114: Takaka

Wels üs geschter bem Wharariki Beach so gfalle hed, hemmer hött grad nomol welle goh. Vo de Bsetzerin vom Camping hemmer no de Tipp becho, zom Cape Farewell z'goh, det seig d'Ussecht au sehr schön. "Werom ned grad det es Picknick mache?" hemmer üs gseid - gesagt, getan ond so semmer met üsem met Brot, Butter, Konfi, Chääs ond Dechi bepackte Rocksack zo dem Ussechtsponkt. Dä hed üs aber gar ned begeischteret, drom hemmer üs dezue entschlosse, d'Suechi nochem perfekte Picknickspot fortzsetze. Nochem Erklimme vo zwoi steile Häng hemmer ne de schliesslech gfonde: Ganz elei ond met super Ussecht.
Nochem z'Morge semmer nomol a Wharariki Beach, wo mer dämol s'andere Ändi vom Strand erkondet hend. Met en Grond för die usführlech Erkondigstour am Strand esch d'Suechi nochem Walkadaver gsi, wo es Scheld am Afang vom Strand druf hiiwiist. Met de zuesätzleche Info, dass d'Flössigkeite vo dem Kadaver gsondheitsschädigend chönd sii. Aha. Mer Katastrophetourischte hend üs vo üsne Nase leite loh ond noch zwoi Fähliischätzige bezöglech Rechtig vo wo de Groch chond, hemmer ne de gfonde. Dä esch düütlech stärcher verwest gsi als dä vom Vortag, aber ned weniger interessant.
Noch dem Fond hemmer üs vo Pūponga verabschiedet ond send weder i Süde gfahre, quasi as andere Ändi vo de Golden Bay. Üsi hötige Stopps send ganz im Zeiche vo Wasser gsi: Zerscht de Wharariki Strand, spöter de Takaka River, dezwösche d'Te Waikoropupu Springs.
Das send verschedeni Quelle, wo zäme die gröscht Süesswasserquelle in ganz Neuseeland bildet. Was aber no cooler esch: S'Wasser esch so klar, dass mer onder Wasser ca. 63m wiit cha gseh! Im destillierte Wasser gseht mer ca. 80m wiit. Ofem Rondgang semmer ständig vom Zikadegsang begleitet worde. Obwohl mer die luute Grüüsch scho beschtens us Südoschtasie könned, hemmer d'Urheber defo no nie gsechtet - bes jetz. Met ehrem Moschter sends eigentlech no schöni Insekte ond hends verdient, einigi MB vo üsere Speichercharte in Asproch z'näh.
Wiiter semmer nochhär no zom Paines Ford, en beliebte Badeplatz am Takaka River. Bes mer det de Iistieg gfonde gha hend, esch es e Momänt gange, nochhär esch es aber schön gsi zom Bade. Paar send det amene Schwingseil is Wasser gompet, mer hend ehne zuegluegt.
Üse Stellplatz esch för de höttig Tag ofeme Pferdehof gsi, wo üs a dem Obig es Meischterstöck i de Saucezuebereitigskonscht glonge esch: Auberginerahmsauce met Fiige. 👌 Öb mer die ächt je weder so äne bechömed?Baca lagi