118 & 119: Elaine Bay & Kaikoura

Tag 2 i de Elaine Bay semmer am achti go wandere. D'Elaine Bay esch en sogenannte Sound, d.h. en Fjord, wo aber dörne Floss entstande esch. Ächti Fjorde wärded dör Gletscher beldet, wie de Milford Sound, wo korrekterwiis eigentlech Milford Fjord heisse sött.
Mer hend of gueti Ussicht of de Sound ghofft, send stattdesse aber mehrheitlech im Wald gloffe. Noch 3/4 vom Wäg hemmer, trotz gueter Gspröch, kei Loscht meh gha ond send zrog.
En wiitere Grond, wieso mer zrog send, esch, wil mer no bis Kaikoura müesse hend. Det hemmer före nöchscht Tag öbis buecht.
Am Afang eschs de gliich Wäg zrog gange. Mer hend üs vonere högelige Stross öber Wiigebiet ufgmacht ine Region med vertröchnete Högel ond denn ad Köschte. Ach du wonderschöns Neuseeland 😍
Diräkt a de Köschte hend sech riesigi Wälle broche ond de Dani hed grossi Begeischterig a Bäum med wiisse Blätter zeigt.
Guet gluunt hemmer üs in Kaikoura is Camping med de schlächtischte Bewärtig begä ond üs sälber devo öberzügt: Jede cm² werd usgenötzt, es esch quasi en begrüente Parkplatz, sogar d'Trennlinie send dütlech kennzeichnet gsi. Gmüetlech gohd andersch. Positiv: kei Sandflies.
Vo de beängte Verhältnis hemmer üs aber ned störe loh ond hend vorem z'Nacht no chli g'aperölet, üs met em Hond vo de Nochbere agfröndet (50 % vo üs) ond no de Dani verarztet.

De Tag druf hed de Dani glii müesse ufstoh. För sini Whale Watching Tour hed er nämlech scho am 07:15 mösse bem Träffponkt sii. D'Jasi hed ehre Morge chli gmüetlecher chönne agoh, sie hed erscht am 10ni mösse parat sii. De Grond för üsi Eleigäng esch ned öppe s'Bedörfnis noch Abstand vom andere, sondern eifach, dass mer spot dra gsi send met de Ticketbuechig ond das no die einzige verfüegbare Plätz gsi send. Während de Dani de Pottwale, Hector- ond Dusky Delfine ond Albatrosse zuegluegt hed, hed d'Jasi s'Auto weder met Fröschwasser versorgt, bzw. de Grauwassertank gläärt. Debii hed sie sech chli ongscheckt agstellt ond sech Grauwasser öber d'Schueh gläärt. Drüü Täg alts Spüelwasser met Zahpastaspöitz 🤢
Noch dem Missgscheck hed sie s'Auto ofe Parkplatz vom Whale Watching-Ondernähme gstellt, wo am 10ni en flüügende Wächsel stattgfonde hed. Während also d'Jasi am Pott- ond Blauwale beobachte gsi esch, esch de Dani go Läbensmittel ond Bier iichaufe, denn a Strand go läse. Das esch mol es effiziänts Ziitmanagement!
Weder vereint hemmer nor no mösse tanke ond send parat gsi zom goh. D'Jasi esch chli truurig gsi, dass sie kei Delfine gseh hed of ehrere Tour. De Dani hed vo sinere Tour här gwösst, dass die sech womöglech wiiter südlech chönnted ufhalte. Sie sel of de Fahrt nor chli ofs Meer useluege ond allefalls Usschau nochere grössere Azahl parkierte Campervans ond Mönsche halte, die gsähchemer de scho no. Ond tatsächlech esch e Groppe Dusky Delfine vo de Stross us sechtbar gsi! Glöcklecherwiis heds grad en Uswiichstell gha det ond mer hend chönne usstiige ond dene Tier zueluege. Die Uswiichstell hed sech innert Minute so sehr gföllt gha, dass mer röckbleckend eifach of Google Maps hätt chönne luege, wos öppis Interessants (= Delfine) z'gseh get. Det heds nämlech tatsächlech en Stau a dere Stell azeigt.
Bald hed üs üse Wäg is Landesinneri, ond somit de Schlächtwätterfront entgäge, gfüehrt.
Mer hend am nöchschte Tag welle de Mt. Sunday, de meischte besser bekannt als Edoras us Herr der Ringe, bsueche. Danke au do a Maurice för de Tipp. Wel dä Högel aber chli wiiter wäg esch, hemmer hött so nöch wie möglech welle äne fahre, demets am nöchschte Tag nömm so wiit esch. Noch vier Stonde fahrt, inkl. 1x verpasster Abzwiigig, hemmer üse Camper ändlech chönne ofeme Picknickplatz abstelle. Näb üs send no 7 anderi Fahrzüüg det gsi. Dass mer üsi Nochbere de ganz Obig nie gseh hend, zeigt ganz guet, wie s'Wätter so gsi esch.Читать далее