検索条件をリセット
Jacqueline
  • Jacqueline Krauer
  • Jacqueline Krauer

Jacqueline

Jacquelineによる26日間のアドベンチャー もっと詳しく
フォローする概要概要カレンダーカレンダー写真写真共有共有バケットリスト
概要カレンダー写真
  • 旅行の開始
    2024年10月23日
    Jacqueline KrauerJacqueline旅行者
    1112

    1. Tag

    2024年10月24日, 南アフリカ ⋅ ☀️ 18 °C

    Am 23. Oktober simmer zu euisere Reis gstartet. Gepäck ufgeh und jetzt bitte en Aperol. Das de Zöllner hat das Undernehme bremsed und mis Gepäck kontrollliert! Die wo mich kenned, wüssed wie ich packe hasse. Ha natürli alles mit Akku is Handgepäck ta....das ghört sich ja. Es het det ine no e Zahpaschta, es Schrubezierli (für Batteriewechsel vo de Stirnlampe) und e zämäklappbari Zange mit vill Zuebehör gah! Ach du Schande....Zahpaschta ghört zu Flüssigkeit...die han ich aber derfe bhalte. Bi de Zange isch s'Messerli grad no duregange, aber de chlii Schrubezieher het de doch glatt konfisziert! Ja nu....im Landi hetts no meh! De Aperol isch aber leider nümm drin glägä.
    Mitere Stund verspätig simmer denn gstartet und mitere halbe Stund verspätig nacheme ruhige Flug in Kapstadt glandet. Joanne und ich sind denn mit em Cady übere zu de Autovemietig gfahre worde! Sauglatt gsi.
    Denn hämmer euises Auto becho. En coole Ford Pick Up... Leider isch de Kofferruum nid ufgange und jetzt hämmer, nachemene Upgrade en Hundai Van. Da mir de aber nid bruuched für d'Wildnis isch das ok.
    Endlich hämmer chöne losfahre und sind a de Küschte lang uf de Kelders cho. S'Hüüsli wo mer hend, chan mer nid als bescheide hineh...uuuuu mega schön mit Sicht grad ufs Meer. Und en Wal hemmer au scho gseh! :-)
    Jetzt mached mer en ruhige Abig mit Znach vom Grill und morn gahts zum Walwatching!    もっと詳しく

    翻訳をご覧ください
  • Jacqueline KrauerJacqueline旅行者

    Whale Watching

    2024年10月26日, 南アフリカ ⋅ ⛅ 18 °C

    Geschter simmer am viertel vor 8i abgfahre zum Whale Watching in Gansbaai. Nachemene Briefing isches los gange. Das Schiff ghört zunere Organisation, wo Meerforschig macht. Sie mached Forschig, Tourischte zahled e Tour und so wird das finanziert.
    De Bischi und Rene hend Tablette gno, dass ihne nid schlecht wird ufem Schiff. Es hett gschauklet wie uf de Chilbibahn, voll cool. Ziemli wiit usse hämmer mal aghalte und Southern right Whale "Südkaper" gseh. I dem Gebiet hetts vill Walmamis mit Babys. Es Baby trinkt ca. 600 Liter Milch....pro Tag! :-) Sehr idrücklich isches gsi. Wo mir wieder losgfahre sind isches de Frau Krauer nümm so guet gange. Tüüf dure schnufe und an Horizont luege, so han ichs einigermasse wieder in Griff becho. Aghalte hemmer s'nächscht mal binere Insle wo Seeloie läbed. Es hät sehr starch gschmöckt...aber dene Tier zueluege, wie's im Wasser umerugelet und isch soooooo herzig gsi. Nachem losfahre isches mir gar nümm guet gange und ich ha e Ch...tüte becho. Die han ich denn au gfüllt. Bim nächscht Halt hemmer au ufere chliine Insle Pinguin gseh!
    Nach 2 Stund simmer wieder an Land gsi und es hät no Brötli und Chürbissuppe geh. Nacher isches mir wieder einigermasse guet gange.
    En churze Halt dihei und denn simmer nach Pearly Beach gfahre. Zwei Schwöschtere vo de Joanne läbed det und mir sind bi de Vivienne zum Znacht iglade. De Bischi, Rene und ich sind denn an Strand abe, Joanne hett mit de Vivienne die Ziit ächli gnosse. Zwei Stund simmer gloffe. Läck bobi isch das schön gsi mit dem Meerruusche. Muschle han ich natürli au no gfunde! :-)
    Wo mer zrugg cho sind hetts natürli zersch en Aperol geh. Drü Poulet sind ufem Grill gsi und zwölf Persone am Tisch. Cheibe glatt isches gsi.    もっと詳しく

    翻訳をご覧ください
  • Jacqueline KrauerJacqueline旅行者
    111

    Ahang zu Whale Watching

    2024年10月26日, 南アフリカ ⋅ ⛅ 20 °C

    ...han ich no vergäss zum schriebe. Ufem Rückweg simmer no an Birkenhead Lüüchturm. 1895 isch de baut worde. Bitzeli über 100 tritt simmer ganz ufe gloffe. Det hetts au en Cache gha... en chliine Gecko gha isch denebed g'höcklet und ufem Deckel hetts was gha...ca 2,5 cm. Mir hend denn schnell usegfunde, dass es en Skorpion isch. Ha denkt, de sigi tod...wo ich aber de Deckel weggno ha, hät de sich bewegt. Eieiei...mir hend ihn und euis chöne rette!もっと詳しく

    翻訳をご覧ください
  • Jacqueline KrauerJacqueline旅行者
    21

    Klipgap Caves

    2024年10月26日, 南アフリカ ⋅ ☁️ 22 °C

    Hüt Morge simmer zu de Klipgap Caves gloffe. I ca 20 Minute simmer det gsi hend pro Peron 60 Ran zahlt, das sind öppe 3 Franke. Vor 2000 Jahr hend det Mensche gläbt. 1969 het mer die Höhli frei gleit und 1992 no meh usgrabe. Läck bobi isch das schön. D'Höhli isch offe und es hät Löcher dine wo mer s'Meer gseht! Denn simmer nochli am Strand ufe gloffe...das Meerrusche isch de Wahnsinn. Zrugg simmer denn obe dure und denn wieder hei. Ca 3,5 Stund simmer underwägs gsi...bi 28°!
    Mer sind denn no go poschte und jetzt tüemmer nochli umelümmle, Wal sichte und später Znacht ässä.
    Morn gahts denn wieder nach Kapstadt.    もっと詳しく

    翻訳をご覧ください
  • Jacqueline KrauerJacqueline旅行者
    de Harryd'Sofiade Bailey

    zrugg nach Kapstadt

    2024年10月27日, 南アフリカ ⋅ ☁️ 17 °C

    Über d'Nacht hetts agfange stürme und rägnä, wobi d'Sunne trotzdem immer mal wieder füre cho isch. Am 9i simmer richtig Kapstadt abgfahre. Mir wohned in Marina da Gama. Das isch in Muizenberg inere Lagune! Choge schön.
    Da Putzfraue nonig fertig gsi sind, simmer no i d'Imhof Farm....bitzeli go shoppe! :-)
    Wieder zrugg, beguätachtig vom Hüüsli! Es isch gmüetlich igriichtet, hät en Pool und e wunderschöni Terasse grad am Wasser. Wenns Wetter besser wird, gömmer mal mitem Pedalo, wo au dezue ghört, i de Lagune mal ächli go umeguggele.
    Später simmer uf Kapstadt zum Neffe vo de Joanne. Ca 25 Persone, 3 Chind und 3 Hünd. Es hät Häppli geh und isch vill gschwätzt worde. Mir wüssed jetzt einiges über die verschiedene Persone. :-)    もっと詳しく

    翻訳をご覧ください
  • Jacqueline KrauerJacqueline旅行者
    25 Millione Yacht!1s'Pirateschiff wär mis Ding!2:-)2mis Bänkli1Indoorgrill!

