Tag 8: Bem 2te Ahlauf hets klappet🤿

Hüt am Morge sih mer richtig ufgregt gsih nachem verwache. Mer hei hüt nomol en Versuech gstartet mit em Schnorchle. Als ersts hets aber natürlich weder es feins Zmorge gä. Am Yannic sis het super guet usgseh. Ich ha nüt chöne ässe weli so ufgregt gsih be 😅.
Am 9ni sih mer denne mit eusem Grab (Uber) ah Sanur Harbour abe düüset. Död ahcho hei mer mol gluegt wie mer jetzt uf Nusa Penida öbere chöme.
Das het sich de zimmlech schnäll klärt gha und churz drufabe sih mer scho im Schnellboot ghöcklet.
D Fahrt het ca. 40 Minute duret. Z Nusa Penida ahcho hei mer eusem Guide, am Alit, gschribe, dass mer bereits ahcho sih und ob mer eventuell sogar früecher cheu starte. Das het alles eso tiptop klappet und churz drufabe sih mer scho im Boot richtig Manta Bay ghöcklet. Död ahcho hei mer eusne Auge chum chöne glaube, öber 20 Mantas sih död dürs Wasser gschwäbt und mer eifach zmitst drin.😍
De 2ti Stopp isch denne ir Crystal Bay gsih. Död hets wunderschöni Koralleriff, Fischli und sogsr Schildchrötli gha 🐢.
De 3ti Stopp isch ir Gamat Bay gsih. Ih dere Bucht hei mer de Fischli dörfe Fuetter gä 🐠.
De letzti Stopp isch denne no de Wall Point gsih. Das isch es Koralleriff wo rächt Steil anere Wand isch und död hets au wunderschöni Fischli.
Es isch es unglaublichs Erläbnis gsih. Im erste Momänt hani echli schiss gha. Aber woni mih uf die wunderschöne Tierli und Koralle ha afo fokussiere isch die Angst wie wägblose gsih.

Nachem Schnorchle hets denne no es Zmittag gä und mer sih nochli dur Nusa Penida gschländeret, bis euses Boot zrug uf Bali isch. Btw.: das isch dih schlimmsti Bootsfahrt vo mim Läbe gsih 🙈🫠. Ich ha mehrfach gmeint mer geu jetzt under. Es isch stickig heiss gsih und es het alles nach Benzin gstunke 🙈. Be so froh gsih wo mer weder Land unter de Füess gha hei 😅.

Zrug im Hotel hei mer festgstellt, dass mer beidi en komplette Sonnebrand hei 🦀. Und wöu mer so k.O. vom Schnorchle gsih sih, hei mer eus churzerhand defür entschide mit em Roomservice s Znacht is Zimmer z bstelle. De Yannic het uf englisch am Telefon Esse bstellt 😊.

Jetzt geu mer de go Pfüüsele mit ganz viune tolle Erinnerige im Chopf.✨Baca lagi