Tag 155-157: BL, Puerto Montt, Melipeuco

Wedermol hed üs de höttig Tag en ÖV-Gschecht glieferet. Wo mer brav a de Bushaltestell ofs 50gi gwartet hend, wo üs a Usgangsponkt vo de Wanderig hätt sölle brenge, send grad drüü verschedni Büs gliichziitig cho, üse a zwoiter Stell. Zom do em Busfahrer signalisiere, dass mer iistiige wott, muess mer d'Hand use ha, de haltet de Bus a ond mer cha iistiige. De erschti Bus hed das Signal verstande, de dretti Bus au. Üse hed zwor abbrämst, wo denn aber eine, wo näbe üs gstande esch em Chauffeur azeigt hed, dass är ofe dretti Bus wett (was sini Metmönsche wend, esch ehm offebar gliich gsi), esch üse Bus wiiter gfahre, natürlech ohni üs. Mer drufabe verärgeret ond rotlos dogstande. De Chauffeur vom drette Bus hed das alles metbecho, üs zo sech gruefe ond gfrogt, wo mer de äne müessed. "Balcón Gutiérrez", hemmer gseid, denn hed er gmeint, mer söled iistiige. Ond denn hed en regelrächti Verfolgigsjagd agfange, wo üse "falschi" Bus am Ändi s'50gi öberholt gha ond üs a de nöchschte Haltestell usegloh hed, demet mer det ofe rechtig Bus hend chönne warte. Es grosses Dankeschön a dere Stell nomol a dä nätti Fahrer!
So hemmer wenig spöter die rond 24 km langi Wanderig zom Refugio Frey ond weder zrogg chönne agoh. De Wäg zo de Hötte sälber esch ned so spannend gsi, dobe hemmer nochere windige Mettagspause de chlii See no omrondet ond send weder zrogg. Weder hemmer de Bus verpasst, dämol, wel mer am falsche Ort ofne gwartet hend (20 Meter zwiit vore, de Chauffeur hed üs denn zverstoh gä, dass mer falsch seiged ond esch döregfahre). Zo üsere Verteidigong: Iiheimischi hend gseid, mer stienged do rechtig! Die hend de halt au ofe nöchscht mösse warte.
Am Obig semmer weder i die gliich Bar vom erschte Obig. D'Jasi hed denn zwor scho weder ned das becho, wo sie bstellt gha hed, de "Patagonia Flower" esch aber au guet gsi.

De nöchschti Tag esch weder chli en Reisetag gsi ond zwor semmer vo Bariloche öber d'Gränze noch Puerto Montt. D'Fahrt im nigelnageleue Reisecar (d'Folie of de Beldscherme esch noni mol wäg gsi) esch zwor agnähm gsi, wel mer aber ofgrond vonere Verwächslig vo drüü anstatt sächs Stond Reiseziit usgange send, esch üse Proviantbüütel ned so guet gföllt gsi. E Packig Chips am chilenische Gränzposchte hed üs aber vorem Verhongere bewahrt. Am Schloss sends natürlech ned pönktlech gsi ond us de sächs Stond Fahrt send am Ändi acht Stond worde, de Rögge vom Dani hed das ned so toll gfonde.
Ond in Puerto Montt hemmer no kei Onderkonft gha. Das esch bewosst gsi, wel mer hend üses Glöck welle spontan im Hostal Suizo probiere, wo vo de Rossy ond ehrem Maa, em Walter, gfüehrt werd. D'Rossy hed e wechtigi Rolle gspelt gha, wo vor 31 Johr em Dani sin Onkel ond Götti in Chile veronfallt esch. Bes hött esch sie met de Familie befröndet ond mer hend sie welle go bsueche. Wel sie de Hostelbetrieb reduziere wend, esch e Onlinebuechig ned möglech, die einzig Möglechkeit esch, sälber det verbii z'goh. Sie send zom Glöck ome gsi ond hend üs härzlech empfange. Mer send de grad zom Ässe iiglade worde ond nochdem mer guet Pisco-Sprite met ehne tronke hend, hed üs d'Rossy denn au no bimene Rondgang dörs Huus ehri zahlriiche Gmälde zeigt, wo sie als Könschtlerin gschaffe hed.

Nochere vel z'chorze Nacht semmer am 06:40 ufgstande ond hend met em Walter ond de Rossy z'Morge gässe, bevor die beide üs us ehrere riesige Gastfröndschaft entloh hend ond de Walter üs a Busbahnhof brocht hed. De Bus esch am achti los ond hed üs noch 4h 40' in Temuco abgsetzt. Im Dani sim Rögge eschs nochär ned besser gange. Det semmer vom Javier abgholt worde, üse Airbnb-Gastgäber. Of de Fahrt hed är äxtra langsam ond i eifache Wort met üs gredt, demet mer au chli öppis vo dem verstönd, was er so verzellt, was mer sehr z'schätze gwösst hend. Mer hend in Melipeuco es härzigs Hüsli chönne bezieh ond send am Obig no chli döre Ort gloffe. Förnes 10'000-Seele-Dorf esch do meh Läbe als erwartet, was schön esch.Weiterlesen