Tag 143 & 144: Puerto Natales

Före hötig Tag esch weder Busfahre agseid gsi, wel mer för die mehrtägig Wanderig im Torres del Paine Nationalpark of Puerto Natales hend mösse. Puerto Natales liid chli wiiter südlech in Chile ond wels be de Ticketbuechig före Bus chli es Problem gäh hed, esch de Dani ned of de Passagierlischte ufgfüehrt gsi, d'Jasi deför zwoi mol. In Bezog ofe Gränzöbertrett hed üs das chli närvös gmacht, aber das hed de gar niemer interessiert.
Landschaftlech gsehts in PN ähnlech us wie in El Calafate, es hed vellecht chli weniger Hönd do ond d'Infrastruktur wörkt pflegter.
De Name vo üsere Onterkonft esch of Maps ned ufgfüert gsi ond i de entsprächende Stross heds nieneds noch Hostel usgseh, was dezue gfüehrt hed, dass mer of de Suechi omenand girrt send, üsi Öbernachtigsmöglechkeit denn schliesslech aber doch no gfonde hend.
D'Ufgabe vom Räscht vom Tag send gsi: Bargäld organisiere ond iichaufe. Mer schlaue Föchs hend welle Gebühre spare ond hend üs via Western Union sälber Gäld zuegscheckt (wedermol en Trick 77). Wo mer das aber hend welle go abhole, hed üs Google anes Gebäude änegfüehrt, wo össerlech nüüt ofene WU Filiale hiigwese hed. En Iiheimische esch secher gsi, är heig vorere Woche no s'WU-Scheld osse am Gebäude gseh. Jetz esch das Scheld aber wäg gsi, kei Infos, wo mer stattdesse äne chönnt goh, nada... Mer hend de no es Lädeli gfonde, wo au WU-Dienscht abietet, leider hed die nätt Frau ned gnueg Gäld gha, wo sie üs hätt chönne uszahle. Sie hed üs ehres Instagram agäh ond gmeint, mer söled morn schriibe ond nochefroge, wies usgsähch. So semmer also ohni Bargäld go iichaufe ond send erliechteret gsi, wo die balgäldlos Zahlig klappet hed.

Am nöchschte Tag hemmer is DT Loft gwächslet. Üsi viertägig Tour hemmer öberne Plattform buechet (wo de ganzi Buechigsprozess söll vereifache, mer hends emmer no sehr müehsam, kompliziert ond onöbersechtlech gfonde). D'Onderkonft vor ond noch de Wanderig hed mer au grad no det chönne bueche. Dass es gönschtigeri Alternative als das 155 USD pro Nacht tüüre Hotel gäh hät, hemmer leider z'spot gmerkt. Nochem Iichecke hemmer för die nöchschte Täg iigchauft ond hend vo de Frau Western Union d'Nochrecht becho, dass sie häb-chläb gnueg Gäld för üs hätt, mer aber grad of die drüü seled verbii cho, demet niemer vor üs Gäld abholt. Wo mer de ändlech die 309'000 Pesos i de Hand gha hend (sie hed 310'000 gha), semmer sehr froh gsi!
Of de Suechi noch ere chliine Gaskartusche ond emene Tassli för d'Jasi hemmer diversi Shops abklapperet bes de Dani kei Gedold meh gha hed, de semmer zrogg is Hotel go ässe. Nochhär hemmer (of Drock vom Dani 😁) no öppis gfonde imene Outdoorshop vis-à-vis, för d'Jasi heds au no es Red Velvet-Cupcake zom Dessert gäh (ned usem Outdoorshop).Meer informatie