Colombo: Ayuwoban Yannick, Ayuwoban SriL

Die knapp zwöistündigi Zugfahrt, entlang ar Küste mit unzählige schöne Postkartesujets mit Paume und em Meer, het üs Zyt gä d Ireiseformalitäte für d Maledive uszfüue. I dere Zyt het sich dr Yännu sis Shrimp-Samosa vom Vrchäufer ergatteret. Nachm gfühlt 100. mau hornä vom Zug, mir si gad im 1. Wage hinger dr Loki ghocket, simer in Colombo igfahre. Es het bereits afa idunklä und da vieli Fürabe hei gha hets nume so gwimmlet vo Lüt. Nach churzem vrhandlä übere Pris mitemne Tuktuk-Fahrer heimer de üs mit üsne 3 Rucksäck hinger inä quetscht. Es het es churzes aschiebe brucht bis dr Motor isch agsprungä, drna heter üs aber gekonnt düre Vrkehr zu üsm Resti bracht.
Wüus leider üses letzte zNacht in Sri Lanka z Dritt isch gsi heimer üs bereits zum Vorus eis usegsuecht und si ire Hotelalag glandet. Nachdäm mr üses Gepäck hei dörfe Zwüschelagere simer de dür die riesigi Lobby, liecht underdressed, is südindische Restaurant gloffe.
Nachemne Drink und es paar Häppli heimer de üs d Büch no einisch so richtig vougschlagä. D Laura und dr Yännu hei sich es Curry gönnt. Beidi hei nid dra denkt z erwähne dases nid so scharf sött si und hei dementsprechend glittä :) I ha mir no einisch Dosa gönnt (wie bereits am 1. Abä in Kandy). Z‘ Esse isch mega fein gsi und mir si meh us satt dert usegloffä. Ir Lobby heimer de üsi gmeinsame zwöi Wuche bimene Drink (Espresso-Martini & Mojito) la Revue passiere und nomau e Partie ghärdöpfelet. Mir heis sehr gnossä nach 2.5 Monet z zwöit ungrwegs Bsuech vomene guete Fründ uf üsere Reis z becho!
När hets de gheisse Abschied z nä (lang wirds nid ga bismernä wieder gseh). Nach däm üs dr Concierge üsi Rucksäck het usegwägelet simer vo ungrschidleche Fahrer abgholt wordä. Dr Yännu isch no zwöi Nächt in Colombo blibä und het wöue luege was die aute Koloniauherre fürne Golfplatz in Colombo boue hei. D Laura und ig si de direkt uf Negombo gfahre. Dert heimer no einisch e Nacht i dere Unterkunft buechet, womer bereits nachm Lande in Sri Lanka gschlafe hei. Bereits uf dr Fahrt derthärä simer beidi ignuckt und im Zimmer heimer nid viu Zyt vrlore, am nächste Morgä het dr Wecker nämlech bereits am haubi 5i glütte. No ziemli vrschlafe heimer churz drufabä am Flughafä icheckt und üs zum Abschluss vo dere Reis uf es paar Täg i de Maledive gfreut!Read more