Tag 103 & 104: Queenstown

S'Wätter esch perfekt for en Tag ofem Bike gsi: Räge am Vorobig ond agnähmi Temperature am 24. Januar. Hemmer a dem Friitig also vel Glöck gha.
Mer hend vorgängig bimene Bikeshop Bikes för üs reserviert: Es Downhillbike vo Mondraker för d'Jasi ond es Trailbike vo Forbidden före Dani. Trek hends leider ned gha ;) För beid eschs es erschts Mol gsi: D'Jasi esch no nie ofemene Bike met so vel ond de Dani no nie of eim met so wenig Fäderwäg gsi. Au d'29 Zoll-Reife send öppis Neus gsi.
Pönktlech of de Start vo de Gondelbahn semmer med üsne Bikes bi de Station gsi ond hend üs a Start vo de Trails befördere loh, währed mer d'Sicht of Queenstown ond Omgäbig vo obe hend chönne gnüsse.
Noch drü Abfahrte esch au scho Mettag gsi - ond mer hend en Pause chönne bruuche. Nochem Onterbroch semmer no wiiteri 3 Mol gmeinsam gfahre, bis de Jasi d'Händ so weh toh hend, dass sie hätt chönne schwöre, sech Mikrofrakture i de Mettelhand zuezoge z'ha. Hed sie natürlech ned, aber gliich - de ganzi Fäderwäg esch ned gnueg gsi of dene Trails. De Dani esch no zwoi wiiteri Mol gange, hed aber met sim chorze Fäderwäg d'Brämsrille bsonders guet z'gspöre becho ond sini Händ am Ändi chuum no am Länker chönne hebe. De hed au är mösse ufgäh.
Obwohl mer beid vorsechtig onterwägs gsi send, mer wennd üs jo of üsere Reis ned verletze, hemmers gschafft, üs jewiils eis Mol änezlegge. Abgseh vonere höbsche Schörfwonde bem Dani esch aber zom Glöck nüüt passiert. Trotzdem duet üs noch dem Tag alles weh,
Frei nochem Yilmaz Z. selig: Alles duets üs weh.
Noch de sportleche Aktivität hemmer üs no of d'Suechi nocheme warme Pulli för d'Jasi gmacht, wils in Queenstown relativ vel Outdoor-Gschäft ged. Mer hend scho mol paar Idee gsammlet ond bi üsem letschte Stopp no en "Evakuierig" meterläbt: "Evacuate this building. Go to the closest exit."
Anschiinend hed de Elektronik-Lade näbedra en Rauchmaschine nömm wörklech im Griff gha ond de Alarm esch usglöst worde. Samt Füürwehriisatz.
Zom z'Nacht heds Älplermagrone gäh :) Trotz Schmärze en tolle Tag.

Am nöchschte Tag semmer ganz muetig gsi, mer hend nämlech kei Wecker gstellt! Vel brocht heds ned, d'Sonne ond spelendi Chend hend üs denn am Morge gweckt.
Wiit hemmer a dem Vormettag ned müesse, mer send nämlech i Kiwi Park, wo sech diräkt näbem Camping ond de Bahn befendet. I dere Iirechtig wärdid bedrohti neuseeländischi Tierarte zöchtet, ufzoge ond spöter, wenns gross ond starch gnueg send, i d'Natur freigloh.
Die erscht halb Stond hemmer üs vo Gheg zo Gheg g'arbeitet ond debii Keas, Kākās, Kāreareas oder au Rurus chönne beobachte. Denn hed s'Kiwi-Huus för 30 Minute ufgmacht ond mer hend die sehr onterhaltsame nachtaktive flogonfähige Vögel imene Dunkelruum dörfe beobachte. Einigi send of de Suechi noch Nahrig sehr aktiv gsi. Ergendwenn heds üs denn z'vel (ond leider au z'luuti) Mönsche i dem Huus gha, ond mer send wiiter gange.
Währed de nöchschte halb Stond esch de Parcours fortgsetzt worde, bis mer pönktlech of d'Conservation Show weder bim Iigang gsi ond die Uffüehrig gluegt hend.
D'Siria hed üs vel zo de iiheimische Tierarte verzellt ond au, was iigfüehrti Tierarte wie z.B. Opossums förne Schade i de lokale Tier- ond Pflanzewält aarechtet ond esch be de Beschriibig vo de Bekämpfingsmassnahme au sehr ehrlech gsi. Als Zueschauer semmer sogar dezue ermuetiget worde, Produkt us Opossumfäli (Finke send sehr beliebt!) z'chaufe. Noch dere lehrriiche ond chorzwiilige Show hemmer no die räschtleche Gheg agluegt, nämlech das met de Kererū, anere riesige Tuubeart, ond au d'Tuatara semmer no vo nöchem go aluege. D'Siria hed metere bsondere Begeischterig vo dene Tier verzellt, sends doch trotz de össerleche Ähnlechkeit ned nöch met de Echse verwandt ond stelled e ganz eigeti Groppe im Stammbaum vo de Reptilie dar.
Langsam hongrig hemmer üsi gestrig Suechi nochemene warme Pulli erfolgriich abgschlosse ond hend üs ofs Ramenrestaurant gfreut, wo mer usgsuecht hend.
Am Nomittag hemmer üs weder im Mountainbike gwidmet, dasmol semmer aber ned sälber in Aktion gsi, sondern mer send en Alass go bsueche. Währed üsem Bsuech in Queenstown hed s'jöhrleche McGazza Fest stattgfonde, wo im Adänke a verstorbnig neuseeländisch Bike-Profi Kelly "McGazza" McGarry gwidmet esch. Öber drüü Täg fended verschednigi Events statt, wo mer cha go luege ond bi einige au sälber metmache.
Mer hend üs drom zom Dream Track, en Mountainbike Strecki, ufgmacht, wo s'Highlight vo dem Festival, de Dream Jam, stattgfonde hed. Mer send extra früeh los, om üs en guete Platz z'sichere. De Wäg, wo mer üs usegsuecht hend, esch an sich scho e halbi Wanderig gsi. Verschwitzt dobe acho hemmer festgstellt, dass mer be wiitem ned die einzige met dere Idee gsi send.
Währed 4 Stond hemmer zerscht de Juniore (Dreikäsehochs wo freihändig öber 4 Meter höhchi Jumps sprenged 🙈) ond denn de Erwachsne zuegluegt, wie sie dä Kurs met waghalsige Tricks ond gemeine Störz gmeischteret oder äbe ned gmeischteret hend. Wie emmer a so Aläss esch au do fliissig Bier tronke worde ond obwohl d'Kiwis gärn kaloriereduzierts Bier trenked, en tüüfere Alkoholghalt hed das definitiv ned... Nochem Alass semmer met de Mängi ofeme sehr vel eifachere Wäg weder zrogg i d'Stadt/ofe Camping ond hend üs en gmüetleche Obig gmacht.Read more