    Shopping in Kapstadt

    2024年10月28日, 南アフリカ ⋅ ⛅ 20 °C

    Hüt isch immer nochli windig und bewölkt so hämmer beschlosse, dass mer nach Kapstadt ine fahred. Zersch hemmer aber e Wildcard glöst. Die isch für sehr vill Wildparks gültig und so mümmer nid jedes mal zahle und chönd direkt ine fahre.
    Mit dem 1.9 m grosse Van hämmer müsse luege i weles Parkhuus das mir chönd ine fahre. Bim Hafe une simmer fündig worde...d'Antenne het es bitzeli gstreift aber sie hebed no.
    Zersch hämmer natürli de Mage müsse fülle und sind go Fish and Chips ässä! Choge fein gsi, wobi de Aperol natürli Pflicht isch. Gstärkt simmer loszoge. U cool das Gewimmel am Hafe. E mega Jacht hämmer gseh. Die ghört ame Scheich und choschtet läppischi 25 Millione Dollar! Übrigens....s'Benzin choschtet da 1 Franke!!!! Chönd also en Afrikatrip mache zum uftanke! :-)
    Im Water Shed, e ehemaligi Werft, hets vill Egge wo Bilder, Schmuck, Chleider und villi anderi Sache verchauft werded. Sehr schöni Sache hetts. Chrömlet han ich aber nüt...ersch im African Trading Port. Die hend Kunscht verusse us Abfall. Mega cooli Sache....es Bänkli wär also scho cheibe schön i mim Garte! :-)
    No go Läbesmittel ichaufe und hei...d'Julie und Andy chömed hüt Abig bi euis go ässä....und sie hend öppis Schwiizerisches gwünscht. Es git Röschti, Rindsfilet vom Grill und Salat. Grad bim Ässegge hämmer en Grill! Mega cool. Ich wünsche euis en Guete und en luschtige Abig!    もっと詳しく

    翻訳をご覧ください
  • Jacqueline KrauerJacqueline旅行者
    3Di bekannte farbige Hüüsli!Wandmalereie inere Underfüehrig2s'Babymüüsli11E BMW a de Wand2Us Wodka und Schnapsfläsche Lampe gmacht2mega cooli Chindersitzli

    Spaziergang Muizenberg nach Kalk Bay

    2024年10月30日, 南アフリカ ⋅ 🌬 21 °C

    Mir hend geschter en coole Tag gha und sind am Abig no go ässä. Darum chunt de Bricht bitz später.
    Mir sind am 12i uf de Parkplatz am Strand vo Muizenberg gfahre und denn bis nach Kalk Bay gloffe. S'Meer hett gruusched wie verruckt. En schöne Weg hetts, es isch so schön gsi. Ca 1 Stund hämmer gah, mit luege und fötelä! :-) In Kalkbay natürli an Hafe abe, wo mer en Seeloi bim schlafe gseh hend. Nachher hetts i de Cuba Bar Apero und en Snack geh. Mir hend vome ganz chliine Babymüüsli bsuech becho, das hett natürli euisi Brösmeli wo abegheit sind grad mitgno. No bitzeli go lädelä und wieder zrugg laufe. Zum Glück isch d'Fluet scho wieder zrugg gange, susch währed mer doch no öppe nass worde. 5 Stund später simmer wieder bim Auto gsi und....hend e Buess am Schiebewüscher gha. De Bischi hett i de Zone parkiert wo mer nur derf i und uslade. 800 Ran! Sind 40 Franke...cheibe vill für Südafrika. Mir hend sie furtgschmisse und lueged ob öppis vo de Vermietig chunt.
    Später simmer no ime coole Restaurant go ässä. Das Interieur isch mega gsi! So simmer mit vollem Mage hei, go packe und schlafe. Mir hend am 7i müsse an Flughafe fahre.    もっと詳しく

    翻訳をご覧ください
  • Jacqueline KrauerJacqueline旅行者
    d'Schotterstrass
    es Blüemli wo zum Fels us wachst1d'BarSitzbereich im Haupthuus1EsstischChuchiFüürstellUssicht...morn mit Sunneufgang...Duschi1s'Haupthuuse Iismaschine3...und en XXL Chüehlschrank

    Maluti a Phofung

    2024年10月30日, 南アフリカ ⋅ 🌬 20 °C

    Hüt morge simmer vor de 7i abfahre zum Flughafe. Pünktlich isch de Flug nach Johannesburg gstartet und knapp zwei Stund später simmer glandet. Ab zu de Autovermietig und en neue Toyota mit 29 Kilometer ufem Tacho in Empfang gno. Nach ca 3.5 Stund fahre mitemene Zwüschestopp zum poschte für 3 Täg, simmer im Buffalo Hills Reservat acho. E ältere schwarze Maa hett euis in Empfang gno und alles zeiged. Mir sind alli sprachlos gsi. Läck bobi isch das schön. Früehner hend da Mensche im Felse ine gläbt. Mer hett den Hüüsli anebaut, Fels und Stei hett mer integriert. Dächer sind us Stroh und es gseht us wie Schlumpfehüüsli. 6 Hüüsli sinds verteilt am Berg, 5 devo sind zum schlafe für insgesamt ca 16 Persone. De Maa hett euis denn welle s'Gepäck ine und ufe träge, er tägi euis choche, abwäsche und luege, dass alles guet isch. Euis isch niene meh rächt gsi, d'Joanne hett ihm 100 Ran geh und gseit er chängi Fiirabig mache und hei gha. Er hät denn gseit, dass er das nid chöngi, susch schimpfi sin Chef. Er schlaft grad nebedra und staht bestimmt morn Morge früeh da, macht Kaffi und Zmorge.
    Als Willkommensgschänk hämmer es grosses Stuck Fleisch becho...ev Büffel...wills ja de Name scho seit und die da Büffel hend. Mir findeds morn Morge use, wenn Bsitzerin chunt. Das Fleisch hemmer den grad uf de Grill ta...    もっと詳しく

