Tag 120&121: Mt. Sunday & Somers, Rakaia

Wie scho erwähnt, esch üses primäre Ziel de Mt. Sunday gsi. Be entsprächendem Wätter hed mer of dem chliine Bärg e wonderbari Secht of die omgäbendi Äbeni ond d'Bärge ringsome. S'Wätter hed leider ned sehr velversprächend usgseh, aber mer send natürlech trotzdem ufe. S'esch gar ned so eifach gsi, sech Edoras usem Felm vor Ort vorz'stelle.
Betzeli enttüüscht semmer zrogg zom Auto ond hend mol z'nüüni gnoh ond üs öberleid, was mer als nöchschts chönnted mache. Wel d'Näbeldecki relativ tüüf gsi esch, esch de Entschloss zonere wiitere Wanderig gfalle, i de Hoffnig, öbere Näbel z'cho ond a dem Tag gliich no chli Sonne z'gseh.
De Mt. Potts Easement Track hed d'Bezeichnig Wanderwäg gar ned verdient, esch er doch eifach e Chiesstross gsi, wo offiziell noch 1,5 km ufghört hed. De Näbel esch aber no wiit wäg gsi, de semmer halt wiiter gloffe. Noch ca. 450 hm hemmer denn ändlech d'Sonne gseh. Gliichziitig esch au e chliini Hötte sechtbar worde, wo mer als Ziel bestomme hend. 550 hm spöter semmer be de Erewhon-Hötte acho, leider esch sie abgschlosse gsi. Obwohl mer vom Latrinehüsli us scho e schöni Secht is Tal gha hed, hed de Dani no wiiter welle. Also hemmer nomol 300, bzw. 360 hm gmacht ond send ufe oberhalb vo de Hötte glägni Sattel, bzw. (of nztopomap.co.nz) namelosi Gipfel. Zom Glöck hemmer ned be de Latrine gchehrt gha, wel was mer vo det obe gseh hend, esch wörklech spektakulär gsi.
De Röckwäg vom chorzerhand vo üs benannte Crumbly Saddle ond 4/7-Peak zo de Hötte esch dank rötschender Fortbewegig ofem lose Chies düütlech eifacher gsi als de Ufewäg.
Grad wo mer bem Auto acho send, heds afo räge. Super timing. Vomene erneute Bsuech ofem Mount Sunday, wils zwöscheziitlich uftoh hed, hemmer drom abgseh.
Üses Nachtlager hemmer welle in Lake Clearwater ufstelle, e chliini Ortschaft 17 km entfärnt. Tönt noch ned so vel met em Auto, of dere Stross aber... met liecht öberhöhter Gschwendigkeit hemmer die Holperpischte aber gmeischteret ond s'Auto bemene Plätzli i de Nöchi vom See änegstellt. Üsi Kanischter-Duschi esch be de chalte Temperature ehnder chorz usgfalle, hed aber gliich guet toh.

Am nöchschte Tag hemmer no welle im Gebiet vo Mt. Somers öppis mache. Üsi Schue send vom Vortag emmer no nass gsi ond s'aktuelle rägnerische Wätter hed au ned grad dezue biitreid, üsi Motivation z'hebe. Aber de Wanderwäg zo de Blackburn Mine hed met historische Öberbliibsel us Chohlebärgbauziite ond anere relativ chorze Wanderziit interessant gnueg tönt.
Glii scho hemmer näbem Wäg es ramponierts Wägeli met Schieneräschte gfonde ond wiiter vore hed üs en Tafele öber die grosse, vier Tonne schwäre Transportwäge informiert. De Ufstieg zo de Mine esch chorz ond schmärzlos gsi, dobe hemmer üs no be Nieselräge chli die verschedene Relikt agluegt, bevor mer de Sidewinder Track zrogg gnoh hend. En Erklärig för die uffallende, met schwarz-samtige Pilz befallne Baumstämm, em süessleche Groch ond de vele Wäspi det hemmer noni gha. Das Wäspi, wo de Dani i Chopf gstoche hed, heds üs au ned welle verrote. Zrogg bem Auto, wo mer weder Empfang gha hed, hemmer usegfonde, dass Schildlüüs d'Ursach send.
Am Obig hemmer in Rakaia en Platz ofeme Camping gha. Bem Iichecke hemmer de Norbert ond d'Hildegard us Östriich könneglehrt. Die bede send erscht grad vo de Nordinsle cho ond send froh gsi, wo mer ehne spöter am Obig be Bier ond Wii paar Tipps gäh hend. Nochem z'Nacht hättemer eigentlech no welle s'Auto potze, send aber met Norbert & Hildegard so lang verhocket, dass mer s'Potze ofe nöchschti Morge verschobe hend. Hed so gstomme för üs.Lue lisää