de när o nid gange bis mr beidi töif gschlafe hei.

Am nächste Morgä heter üs früschi Frücht und Toast uftischt u drna het üs si Kolleg a Busbahnhof in Negombo gfahre. Dert simer i Bus nach Kandy igstiege u hei gwartet bis dr Chauffeur Lust het gha loszfahrä. Mit offnigä Türä und luter Musik simer losgfahrä u na-dis-na si Lüt igstiege. Fasziniert wie d Lüt usm no fahrende Bus i- oder o usstiege. Wär ke Platz het git eim wo hockt sini Täschä ufä Schoss. Mitm Fahrtwind wo dür die offnigä Fenster inechunnt bruchts definitiv ke Klima und vieli Vrchäufer stiege immer wieder i zum jensti feini Sache z vrchoufä.

Mit vouer Blasä simer 4 Stund später in Kandy acho und si mitemne Tuktuk zu üsere Ungrkunft gfahrä. Es härzigs Ehepaar het üs mitemne Fruchtsaft (Frücht usm eigete Garte) i Empfang gno. Si hei üs vrzeut das uf Grund vom viele Räge d Züg momentan usfaue.
Hungrig simer de dr Hügu abe id Stadt spaziert und hei üs ufm Weg zum zNacht bim Bahnhof no informiert. Wägä dr schlechte Wetterprognose wird am tagdruf dr Zug nume bis Nuwara Eliya fahrä (und nid bis uf Ella).

Zum zNacht heimer mega feini „Dosa“ gässä. Ig Massala Dosa und d Laura Massala Cheese Onion Dosa (nid überraschend). Ds isch e mega dünne Teigflade, eher so Crepes ähnlich, wo gfüllt mit Härdöpfu u viune Gwürz serviert wird. Drzue gits chlini Töpfli zum dünkle mit Dhal u witere feine Sachä. Obwohl si üs, mir si öbe di einzige „wisse Westler“ gsi, Bsteck hei härä da hei o mir ds wie aui angere vo Hand gässä. Ds Gricht het mi so fest a letzt Ufenthalt in Sri Lanka mitm Keve erinneret und im Spezielle ds Gricht hani scho fasch vrgässä gha.
Am Schluss wischt mä d Händ bim Bründli zmitzt im Restaurant und tröchnetse mitemne meh bessere Notizpapier ab :)

Da gad ganz ir Nöchi dr „Sri Dalada Maligawa“ Tämpu gsi isch und üs d Gastfamilie gseit het dases am Abe e Zeremonie git, heimer no churz wöue ga vor härä sta. Us churz isch chli länger wordä, ä Guide het üs agsprochä und am Schluss simer e Haubstund mit ihm dür dä Tämpu gloffe u er het üs viu über die buddhistische Ritual vrzeut.
Nach däm mr üsi Schue de wieder gschnüerret gha hei simer de definitiv müed is Tuktuk gstiege u hei üs la zrügg id Unterkunft fahrä.

Am nächste Morgä hets bereits am 7ni es srilankesischs zMorgä gä: mir hei leider nid vrstande wie die Flädä heisse aber drzue hets früschi Frücht u wässrigä Kaffi gä. Meh aus satt heimer üs vrabschidet und si a Bahnhof. Dert hets gheisse dr Zug fahrt iz glich bis Ella aber mir hei üses Ticket glich nume bis Nuwara Eliya kouft. Während däm d Laura d Rucksäck bewacht het und fürne guete Sitzplatz igstande isch, bini no churz uf d Post und ha när no feini Samosas für ungrwegs kouft. Pünktlech isch dr Zug, bereits recht vou, in Kandy igfahrä und mir si los zum nächste Ort.Read more