    翻訳をご覧ください
  • Jacqueline KrauerJacqueline旅行者
    de Herr Stier hett sini Fraue gsuecht11Cowboys underwägsBokkies

    en ruhige Tag im Reservat

    2024年10月31日, 南アフリカ ⋅ ☀️ 25 °C

    Am morge isch Bsitzeri schnell verbi cho. Die hend da 1750 ha Land, devo sind 250 ha sind Landwirtschaft, uf de anderne hends Tierli. Ca 1000 Chüeh, mit Kälbli und Stiere, Struuse, Büffel und vill verschiedeni Bokkies, das sind e Art Gemse.
    D'Chüeh sind euis fasch dur de Garte gloffe am Morge, vill Vögeli hend zwitschered und selbscht Paviane hemmer gseh am Berg obe. D'Fenschter und Türe mümmer undbedingt zue mache, wemmer weg sind, susch chömed die is Huus...was denn nümm luschtig wär.
    Mer sind denn mal losgfahre zum ächli umeluege...nach paar minute Fahrt hemmer parkiert und sind ächli i d'Höger ufe. Mir sind sicher bitz über 1900 Meter über Meer gsi, will d'Hüüsli sind ja scho 1856 Meter drüber. Immer wieder hemmer i d'Wiiti glueged. Mega schön isches. Bitzeli chüehl mitem Wind, aber d'Sunne isch da. Ca 1,5 Stund simmer gloffe...und en Büffle hett euis bitz wiiter ober no aglueged. Wo mir d'Kameras zückt hend isch er devo...isch villicht au besser gsi...wär gar nid luschtig e persönlichi Begegnig mit so eim ha!
    Zrugg bim Auto simmer no e Rundi gfahre...mit ca 20 km/h simmer duregrumplet und gschüttlet worde. Strusse, verschiedeni Bokkies und natürli Chüeh hemmer gseh...und uf eimal sind vo une es paar Büffel z'renne cho....da hett de Bischi uf Befehl vo de Joanne grad schnell müsse Gas geh. Kei Ziit meh gha zum es Foti mache...sind ja uuuuuu mega idrücklichi grossi Tier.
    Nach 3 Stund simmer wieder dihei gsi und sind nochli a d'Sunne g'höcklet, hend gläsä, gschwätz und's gnosse. Jetzt gits denn no Znacht und bald isch de Tag au wieder verbi.    もっと詳しく

    翻訳をご覧ください
  • Jacqueline KrauerJacqueline旅行者
    typischi südafrikanischi Chüeh1Ussecheminee mit Liecht! :-)1mini sicht vom Bett, wenn ich ligge

    Doornkop Wildlive Reserve

    2024年11月1日, 南アフリカ ⋅ ☀️ 30 °C

    Früeh simmer losgfahre...es sind öppe 4 Stund Autofahrt vor euis. D'Strasse sind nid immer ime guete Zuestand und de Schnee voremene Monet hät das au nid besser gmacht. Zitewies isches wahnsinnig holperig, de Bischi het öppe mal müsse uf Brems. Mir sind trotzdem guet fürschi cho....da hetts ja gar nie Stau...d'Strass zietewies pfieffegrad.
    Am 3 hämmer im "Hüüsli" im Doornkop Wildlive Reserve" itschäggt. Wieder mega schön, ächli am Hang obe und e schöni Ussicht uf d'Hügel vis a vis. Da simmer nur ei Nacht, will euises Ziel ja de Krüger isch und mer susch viiiiiiiiel z'lang müsstet fahre. Bitzeli "chille", de Grill afüüre und Znacht ässä. Sunneundergang, Sternehimmel, Fledermüüs und e Sternschnuppe hetts z'luege geh.    もっと詳しく

    翻訳をご覧ください
  • Jacqueline KrauerJacqueline旅行者
    1Sitzplatz mit Pool
    Sitzterasse mit Sicht uf de Fluss1

    Moholoholo Ya Mati

    2024年11月2日, 南アフリカ ⋅ ☀️ 35 °C

    Am Morge ziitig wieder los...und scho bevor mir losgfahre sind, han ich en komische Mage becho...han uf de Fahrt nid vill mitbecho und gschlafe. In Moholoholo Ya Mati simmer guet acho und ich grad is Bett. Mage, Darm und Temperatur...Joanne hett d'Bootsfahrt vom 3 am Namittag uf de ander Tag chöne verschiebe. Hüüsli isch wieder mega....grad am Blyde River...es ruusched...ich LIEBS! Äffli sind au no schnell verbi cho zum Grüezi sägä und anschienend hetts es Nilpferd da und chiem ämel am Abig au go luege. De Wasserstand vom Fluss isch aber z'tüüf....und jetzt isches wiiter obe.もっと詳しく

    翻訳をご覧ください
  • Jacqueline KrauerJacqueline旅行者
    1
    gsehnd ihr s'Krokodil?ganz en stachelige Kolleg11...de Dom Pedro ;-)Hippo's

    Blyde River Canyon Bootsfahrt

    2024年11月3日, 南アフリカ ⋅ 🌙 34 °C

    Es gaht mir hüt scho wieder guet...Pharma sei dank. Uf die 11i simmer denn uf s'Boot und de Fluss uf. Es isch verbote da go bade, wills Krokodil und Nilpferd het. De Guide han ich gar nid verstande. Mis Änglisch isch ja gar nid guet, aber de hett no en Zulu slang gah...Joanne hett ihn au nid guet verstande. Es isch aber au so schön gsi...die höche Felse und Berge...zum Glück isch immer ächli es Lüftli gange, isch ja am 11i scho 37 Grad gsi!
    Mer hend Hippos gseh und es Krokodil. Die hend das gseht und hend extra no en Chreis gmacht. Vo de Gäscht hetti das niemmer gseh...aber die hend es Aug defür. E Gans isch 3 Meter denebed gstande...ob sie's überläbt hett wüssed mer nid...mer sind vorher wiiter. Nach 1,5 Stund simmer wieder an Land...zum Glück isches nid so heiss...im Auto hetts koched. Knapp bim Igang zue hett no en Weg zume Wasserfall. De simmer denn no gloffe und das vill am Schatte. I knapp 15 Minute simmer det gsi..es paar hetts gha wo baded hend. De Wasserfall isch nid so höch gsi und hett au wenig Wasser gha, aber trotzdem schön.
    Wo mer wieder bim Auto achömed hüpft grad an Pavian ufen Abfallchübel, hett de ufgmacht, aber d'Usbüüti isch nid de Hammer gsi für ihn. Vor dene muss mer mega ufpasse. Die chlaued alles und sind nid schüüch. Darum...im Huus wie au im Auto...IMMER alli Tür und Fenschter zue mache.
    De Bischi hett e gueti Idee gah und so simmer dihei grad is Restaurant füre und hend en Dom Pedro trunke. (Dom Pedro isch mit Vanilleglace und Amarula Likör...schaurig fein!)
    Nochli Bricht schriebe und tschille und bald gits Znacht wo mir vom Restaurant divorne bstellt hend. Die mached am 4 zue und hend euis das glieffered. Härdöpfelgratin, Bobotie, (südafikanisches Fleischgricht) Chicken Curry und Salat. So chömmer vo allem probiere. En Guete!    もっと詳しく

    翻訳をご覧ください
  • Jacqueline KrauerJacqueline旅行者
    Strasseblockade...fasch en Alpabzug!
    vill Flüss sind uströchnet...Bucketlist...Säuli!de Tisch isch deckt...de Znacht isch underwägs!

