Tag 137 & 138: Buenos Aires

Mer send zwor nor zwoi Woche do gsi, aber trotzdem chond scho langsam chli Wehmuet uf. Am Donnschtignomittag esch de erneut "Spanish in the City" agseid gsi, was aber gschiider "Spanish in the Museum" heisse sött, wel jo, es esch au dasmol ines Museum gange. Im Museo Nacional de Arte Decorativo semmer mol weder met em Uftrag üs Gedanke zomene Wärch z'mache, omenand gloffe.
Nochem Museum semmer nomol of San Telmo zom eifach no chli i dem Quartier omeschlendere ond au chli i de Hoffnig, det no paarne bem Tango tanze chönne zuezluege.
Obwohl mer mehrmals am Plaza Dorrego verbii gloffe send, hed niemer welle för üs tanze. Deför hemmer s'Ändi vomene Polizeiiisatz metbecho, was ämu au chli öppis z'gseh gäh hed.
Nocheme Apèro semmer weder hei, wo mer met üsne Homestayfamiliene no es letschts mol z'Nacht gässe hend.

De nöchschti Tag hed ändlech de scho set Tage agseiti Räge brocht. Ond usgrächnet hött hed sech d'Roxana en Outdoor-Spanischlektion usdänkt! Set zwoi Täg beschäftigemer üs im Onderrecht met Chleider, ehrne Farbe ond Moschter ond wevel as sie choschtet (för de Dani scho vel z'lang). Jetz hättemer das Glehrte sölle im ächte Läbe awände ond in 3er Groppene i Läde goh ond so tue, als wördemer öppis welle chaufe, debii noch Grössene, anderne Farbe ond em Priis froge. Mer hends als sehr onagnähmi Ufgab empfonde ond praktisch kei Groppe hed d'Ufgab zo de Z'fredeheit vo de Roxana usgfüehrt.
Am Mettag hemmer noch Hin- ond Här bezöglech Restaurant ond aschliessendem lange Warte ofs Ässe no Stress gha, wel mer de Julieta es Abschiedsgschänk in Form vomene Chueche hend welle metbrenge. Wo mer denn met paar Minute Verspötig is Schuelzemmer cho send, hemmer erfahre, dass d'Julieta gar ned ome esch a dem Tag. Obwohl ehri Verträtig, d'Cecilia, au e Nätti gsi esch, hemmer ehre de Chueche ned welle gäh ond hend ne stattdesse nochem Onderrecht sälber gässe (zäme met em Janko ond de Melissa).
För am Obig hemmer no met em Janko, de Melissa ond de Audrey zom z'Nacht abgmacht. D'Melissa hed de aber offebar es usfüehrlechs Onlinedate met ehrem Frönd gha ond esch gar nömme cho. So hemmer halt z'drette erfolglos probiert, zwoi riesigi Stöck Fleisch fertig z'ässe ond dezue no em Dani met sinere Tortilla ond Papas fritas gholfe. Emmerhin hemmer de bstellti Wii möge fertig trenke (total 4 Fläschene)...
Zom Abschloss hemmer no e lokali Spezialität bstellt: Fernet con coca. Ond jo, es esch so gruusig wies tönt. Noch dem tolle ond loschtige Obig hemmer desne mösse "Adiós" säge ond send hei.Читать далее