Tag 134 - 136: Buenos Aires

Zwoiti Schuelwoche. Noch Onklarheite bezöglech Schuelzemmer semmer de be de Roxana im rechtige glandet. Mer send sächs us de alte Klass gsi, nohdisnoh send no füüf dezue cho. D'Roxana esch sehr en Ufgstellti, hed aber en andere Lehrstil als de Carlos, was chli Omgwöhnig bruucht.
Am Nomittag hemmer weder die altbekannti Julieta met ehrere starche Stemm gha. Wo mer vorere Woche afgange hend, semmer zemmli planlos i ehrem Onderrecht ghocket, wel mer scho chli Müeh gha hend, sie z'verstoh. Jetz eschs aber scho vel besser gange. Omso meh hemmer chönne met em Matthew metfühle, wo am Nomittag i üsi Klass gsteckt worde esch: Mer füüf, wo scho 30, bzw. 20 Stond Spanischonderrecht gha hend ond au de Julieta ehri Art scho könnt hend ond är, wo schiinbar am Morge zom allererschte Mol Spanisch i sim Läbe ghört hed ond ned mol d'Frog noch sim Name verstande hed. Lehrerin ond Schüeler send beid chli verzwiiflet gsi. Är hed de Nomi no tapfer döreghalte, gseh hemmer ne aber nömme im Onderrecht.

Am nöchschte Tag heds es chliises Drama gäh: D'Smadar, e Schüelerin wo chli Müeh hed em Stoff z'folge, hed a dem Morge ändgöltig de Fade verlore, wohl au, wel d'Roxana im Vergliich zom Carlos chli chaotisch esch ond üs lieber öber Ricky Martin, Shakira ond die onderschedleche Landeschochene verzellt als Ziit in klari ond strukturierti Erklärige z'stecke. För d'Smadar esch das offesechtlech z'vel gsi ond sie esch z'Metzt im Onderrecht usegloffe. Sie esch zwor nochhär weder cho, aber zuelose oder metmache dued sie jetz nömme.
Nochem z'Mettag met em Jakob ond Janko hed de Dani i d'Rondi gfrogt, öb öpper es Buech empfähle chönnt. De Janko hed verneint, är lesi privat fascht nie. De Jakob hingäge hed gmeint "Die Schule der magischen Tiere" heig ehm no gfalle. Mer hend wohl chli skeptisch reagiert, är hed de liecht zroggchräbsend no ergänzt, dass är das Buech aber vor sächs Johr oder so gläse heig. Wenn das en 19-Jöhrige seid, weisch, dass dä Buechtipp wohrschiinlech ned so wärtvoll esch. Paar Täg spöter hemmer das Buech googlet ond hend chli mösse lache. S'esch wörklech es Buech för ehnder jöngeri Läser...
Am Nomittag semmer mol weder ines Museum, dämol is Museo Nacional de Bellas Artes. Wedermol semmer eifach chli planlos dör s'Museum gloffe ond wedermol hemmer üs mösse es Beld zom Beschriibe ussueche. Während d'Jasi noch offiziellem Schuelschloss no chli im Museom blobe esch, hed sech de Dani noch Parque Patricios ufgmacht, om im Stadion es Huracánliibli z'chaufe.
Osserdem hend em Dani sini Gaschteltere zom z'Nacht iiglade ond so hemmer de Obig dete verbrocht.

De Mi esch schnell verzellt, wel de Schueltag relativ unspektakulär gsi esch. D'Smadar esch zwor ome gsi, aber nor physisch. Am Obig esch d'Iiladig förs z'Nacht omgchehrt worde ond de Dani esch be de Jasi ond Gaschtmuetter & -tochter iiglade gsi. Dank de Dolmetscherfähigkeite vo de Angeles esch de Sprächateil vo de Awäsende gliichmässiger verteilt gsi a als am Di.Baca selengkapnya