    Nthakeni Bush River Camp

    2024年11月4日, 南アフリカ ⋅ ⛅ 33 °C

    Sodeli, mir hend nachere Wuche wiedermal W-Lan und sind i de Zivilisation zrugg. Jetzt gits für jede Tag wieder Bricht und Föteli.
    Am Morge 4. November churz vor de 9i simmer wieder losgfahre. 400 km lieged vor euis. Isch fasch ächli wie e Safari gsi. Chüeh, Esel, Geisse sind am Strasserand am grase gsi und hend ziitewies d’Strass au blockiert. Wie immer hetts au öppe Löcher i de Strass gha, wo euis ächli usbremsed hend. Aber mir sind guet fürschi cho und hend nach 2,5 Stund en halt ime Ichaufszentrum gmacht. Mir münd Läbesmittel für 4 Täg poschte, wills i dene Camp teils gar kein Lade hett. De Bischi isch bim Auto bliebe, mit de Koffere im Auto wär das nid sehr optimal ohni Wachposchte. Isch ja nur knapp 40 Grad. Das Zentrum isch mega schön und riiiiiiiesig. Mir hend zersch i de Apothek Moskitospray kauft, will mir euis ab jetzt im Malariagebiet ufhaltet. Denn isch d’Suechi los gange, nachemene Läbesmittellade. Mir sind denn mal fündig worde und zwei Wäge hämmer gfüllt. Astah a de Kasse hett sich denn als Heruseforderig usegstellt. 3 volle Wäge sind vor euis gsi. Es isch sehr langsam fürschi gange…nach 25 Minute sind mir dra cho. D’Verchäuferi hett sooooo lieslig gred und i ihrem änglische Dialekt hett Joanne sie au fasch nid verstande. Sie hett nachere «Cumuluscharte* gfröged. Joanne hett denn en Maa hinder euis gfröged, ob er eini hett. De isch sehr happy gsi, wo er euis die Charte hett derfe geh. Er hett Pünkt becho und mir hend 300 Ran (ca Fr. 15) gspared. D’Verchäuferi hett denn mal agfange d’Sache scanne…und nochli Melodie gsunge i dere Ziit. Die hend e gueti Arbetsistellig. Ja kei Stress bitte. De Bischi hett scho übere Stund müsse warte. Mir natürli keis Handy debi…hettet ja susch mal gfunked, dass alles ok isch. De Joanne und mir isch fasch de Geduldsfade grisse…und de isch bi mir ja nid so dick, obwohl ich da une unglaublich ha chöne abefahre. Ich ha nur ghofft, dass de Bischi nonig gschmolze isch bi dere Hitz. Mir hends denn tatsächlich gschafft und sind mit dem Ichauf zum Auto, wo mir erstunlicherwies grad gfunde hend. Nach wiitere 2,5 Stund simmer denn im Nthakeni Bush und River Camp acho. D’Säuli wo uf euisere «Safarifahrt» no gfehlt hend, und hend die also au no gseh. Mir sind ziemli nöch a de Grenze zu Simbabwe und Mosambik. Grad am Mutale River. Leider hett de Fluss sehr wenig Wasser…Füess bädele liet nid drin…es hett Krokodil. Es hätt da nur Solarstrom und für Heisswasser zum dusche chan mer usserhalb en Ofe ufheize. Villicht bruched mer de gar nid bi dene Temperature. De Grill und alli Cherze azünde und bi no ca 37 Grad Znacht gässä. Bi dene Hüüsli hetts kei Schiebe i de Fenschter. Ganz fiini Gitter und en Rollo langed da. Wo mir is Bett sind, hett de Rene gmeint er hegi Glüehwürmli gseh. Es sind denn aber Lüüt gsi mit Taschelampe.
    Wahrschinli wegem Schnee sind Hääg kaputt gange und so sind Elefante vo Simbawe abe cho und in Krügerpark ine. Das isch aber nid ihres Gebiet und sind darum nervös und aggressiv. Sie strieled überall ume und mached s’Züüg kaputt. De Bsitzer hett 4 Hünd und die gebed a, wenn öppis i de nöchi isch. Es hät da au en Pool, wo au ich drin gsi bin. :-)    もっと詳しく

    翻訳をご覧ください
  • Jacqueline KrauerJacqueline旅行者
    2
    de MischtchäferBaobab Baumd'Blüete vom Baobabherzigi Wäglide Mutale RiverBsuech becho...im Hindergrund gseht mer no en Wasserhahn...

    2. Tag im Ntjakeni Camp

    2024年11月5日, 南アフリカ ⋅ ☀️ 29 °C

    Leider isch d’Sunne scho da gsi, wo ich am halbi 6i ufgstande bin. Ja nu…chasch nid alles ha. Gli druf abe isch de Bsitzer mit sine Hünd verbi cho. De isch uf Kontrollgang gsi, will die «Glüehwürmli» vo geschter Game Rancher gsi sind wo glueged hend wo die Elefante sind. Anschienend sind grad use vo euisem Haag verbi…das sind ca 20 meter….und mir hends nid gseh. Isch ja au stockezapperfinschter!
    Mer sind denn no e chliini Rundi go spaziere ufem Gländ und d’Mona, ein Hund vom Bsitzer hett euis begleitet. Baobab, das isch en richtig schöne Baum. Riesig sinds und hend obe chliini Äscht wo Blätter dra sind. Die Baumstämm sind beidruckend. De gröschti bekannti Baobab Baum wär 1,5 Stund fahre gsi. De Stamm hett 33 Meter Umfang und isch 20 Meter höch. 36 Mänsche Arme chönted drum stah, er isch 1200 Jahr alt und en Teil vom Stamm isch versteinered.
    En Mischtchäfer hett den au no e Mischtchugle vor euis heigrugeled.
    Äs isch am Vormittag scho sehr heiss gsi a de Sunne und so hämmer denn en gmüetliche Tag gmacht. Bitzeli bade, läsä, schwätzä und natürli lache!
    Die hend da au en Wöschservice, wo mir sehr gern in Aspruch gno hend. D’Wösch hends abgholt und am Namittag wieder bracht. Es isch z’erwähne, dass die alles vo Hand gwäsche hend!!! Es hät ja nur Solarstrom!
    Am abig simmer denn is Restaurant füre go ässä. Iheimischi Fraue füehred das uf ihri eigne Choschte. Es hät Gmües, Mieliepap (wiise Mais, ähnlich wie bi euis Polenta) Chakalaka, (e Sauce us Bohne, Tomate, Zwieble, Chilli und Gwürz), Kale (Grüenchohl) und Poulet geh! Läck isch das fein gsi. Mir wüssed nid genau, ob Gloria und Selma, so heissed die zwei Chöchinne, ufem offne Füür koched hend, oder ob sie en Gasherd hend. Wo mir cho sind isch de Tisch deckt gsi und Petrollaterne hend brennt. Hinde isch alles dunkel gsi und a de Schoss hend sie Taschelampe gha. S’ässä isch denn i Tupperware uf de Tisch cho und mir hend selber derfe schöpfe. Vorher sinds aber verbi cho mitere Schüssle und emene Topf mit warm Wasser und mir hend euisi Händ derfe wäsche.
    Für das ganze hämmer 560 Ran zahlt, dur 4 macht das grad mal 7 Franke. Mir hend ihne denn 800 Ran geh und sie sind überglücklich gsi.    もっと詳しく

    翻訳をご覧ください
  • Jacqueline KrauerJacqueline旅行者
    ohni Handyempfang! ;-)da werded jede Tag mit farbige Magnetli Pünkt markiert, wo welli Tier gseh worde sind...usglaschteti Steckdose!

