Tag 163 - 164: Santiago

De erscht rechtig Tag in Santiago hemmer met Sightseeing verbrocht, wobii mer i üsere Recherche gmerkt hend, dass Santiago ned wörklech vel Sehenswördigkeite hed. Am Plaza de Armas esch d'Kathedrale, die hemmer chorz bsuecht ond de semmer näbedra is Museo Histórico Nacional. Dank de Fotifunktion vo Google Translate hemmer wenigschtens chli öppis verstande, obwohl d'Öbersetzige inhaltlech ned emmer so verständlech gsi send. Leider deckt das Museum nor d'Ziit vom Onabhängigkeitskampf bes zo 1973 ab. Was vor de Spanier gsi esch oder was nochem dör d'USA herbigfüehrte Militärputsch vom Pinochet för Gräueltate vorgfalle send, hemmer im Museum ned erfahre.
Nochem Museumsbsuech semmer chli omegschlenderet, bes mer (also de Dani ;)) akut Honger becho hend ond dä üs ine Pizza- ond Empanada-Schoppe trebe hed. Gstärcht eschs denn ofe Cerro Santa Lucia gange, en iidröckleche Högel, fascht scho Bärg, z'metzt i de Stadt. Mer macht det schnell Höhemeter (z'Fuess) ond chond öber onzähligi Wägli ofe Gipfel, vo wo us mer en schöne Bleck öber d'Stadt hed.
Nochdem mer bem Regierigsgebäude la Moneda verbii send, semmer zrogg is Hostel förne Siesta. Nochhär hemmer no Wösch abgholt ond send de go ässe.

De zwoit komplett Tag in Santiago hed met plane gstartet. Gäg de Mettag semmer weder chli i de Stadt omegschlenderet, send öppis go ässe (d'Jasi hed en typische chilenische Algesalat gha. Die gliiche Alge gfendt mer in Neuseeland öberall am Strand) bevor mer en Abstächer i d'Nationalbibliothek gmacht ond üs de ofe Wäg ofe Cerro San Cristóbal, de höchscht natürlech Ussichtsponkt diräkt i de Stadt, gmacht hend. Med 300 Höhemeter esch er glich höch wie s'höchschte Gebäude vo de chilenische Hauptstadt.
Abe hemmer de Funicular gnoh, wel mer eigentlech no met de Javi, wo de Dani 2009 in Vancouver könne glernt hed, abgmacht hend. Imene Pub hemmer denn of sie gwartet, leider hed sech med de Ziit abzeichnet, dass das wohl nüd meh werd. Si hed diversi Problem z'löse gha (was si ned gschafft hed) ond mer send denn ohni es Träffe noch paar Bier ond emene halbe Liter ned bsonders feine Cocktail (Terremoto) retour i üses Hostel. Czytaj więcej