Tag 158 & 159 : Melipeuco

Mer send wägem Conguillío Nationalpark of Melipeuco cho ond wenn emmer mer ine Nationalpark gönd, gets nor eis Programm: Wandere. De Luxus vonere Onderkonft grad bem Parkiigang hemmer nömme gha ond so wärdemer die nöchschte Täg ofe Javier agwese sii, wo üs jewiils i Park fahrt ond det weder abholt.
Am erschte Tag hemmer de Sierra Nevada Trail gmacht. De Vulkan Llaima hemmer jo am Vorobig scho us de Färni gseh, hött semmer nöcher äne cho. D'Stross zom Usgangsponkt vo de Wanderig hed üs öberne grösseri Flächi us pyroklastischem Material gfüehrt ond hed usgseh wiene Mondlandschaft. Passenderwiis, so heds üs de Javier verzellt, heisst die Landschaft au "Plano de la luna". Spöter, ofem Wanderwäg, hemmer emmer weder Abschnett gha, wo de Ondergrond merklech "vulkanisch" gsi esch onds sech so afgühlt hed, als wörd mer of schwarzem Chatzesand laufe. Speziell send för üs au d'Aurakarie gsi, e Baumart, wo v.a. i dere Region vorchond ond de Provinz au ehre Name gäh hed. Met ehrne schoppige Äscht gsähnds us als wördeds scho set johrmillione dostoh ond zäme met em Vulkan im Hendergrond hätts üs gar ned so öberrascht, wenn do plötzlech no en Dinosaurier is Beld gloffe wär. Stattdesse hemmer vel Eidechse ond au Spächte gseh, wobii mer die meh ghört als gseh hend.
Zom Abschloss semmer zo de Laguna Arcoiris gloffe (onderwägs semmer vomene Camper met Urner Kennzeiche öberholt worde), emene relativ "jonge" See wo entstande esch, nochdems bemene Vulkanusbroch zomene Lavadamm cho esch. S'Wasser vo dem Seeli esch so klar, dass es üs scho sehr greitzt hätt, det drii z'gompe. Esch aber leider prohibido.
Nochdem mer weder vom Javier abgholt ond hei brocht worde send, hemmer eifach no gchochet ond üs en gmüetleche Obig gmacht.

Of arote vom Javier hii semmer am nöchschte Tag nömme in Conguillío NP, sondern is südlecher glägne Naturschotzgebiet vo Sollipulli. En abentürlechi ond steili Zuefahrtsstross hed üs zom Start vom Wanderwäg brocht. Met üsem Peugeot wäremer (wohrschiinlech) ned bes zom Parkplatz cho (behauptet d'Jasi, de Dani esch vom "Offroad-Modus", wo mer zueschalte cha, öberzügt 😉).
Ofem Ufewäg semmer weder a velne Araukanie verbii cho ond hend d'Glägeheit grad gnötzt zom paar Chärne, "Piñones", sammle. Die chamer ässe ond mer hend üs drom dänkt, mer düeged üs derigi zom Apèro am Obig mache.
Wiiter obe esch s'Laufe im Vulkansand (Chatzestreu) rächt müehsam gsi, ofem Gipfel semmer denn aber metere wonderbare Ussecht ofe Krater ond de denne glägni Gletscher belohnt worde. Zom abe goh hemmer en andere Wäg gwählt ond hend debii e Riitergroppe gchrützt. Iidröcklech, was för Wäge mer ofemene Ross no begoh cha.
Fröhlech semmer also no is Tal gwanderet, verbii a zwoi Wasserfäll ond anere verroschtete Lok ond hend bem Parkplatz ofe Javier gwartet. Det semmer vom Parkranger druf ufmersam gmacht worde, dass mer illegalerwiis en Privatwäg gnoh hend zom abe laufe. Keis Schild oder Absperrig, wo eim z'verstoh gäh hätt, dass mer det ned abe döft. Wohär mer das hätted selle wösse, weiss ech au ned... Egal, em Ranger eschs sowieso gliich gsi ond vo dem Privatgrondstöck esch jo au niemer ome gsi, wo wär cho iikassiere. Die Tourischte weder...
Zrogg im Hüsli hed d'Jasi dankeme Rezäptvideo usegfonde, wie mer die Piñones zuebereitet ond öppe zwoi Stond spöter (die muess mer en Ewigkeit choche) hemmer üse exotische Apèro chönne probiere. Fazit: Fein, schmöcked ähnlech wie Marroni. Aber besser (Dani).Read more