    1. Tag im Kruger

    2024年11月6日, 南アフリカ ⋅ 🌬 30 °C

    Hüt isches bewölkt und es hät agfange niesle. Packe, zämäruume und bim Bsitzer simmer no go euisi «Chrömlete» zahle. Geissli, Hühner und Säuli hemmer namal gseh…also scho e chliini Safari. Nach 20 Minute simmer bim Igang vom Krüger Park acho. Churz druf abe hemmer scho die erschte Tusker Elefante gseh, eine isch grad 2,5 Meter a euisem Auto verbi gloffe, Zebra, Wasserbüffel, Giraffe, Wasserböck, e Vervet Äfflifamilie mitemene ganz junge Baby, eis Warzeschwein, en Adler, Impalas, Streifengnu, Nyala’s und e Leopardeschildchrot. Binere Picknickstell hemmer schnell e churzi Pause gmacht und det en Nashornchäfer gseh, de gröschti in Südafrika, de isch ca 3 cm gross gsi..und vo dem gits no grösseri Modell.
    Mir hend ja ganz e ufregendi Fahrt gha. Uf de teerete Strass derf mer 50 km/h fahre, uf de Schotterstrasse nur 30 bis 40 km/h. Aber mer will ja nid schnell fahre, susch frääst mer a de Tierli verbi. Am 4i simmer im Sirheni Camp bi euisem Hüüsli acho
    Zmitzt im Bush ohni Internet und einere Steckdose! Det hetts choge schnell ganz vill Kabel dra gha…alles hett wieder müsse ufglade werde. 😊
    Hämmer öppis chliises g’ässä und ächli gschwätzt und zäck, staht en Wasserbüffel, ca 20 Meter une bim Haag. Eieieie…simmer ziemli nöch ane zum es Föteli mache. Joanne und de Rene sind denn nochli abe gloffe…und promt hett sie de Schlag troffe vom g’ladene Haag. Isch e ziemli luschtigi Story gsi! De Grill azünd, Znacht g’ässä und scho bald is Bett.    もっと詳しく

    翻訳をご覧ください
  • Jacqueline KrauerJacqueline旅行者
    en Kuduen Rotschnabeltokos'Hyänemami

    2. Tag Kruger

    2024年11月7日, 南アフリカ ⋅ ☁️ 26 °C

    Himmel, mer cha gar nid richtig wach werde…am 8i simmer scho wieder los. Es fieserlet immer no, aber es setti besser werde. Und de Räge chönds da sehr bruche, aber das isch en Tropfe ufen heisse Stein. Es hett sehr wenig, bis gar kei Wasser i de Flüss. Giraffe, Zebra, Elefante mit Junge, Äffli, Termitehüüfe, vill Springböck und verschiedeni Vögel hemmer gseh. Bi 2 Camps hemmer 1x tanked und 2x chrömlet. Mitarbeiter fahred uf de Pickup hinde druf mit....chasch ja eh nid schnell fahre.:-) De Hammer churz bevor mir bim Hüüsli acho sind, e Hyänämuetter mit 3 Junge…2 devo sind am trinke gsi…1 meter nebe de Strass! Läääääääääck bobi isch das Idrücklich gsi. Guet simmer im Shimuwini Bush Cam acho. Grad ame Fluss wo nochli Wasser hett. Und was gsehnd mir? E grossi Herde, ca 20 Stuck Nilpferd, die einte no im Wasser, anderi an Land. Wills rägnerisch und bewölkt isch, sinds teils scho dusse. Nilpferd sind tagsüber normalerwies im Wasser, will sie susch de Sunnebrand bechömed. Es hät ufghört rägna, aber es windet recht. Trotzdem hämmer no Würschtli uf de Grill klöpft und sind bald is Bett.もっと詳しく

    翻訳をご覧ください
  • Jacqueline KrauerJacqueline旅行者
    d'HyänächindeBüffelstau!Cape Glossy Star

    3. Tag Kruger

    2024年11月8日, 南アフリカ ⋅ ☁️ 24 °C

    Am Morge hemmer no Bsuech becho vo Eichhörnli. Die sind denn gar nid schüüch und bis uf de Sitzplatz cho zum Brösmeli vom Brot hole. Es muss vermerkt werde, dass mir die «Brösmeli» nid absichtlich abegschmisse hend.
    Hüt staht e «chliini» Rundi ufem Programm. Mir sind nach Letaba gfahre. Es isch immer no bewölkt und die Tierli hend sich gar nid welle zeige. Uf eimal isch denn doch no e Herde Wasserbüffel über d’Strass zoge….bi fasch 50 Stuck isch das doch no en Moment gange. En Elefant hemmerr gseh und uf eimal namal Hyänä mit Junge…die sind fröhlich uf de Strass ghüpft. S’Mami isch denn gli zum Vorschie cho und denn sinds i Büsch. E Gruppe Äffli isch denn no am Zmorge gsi und nach knapp 3 Stund simmer im Camp Lebata acho. Zwei Schuelklasse sind au grad acho…alli mitere Uniform und die sind sehr ruhig und gsittet gsi. Natürli hämmer no müsse im Shop go luege…und so! 😊 No es Picknick poschte und uf de Picknickplatz go ässä. Det hämmer Graufische und grünschwanzglanz Star (Cape glossy Starling) gseh. Mega schöni Vögel. Die einti Schuelklass isch den a euis verbi gloffe und alli Chind hend e chliini Chüehlbox debi gha und det Zmittag g’ässä. Mir hend euis denn wieder uf de Heiwäg gmacht und g’hofft, dass mer nochli meh Tierli gsehnd. D’Sunne isch füre cho und es isch scho 25 Grad worde. Und denn…hemmer Nilpferd gseh und die sind nid mal im Wasser gsi. Fuhl sinds an Land umeglägä und hend pfuused. Gli druf hemmer zwei Giraffe uf de Strass atroffe.
    Im Krüger derf mer nid zum Auto usstiege, usnahm, aber uf eigeni Verantwortig, sind Brugge. Det hetts scho es paar Auto gha. Also hemmer au en Stop gmacht! Huiiiiii…da hämmer e Show gha! 4 Wasserschildchrotte ufmene Stei, zwei chliini Krokodil im Wasser (d’Joanne isch fasch duredreiht!) Nilpferd im Wasser und zwei an Land, e Herde Elefante wiiter äwäg, en Giraff, e Echse, Wasserböck und Kudu’s. Mir hetted no chöne zwei Stund det stah bliebe, mer sind denn aber gliich wieder losgfahre. Elefante, Giraffe, Nilpferd, Wasserböck und Impala hend euis ufem Heiwäg begleitet. Und wo mir abboge sind i d’Schotterstrass zu euisem Camp, isch e Horde Wasserbüffel grad am Rand gsi. Mir hend denn no es paar Föteli gmacht bevor de Bischi hett müsse Gas geh!
    Jetzt lueged mer nochli Nilpferd im Wasser bis die denn am Fiirabig an Land gönd go frässä über d’Nacht.    もっと詳しく

