Tag 145 & 146: Torres del Paine NP

"Ech packe min Rocksack för of Patagonie ond nehme met... Gäld"
Was üs scho veli gseid hend ond mer aber ned so rächt hend welle glaube, hemmer i de letschte Täg scho guet z'gschpöre becho. D'Eier send in Chile velecht ned so tüür, Usflög aber omso meh: För üsi viertägig Wanderig, wo mer im Nationalpark Torres del Paine buecht hend, hemmer pro Person 600 USD zahlt. Gsalzni Priise, die vier Täg send aber super schön gsi. Ond zwar esch es so gange:

De Bus, wo üs vo Puerto Natales of Pudeto im Nationalpark brocht hed, esch scho am 7:00 gfahre, drom hemmer de Wecker uf 05.20 gstellt, hend z'Morge gnoh ond send a Busbahnhof gloffe. Mer send ned die Einzige gsi, de Iistiigeprozess esch aber guet gange. Of de Fahrt hemmer emmer weder schöni Usbleck of die berüehmte Törm gha ond au s'Wätter hed sowiit guet usgseh.
Am Parkiigang denn aber de Schreckmomänt: Üses Ticket esch ned akzeptiert worde! Obwohl mer dä Trip öber die im letschte Biitrag erwähnti Plattform buecht hend, esch üs offebar nor e Quittig zuegstellt worde, ned aber s'rechtige Billett. Nochdem mer glaubhaft versecheret hend, dass mer nie öppis anders becho heiged ond au üsi Reservationsbestätigonge zeigt hend, hed die Kontrolleurin Verbarme gha met üs ond hed üs weder i Bus stiige loh, demet mer ofe Katamaran hend chönne. Das foht jo scho guet a... Wenigschtens esch de Katamaran heil öbere See cho ond hed üs grad bem erschte Zältplatz (Refugio Paine Grande) abgsetzt. Mer send vomene Guanaco begrüesst worde ond üsi Beförchtig, dass noch dem Drama am Parkiigang üsi öbertüürte Zältbuechige ergendwie verlore gange send, hed sech zom Glöck als onbegröndet usegstellt.
Wel d'Zält erscht ab em 14:30 hend chönne bezoge wärde, hemmer die grosse Rocksäck zrogg gloh ond send met liechtem Gepäck ofe Wäg zom Grey-Gletscher. Onderwägs semmer praktisch emmer zwösche Baumskelett onderwägs gsi ond hend spöter ofeme Scheld gläse, dass vom Dez 2011 bis Feb/März 2012 do en Waldbrand gwüetet hed - wel en Tourischt sis WC-Papier hed welle verbrönne...
Onderwägs hed mer emmer weder ofe See links vo üs gseh ond ergendwenn send denn au die erschte Iisbärge im Wasser sechtbar worde, wo of d'Nöchi vom Gletscher hiigwese hend. Plötzlech hed mer denn au de Gletscher gseh. Sehr iidröcklech, ähnlech wie de Perito Moreno Gletscher, wo mer no vor paar Täg gseh hend. Zrogg ofem Zältplatz heds e warmi Duschi ond aschliessend üses feine gfrüürtröchnete Campingässe gäh. Nochhär semmer is Zält. De Wind hed zemmli am Zält gröttlet, solang ers aber ned leid, sötts goh... I de Nacht sötts 3° chalt wärde.

Chalt hemmer i de Nacht ned gha ond au s'Zält hed ghebt. D'Jasi esch aber met schlemme Nackeschmärze verwachet ond hed sech gar ned of die bevorstehend Wanderig met em ca. 12 kg schwäre Rocksack gfreut. Vom Refugio Paine Grande zom Refugio Italiano sends knapp 9 km, det hemmer die grosse Rocksäck de weder deponiert ond send is Tal zom Mirador Britanico gwanderet. I de Hälfti hemmer vom Mirador Frances us en super Usbleck ofe Cerro Paine Grande gha ond hend sogar no en grössere Lawineabgang gseh. Mer send de gliichi Wäg zrogg ond hend üs weder die schwäre Rocksäck ufgschnallt. Zom Glöck eschs nömm so wiit zo üsem zwoite Nachtlager, em Refugio Frances, gsi. Mer hend üs scho druf gfreut, i üsem 210 USD tüüre Zält es Mätteli ond Chössi vorzfende, aber nei - mer hend nor "Simple Premium Tent" buechet. Üsi Schlofonderlag esch öppe 2cm deck gsi, s'Chössi hemmer us Chleider ond Schlofsackhölle baschtlet. Scho weder sone onbequemi Nacht 😩Leer más