Marco Polo

Joined June 2016
  • Day81

    Uf em Weeg in tüüfe Amazonas

    December 4 in Ecuador ⋅ ☀️ 22 °C

    Nachem Zmörgele und emene guete Kaffi, hani mich uf de Weeg richtig Amazonas gmacht. Mit em Taxi zum Busbahnhof und dede hani den zerschd mal dörfe de richtig Schalter sueche, da in Ecuador isches nämlich so, das jedi Busgsellschaft en eigene Schalter hett und vo dene gits uhh viel, vorallem in Quito. Nach chli umefröge, hanen den au gfunde, Billet kauft und den los zu de Platform wo de Bus fahrt. Dede hani gwarted und gwarted, dass isch s erschde mal in Ecuador wo de Bus verspöhted isch. Janu ich ha ja Ziit.
    Bis mer mal us Quito use isch, bruchts sicher ei Stund und den sind no sechs Sunde Fahrt vohr mir glege. Zerschd durd Berge mit wenig Wald und irgendwen den mit immer meh, bis ich im Jungel gsi bi. D Strasse sind au nöd für all, es hett alles über Asphalt, Chiis, sehr schmali Brüggli, Steili Abhäng und teils Stelle wo mer gseht das en Erdrutsch abe isch.
    Wos den dunkel worde isch, hett mer bi faschd allne Hüsli am Strasserand so blinkendi Wienachtsbelüchtig gseh, irgendwie komisch so im Jungel.
    Ich has den doch no zum Hostel gschaft und gnüsse de Firabig a de Poolbar.
    Read more

  • Explore, what other travelers do in:
  • Day79

    Museo Itiñan

    December 2 in Ecuador ⋅ 🌧 20 °C

    Bim erste Fotti gsehnd er wie de einti Stamm d Lüüt begrabe het, mit persöndliche Sache, au mit de Frau zemme, allso dere hends den ihrgend so e gifftigi Suppe geh, wo sie den ihschlaft und stirbt, so das sie in Jehnseits wieder chönnd zemmelebe, wie romantisch. Au i de Fötusstellig und eigendlich i dene Tohntöpf, will sie ad wiedergeburt im Jehnseits glaubt hend. De Tohntopf sötti de Buch vo de Mueter dahrstelle.

    Im zweite und dritte Bild sind die verschidene Totempähl und Monument vo de Stämm.

    Im vierte Bild gsehnd er i de Mitti rechts en Chopf ufere Speerspitze. De Stamm hett d Chöpf, also nur Huut und Haare vo Gegner oder ahgsehne Persone vom Stamm uf Fustgrössi gschrumpft.
    D Gegner als Trofähe und bi de ahgsehne Lüütlis hends drah glaubt, dass sie so d Weisheit und unterstützig bechömmed. Jetzt machets das aber nümme, oder dörfed nümme.

    Die letschde zwei Bilder sind vomene Stamm us de Ande.

    S Museum isch mer chli vohrcho wie de chlii Brüeder vom Balleberg.
    Read more

  • Day79

    Mitad del Mundo

    December 2 in Ecuador ⋅ ⛅ 23 °C

    Hütt bini uf de Strich, also uf de Äquator😋
    Isch no sehr schöhn und tourimässig gmacht das Museum. Die wod Füerig gmacht hett, isch mega motiviert gsi und hett no über die verschidene Stämm vo Uhrihwonner verzellt. Aber dadezue meh im nögschde Footprint.

  • Day77

    Rumiñahui

    November 30 in Ecuador ⋅ ⛅ 11 °C

    Letschde Tag im Secredgarden und no ein Berg wos z bezwinge git. Also am Morge los zum Fuess fom Rumiñahui und den gmüetlich mal 800 Höhemeter uelaufe uf 4600 m.ü.m.
    Nei Scherz, so gmüedlich und eifach isches den scho nöd gsi, wer ja au langwielig. Wobi die ersti Stund eigendlich no gmüedlich gsi isch, schöhni Landschafd und immer es bizeli duruf. Aber den isches los gange, mir jend de Gipfel zwar gseh, aber s isch uhh steil gsi und es hed so es blöds Sandfeld gha, vool nöd cool. Nach dem mer das überwunde hend, hemmer als abschluss nö chli dörfe über Felse bis zum Gipfel chlettere. Dede hemmer weg em Nebel zwar nüt gseh, aber zum glück isch en Italiener bi eus i de Gruppe gsi, wo e Bialetti debi gha het. Hett no Style uf 4600 m.ü.m en Espresso z trinke.
    Nach em Zmittag ded obe, isches ufere andere Route ca. 2 Sund wieder richtig abe gange. Unterwegs hemmer no s glück gha und zwei Kondor gseh.
    Wieder zrugg im Hostel isches für mich den grad wiitergange nach Quito. Da ich so müed gsi bi vom wandere und will ich jetzt vier Täg im Masseschlag gsi bi, bini den au so ziemlich schnell mal go pfuse. Guet Nacht.
    Read more

  • Day75

    5100 m.ü.m

    November 28 in Ecuador ⋅ ⛅ 9 °C

    Nach dene paar Wanderige als vohrbereitig und zum mich ad Höchi gwönne, isches hütt endlich richtig Cotopaxi gange, zwar nöd bis ufe, aber imerhin bis zum Endi vom Gletscher uf 5100 m.ü.m ue. Am Morge simmer mit em Büsli zerschd zumene Mountainbikeverleih und den zum Parkplatz bim Cotopaxi ue, de isch uf öbbe uf 4600 m.ü.m, vo ded us isches den zum Refugio José Ribas uf 4864 m.ü.m gange. Nachere churze Wc-pause simmer den no zum Endi vom Gletscher gwandered. Das isch no recht guet gange, da ich en supper Rithmus gfunde ha zum laufe, s einzig schwierige isch de Wind gsi. Es hett uh mega feschd gwinded und eus faschd wegblase. Vom Parkplatz us simmer den mit de Mountainbikes ca. 40 min abegfahre, dune ahcho bini duregschüttled gsi, aber s het uuh mega spass gmacht.

    De Namitag isch den wieder gmüetlich gsi, deführ isch nach em Znacht um so meh los gsi und s isch au chli spöter worde.
    Read more

  • Day74

    Wanderig zum Pasochoa

    November 27 in Ecuador ⋅ ⛅ 13 °C

    Nachem Zmorge simmer ca. Z 10te los zum ca. 800 Höhemeter vom Hostel bis zum Gipfel vom alte Vulkan Pasochoa z wandere. Nätürlich sind no zwei Hünd vom Hostel mitcho d Yoda und Hayku. Zerschd simmer über en alte Inkapfad dur de Nebelwald, bis ca uf 3800 m.ü.m.. Nachere churze Pause isches wiiter durs Busch und Grasland richtig Gipfel. Die letschde 200 Höhemeter sind den no recht ahstrengend gsi, wills recht steil gsi isch und mer zum teil nochli hend müesse chlettere. Es hett sich aber wieder mal glohnt, da mer bis uf Quito gseh hend. Nacheme Teeli und eme Sandwich isches den zrugg abe is Hostel gange. Nacheme rechte Zmittag hett den s Jacusi mit Blick uf de Cotopaxi uf eus gwarted.Read more

Never miss updates of Marco Polo with our app:

FindPenguins for iOS FindPenguins for Android