    翻訳をご覧ください
  • Jacqueline KrauerJacqueline旅行者
    en Franklin
    1s'Ussicht vom Hüüslisehr wenig Farb, aber wenn...denn...Ussicht uf de Olifant RiverRedwinged Star2

    4. Tag Kruger

    2024年11月9日, 南アフリカ ⋅ ☁️ 22 °C

    Hüt züglet mer eimal meh e Station wiiter. Euises Ziel isch hüt s’Satara Camp. Es isch no liecht bewölkt und am halbi 11i scho wieder 33 Grad. Ha die vergangene 4 Tage sind für mich scho agnehmer gsi. Aber mer cha ja nid alles ha. Im Olifant Camp hemmer en Stop gmacht. Det hetts e Ussichtsplattform uf de Olifant River. Leider hett au de zwenig Wasser, de wär susch en beidruckende Fluss. Mir hend wiit i d’Ebeni use gseh und natürli au wieder Tierli wo sich a dem wenige Wasser ufghalte hend. Det hämmer natürli au wieder müsse in Shop und nachher no öppis chlises ässä. Mir hend au hüt Giraffe, Elefante, Wasserböck, Springböck, Warzeschwein, Zebra und verschiedene Vögel gseh. Es isch sehr troche da, de Rägä die letschte Tage hett nid würklich öppis bracht.
    Loie und d’Nashörner fähled euis no uf de Tierlilischte. Und natürli de Leopard und de Gepard. Aber wenn mer die gseht, muss merk ei Lotto meh spiele, will’s Kontingent a Glück ufbruucht isch. Defür isch grad no es Kuduwiebli bi euis am Hüüsli verbizottlet. D’Hüüsli i de letschte Täg sind natürli nümm i dem Usmass gsi, wie vorher. Mir sind im Krügerpark und da isches zweckmässig. Aber mir hend es Bett zum schlafe, meh bruucht mer ja nid. Abig simmer denn no go Znacht ässä im Reschtaurant vom Camp. Mir hend gha… 1 gmischte Salat, 1x Chateaubriant, 1x Seafood Platte, 1x Sirlion mit Camenbert, 2 Glas Wii und 2 Bier. Alles zämä für 70 Franke! Mer schämt sich fasch, wenn mer zahlt.
    Übrigens…de Krüger isch vom Norde bis in Süde 350 km und Wescht nach Oscht durchschnittlich 54 km. Tierli uf rund 20'000 Quadratkilometer…😊    もっと詳しく

    翻訳をご覧ください
  • Jacqueline KrauerJacqueline旅行者
    1
    1de SattelstorchMorgetoilette ;-)eine vo de verschiedene IisvögelMadehacker am Giraff1gnau luege, s'Krokodil wo sich im Wasser spieglet1afrikanischi Wildchatzen Aasgeier! Nid würklich es schöns Vögeli3:-) de Leopard! :-)

    5. Tag Kruger

    2024年11月10日, 南アフリカ ⋅ ☁️ 21 °C

    Am Morge hett sich doch glatt no e südafrikanischi Wildchatz zu euis verirrt. Joanne isch verwached, will alli Vögel Alarm gschlage hend. S’Büsi hett tatsächlich no e Schwalbe zum Zmorge verwütscht.
    Denn simmer scho wieder losgfahre nach Berg en Dal im Süde. Isch en Moment sehr ruhig gsi, wahrschinli hend Tierli usgschlafe. Wenn Auto am Rand stönd mummer ahalte…da gits immer öppis zum luege. E schöne Sattelstorch hett sich in Pose gstellt. Es paar Elefante hend d’Strass überquert und churz druf abe isch e ganzi Herde, ca 20 Stuck, über d’Strass und ane Wasserstell gwaglet. Die Wasserstell isch schnell e Schlammstell worde. Chlii und gross hend sich det ine gwälzt. Das isch es luege gsi! Mir hettet stundelang chöne zueluege.
    Giraffe mit Madehacker (Vögel) die fressed Parasite ufem Buggel vo de Giraffe. Chunt eim vor, als wäred Giraffe en «Uber»! Churz druf abe, vorere Brugg hetts en riese Stau geh. En Huufe Aasgeier hend sich ame Wasserbüffel d'schaffe gmacht. Isch nid so schön gsi zum luege.
    Mer sind richtig Skukuza zum Zmittagässä gfahre. Joanne hett denn binere Wasserstell e Krokodil gseh. Himmel, sie isch schier zum Fenschter us gumpet. Das Krokodil hett sich denn au no mega cool im Wasser gspieglet, das hett mer fasch nid gseh. Mer sind denn tatsächlich mal acho…ab in Shop und no en chliine Zmittag für uf de Weg. Tierlishow isch scho gli wieder los gange. Es hett en Stau geh…und alli hend i ei Richtig glueged. Ufem Baum hett doch tatsächlich en Leopard sin Mittagsschlaf gmacht. Meine Herren!!!!! De 6er im Lotto!
    Churz druf abe sind 3 chliine Warzeschwein am umerännä gsi…d’Muetter isch denn aber ab in Bau und die chliine hindedri. Dene hetts denn aber glaub det ine gstunke und sie sind schnell wieder usecho.
    Paar Minute später hämmer müsse halte, will en Elefant zmitzt uf de Strass gstande isch. Fasch 10 Minute isches gange, bis de de Weg frei geh hett. De hett sich bestimmt kaputt glached, will 6 Auto hend müsse warte! E Schildchrot isch no am Spaziere gsi. Mir hend denn nach Berg en Dal e Abchürzig gno…das heisst, 4x4 setti s’Auto si. Hett wieder grumplet und gschüttlet und s’Ziel hämmer erreicht. Jetzt fehled also no Nashörner und Loie! Da wär halt schono schön. Mir mached aber mal no en Bush Braai, e Buschbrätlete mit Safari. Und die Guides wüssed ja meischtens wo welli Tier sind…mir hoffed.    もっと詳しく

    翻訳をご覧ください
  • Jacqueline KrauerJacqueline旅行者
    "Fernseh" live vom Wohnzimmer us!man beachte! S'Warzeschwein uf de Chnü...d'gaht besser zu frässä! :-)euisers "Hüüsli"WohnzimmerEssbereichchliini Indoorchuchi...mein Schlafgemach1Ussicht verusse

    Marloth Park

    2024年11月11日, 南アフリカ ⋅ ☁️ 20 °C

    Geschter isches wieder über 35 Grad gsi und am Abig hetts denn no agfange Gwittere. Blitzt und dunnereds hetts wie verruckt. U cool gsi im Bett am trochne ligge. :-) Am morge isch de Spuk verbi gsi und Temperatur wieder im agnheme Bereich.
    Hüt verlönd mir de Krügerpark. Uf de Hauptstrass isch Tierlimässig nüt los gsi, also hend mir no e Ehrerundi ufere Nebestrass gmacht. Aber au det hetts nüt zum luege geh. Es paar Böckli, aber vo dene hetts ja u vill. D'Schotterstrasse hend schochli glitte, es hett de Sand weggschwämmt und en huufe Wasserlache. Aber mir hend ja en 4x4 wo scho usgseht als wär er scho 20 jährig.
    So simmer halt zum Park use und in Malalane go poschte. Euises "Hüüsli" isch ja wieder de Hammer! D'Stube und d'Chuchi isch dusse underem Dach. Obe hetts e Terrasse wo mer grad uf de Krokodile River gseht und ene am Fluss isch de Krügerpark! Es hett agfange rägnä wie verruckt. Sie, wo das Hüüsli tut vermiete hett gseit, so tägis sehr selte, eigentlich nur rägälä...wenn überhaupt.
    Ich bin am Bricht schriebe und uf eimal stönd Impala vorne dra. De Nachber hett Gras usegleit und anschienend chömed die all Tag um die 4i ume. Mir hend denn au no es Hüüfeli Gras becho. Den isch no es Warzeschwein uftaucht und Kudu's. Mir hend no alts Toastbrot und das hemmer den au no geh. De einti Kudu isch so nöch cho...bin im erschte Moment ächli zrugg...Aber die sind so zahm, de hett mir grad zu de Händ us gfrässä! Hei isch das e Story...am Morge kei Tierli und am Namittag vor de Tür! Besser wie Fernseh!!! Mir münd unbedingt morn im Lade vorne go Gras poschte! :-)
    Wo mir cho sind isch en Gasgrill im Rägä usse gstande, die Agstellte, wo für de Underhalt vom Huus zueständig sind, hend euis de grad unders Dach, i d'Stube ine treit. Vom Steigrill gits hüt definitiv nüt.    もっと詳しく

    翻訳をご覧ください
  • Jacqueline KrauerJacqueline旅行者
    ...bitzeli Farb i de Landschaft...
    ...Cache gfunde!..Pfützestrasse...12

    En ruhige Tag im Marloth Park

    2024年11月12日, 南アフリカ ⋅ 🌙 17 °C

    Es git doch no en Nachtrag vo geschter!
    Nachem Znachtässä sind Joanne und ich Zimmer go inäblä, zum Mugge eliminiere. Bi Bischi's im Zimmer isch grad no e Kakerlake devo grennt. Die hett denn au grad s'ziitliche gsägnet. Ich ha scho grad ächli im rote dreihed und bin mis Zimmer namal mit de Taschelampe go kontrolliere. Alles im geüne Bereich. Nochli schwätzä und churz vorem halbi 10i richtig Bett. Latsch ich i mis Zimmer...e Kakerlake... Ha schnell gflueched und Joanne isch als Sprayerin namal in Isatz cho. Es het denebed au no en chliine Skorpion gha! De Bischi isch denn als Entsorger zueständig gsi. Mini Nerve....de Gedanke, dass ich da no setti schlafe. Churz druf abe hett Joanne es WhatsApp becho, es sigid vom Krügerpark es paar Loie abghaue und im Marloth Park (wo mir sind) gsichtet worde. Es münd alli dihei bliebe und derfed nid use bis wieder e Nachricht vor Entwarnig git. Joanne und ich hend denn s'Pyjama agleit und sind ufs Sofa use gsässä.
    D'Stüehl hämmer schön an Tisch anegschobe und so de Fluchtweg frei gmacht, wäred d'Loie cho. Es hend denn aber nur Kudu's, Reeböck und Klippespringer verbi glueged. Nachere Stund simmer denn go schlafe.
    Am Morge am viertel ab 5i bin ich, wie meischtens da i de Ferie, scho wieder wach worde. Vo de Loie hämmer nüt neus gseh. Aber Jogger und Spaziergänge hetts trotzdem gha. Joanne hett den Vermieteri agfröged, ob mer derf go spaziere. Sie hett denn gmeint, es sigi ok. So simmer loszottlet…en Weg nöch am Fluss. Es hett denn wieder agfange «fieserle». Da de Cache aber nur no 300 meter wiiter gsi isch simmer zu Trotz wiitergloffe. Ha de Kerli ganz schnell gfunde und mer sind uf de «Strass», wo ziemli grossi Pfütze gha hettl, heigloffe. D’Hüüsli nochli beguetachtet und recht füecht heicho. Denn simmer no im Lade füre gfahre und hend Heu, pressts Fuetter und Vogelchörnli poschtet. Gli nachem heicho hämmer Elefante gseh cho äne im Krügerpark. Es sind immer meh worde. Ca 40 Stuck, devo mindeschtend 5 chliini, sind über de Fluss uf euisi Siite cho. De Bischi hett denn welle go luege, wo die ane gönd. So simmer losgfahre und hend si wiiter une au wieder gfunde. Im «Niesel» simmer det gstande und hend nochli Elefante glueged.
    Wieder dihei hämmer ächli g’läsä und ich e rundi pfuused.
    S’Fuetter für Böckli, Warzeschweinli und Vögeli isch parat.
    Vögeli und 1 Warzeschwein isch mal verbi cho….s’Schweinli hett gfrässä und gschmatzed wie verruckt. Es sind denn au no es paar Buschböckli cho, aber die sind sehr schreckhaft gsi. Churz vorem idunkle sind denn doch no 6 Wasserböck cho…die hend euis zu de Händ us gfrässä! Hui wie herzig!    もっと詳しく

    翻訳をご覧ください
  • Jacqueline KrauerJacqueline旅行者
    ...Kudu füettere...
    ...Buschböckli füettere...Mischtchäfer beobachte...die hend en mega chrampf!...Wasserschildchrötli ene am Ufer......erläbsch in Afrika...Grillstell usse..WohnzimmerChuchi2...mis Schlafgemach...

    ab is Mjejane Reservat

    2024年11月13日, 南アフリカ ⋅ ⛅ 22 °C

    Hüt morge isches richtig fründlich gsi. Es hät nümm grägnet und d’Wulche hend sich verzoge. Perlhüehner, Böckli, Marderli und Mischtchäfer sind cho go grüezi sägä. Es Böckliwiibli hett mir sogar us de Händ us gfrässä.
    Da mir hend müsse Ziit überbrücke, bis mer am 2 chönd is letschte «Hüüsli» simmer no in
    Lionspruit, en gschützte Park im Reservat wo mir gwohnt hend. Es hetti Loie, Leoparde und au Nashörner. Die hend sich aber nid blicke lah defür hemmer Giraffe, Echse, Böckli und Zebra gseh. 3 sind nebe de Strass gstande, eis is über d’Strass trottlet und direkt uf euis zuecho. Mir hend d’Fenschter dune gha und das hett frech ineglueged. 😊 Es hät vill höchi Bäum und Büsch und Plätzli wo mer derf usstiege. Vögel hend pfiffe und trällered, mer hett chöne meine, mer sig im Lindbergwald.
    Nachher hemmer no müsse go poschte und sind pünktlich am 2 im Mjejane Reservat acho. S’Hüüsli isch wieder mega schön, so lönd sich die letschte 3 Täg no gnüsse.
    Es Vervet Äffli isch scho bi euis uf de Stägä ghocket, wo uf Terasse ufe gaht und
    Eidechsli flitzed ume,
    Ich muss no min Koffer sortiere…weiss nonig genau, wie ich das Gwicht sell verteile!
    Morn morge werded mer am 6 abgholt und gönd uf e Safari. Mir hoffed sehr, dass mir no Loie und Nashörner gsehnd. Das fehlt euis das no uf de disjährige Lischte.
    Jetzt mached d’Manne es Füürli dass es denn au Znacht git.    もっと詳しく

    翻訳をご覧ください
  • Jacqueline KrauerJacqueline旅行者

    Zweitletschte Tag

    2024年11月14日, 南アフリカ ⋅ ☁️ 23 °C

    Am halbi 5i isch Tagwach gsi…Kaffi und Müesli verusse , schliesslich isches scho hell, schön Wetter und 19 Grad. Parat gmacht und am 6i vom Samuel, euisem Fahrer, begrüsst worde. Er hett euis gfröged, was mir gern möchtet gseh…es Nashorn bitte. Das Reservat isch ca 4000 Hektare gross und «normali» Auto derfed nur uf de Hauptstrass fahre und das mit höchschtens 40 km. Es hät sogar Radar und 50 Franke zahlt mer für e Buess! Euisen Driver derf natürli alles befahre und so simmer zmitzt i d’Wildnis. Sicht isch grandios und de Samuel hett Auge wie en Adler. Es Vervet Äffli isch uf de Gleis ghocket…Impala hend de Weg krützt und uf eimal zwei Nashörner. Zwar wiit ewäg, aber immerhin. Die hend leider kei Hörner, will mer dene all 2 Jahr d’Hörner stutzt, wege de Wilderer. Im Krüger hetts bi de Camps ämel e Tafele gha, wo mit Magnetli markiert worde isch, was mer wo gsichtet het. Aber NIE Nashörner. D’Angscht vor Wilderer isch vill z’gross. Elefante und Zebra hemmer denn au no gseh…und 2 Mischtchäfer u feinere Chugle. Die isch Golfball gross gsi und s’Männli hett die Chugle umegstosse. S’Wiibli isch nur dra ghanged. 😊Die Chugle wird denn vergrabe und s’Wiibli leit d’Eier dri leit. Isch also au spannend mit so chliine Tierli. Nach 3 Stund simmer wieder zrugg cho…und es isch ersch 9i! Da hett sich doch no en Tuusigfüessler uf eusen Sitzplattz verirrt. De isch so lang wie es Zigipäckli.
    Nachli umelümmle, dusche, öppis chliises ässä und ab nach Malelane zum shoppe. Isch nid de brüller gsi, aber für d’Sofia hetts doch namal öppis geh.
    Vom Igang is Camp bis zu euisem Hüüsli fahrt mer 20 minute…und was gsehnd mir??? Nashörner…3 Stuck. 3 Wuche keis gshe und hüt grad 5!
    Elefante sind au grad no am Rand gstande und so hämmer ufem Heiwäg namal e chliini Safari gha.
    Im Restaurant vorne hetts, Ussicht uf de Krokodile River, en Dom Pedro geh. Im Fluss sind Nilpferd gsi und uf eimal sind 2 Nilpferd no e chliini Stromschwelle abegsaust! Isch ziemli luschtig gsi, will die sich nie so schnell beweged.    もっと詳しく

    翻訳をご覧ください
  • Jacqueline KrauerJacqueline旅行者
    ...d'Übeltäter...
    ...hübschi chliini Blüemli......ohne Worte...

    de letschti Tag...

    2024年11月15日, 南アフリカ ⋅ ☁️ 25 °C

    Geschter Abig vorem Znacht ässä hämmer es seltsams Grüsch ghört. Ich has nid ame Loi zueteilt. Gseh hemmer aber nüt. Nachem Znacht hämmers wieder ghört und denn sind Joanne und ich mit de Taschelampe s'Wägli füre ufs Bänkli go luege. Ghört hämmers denn no es paar mal und au Taschelampe gseh umefuchtle. D'Joanne hett gmeint es segi en Elefant. Villicht hett er d'Herde gsuecht, hett es Baby becho oder isch am sterbe gsi. Mir sind denn wieder ine, und hend ghofft, dass d'Ranger scho zum rächtä lueged.
    Für hüt hämmer keis Programm gah und hend ufem Gländ vom Camp en Spaziergang gmacht. Isch also scho choge heiss gsi a de Sunne. Uf eimal simmer bim Restaurant vorne gsi...so hemmer halt öppis trunke. D'Frau vom Service hett euis no kennt und gfröged, ob mir en Dom Pedro wend! :-) Am Morge am 10i! Wasser und Cola hett glanged. So hämmer ächli uf de Fluss abe glueged, Elefante und Nilpferd gseh und d'Rueh gnosse mitem Vogelgezwitscher. Ach herrjeeee...e Bescherig wo mir heicho sind! Churz bevor mir gange sind, hend sich Vervet Äffli Sitzplatz umeglueged...die hend genau gspührt, dass mir gönd und sind ibroche. Ich ha mis Fenschter bitzeli offe gha. Det hetts zwar scho es Moskitonetz, aber das hends ufgrisse und grad no uf d’Fenschtersims gsch…zum Glück dusse. Sie sind über mis Chüssi übers Bett ab i d'Chuchi! S'Resultat...es kaputts Glas, 2 agfressni Tomate, Brot usenand gno, Nüsslipackige klaut! Isch also nid schön, wenn zersch musch es Puff ufruume, wo nid mal selber gmacht hesch. Joanne hett das am Bsitzer grad gmelded...ich bin ja bi de Mobiliar! ;-) Er het denn gmeint, er übernämi die Chöschte, will die Äffli grad im Moment sehr agressiv segid und mir kei Schuld trägid.
    Ich han mich denn mal a mini Kofferpacket gmacht...chunt glaub guet! Reschte verwertet für de Zmittag und denn sind Joanne und ich nochli an Pool füre. En churze Schwumm und nochli Ligge.
    Hüt Abig hemmer no en schöne Abschluss. Mir gönd im Restaurant vorne go ässä…verusse mit Buffet…16 Franke pro Person! Bin glaub schockiert, wenn ich i de Schwiiz wieder gah go poschte! …und wege de Temperature grad au!    もっと詳しく

    翻訳をご覧ください
  • 2026© FindPenguins
  • ホーム
  • 当社について
  • グループ追跡
  • プレス
  • 規約
  • プライバシー & Cookies
  • ヘルプセンター
  • 印象