Tag 165 - 166: San Pedro, Tilcara

Üsi nöchscht Etappe widmet sech em Norde vo Chile ond Argentinie, also hemmer üs medem Flogzüg uf noch Calama gmacht, wo es Mietauto of üs gwartet hed. Omgekehrt hend au mer mösse warte, d'Schlange bim Autovermieter hed üs 45 Minute gchoschtet, denn hend mer no müesse of d'Papier för de Gränzöbertrett warte, denn erscht hemmer los chönne is 100km entfärnte San Pedro de Atacama. Det hemmer för ei Nacht üsi Zält ufgschlage. Üses Zemmer im Hostel esch ok gsi, de versprochnig "Parkplatz" aber esch zemmli knapp bemässe gsi ond s'Auto esch im Prinzip eifach im Innehof gstande, wos allne im Wäg gsi esch.
S'Dorf sälber gfallt üs guet, au wenns fascht usschliesslech vo Touris wie eus bevölkeret werd. In San Pedro gfend mer drom au zemli vel Restaurant, Pubs - ond Toureabieter. Vom letschte hed d'Jasi innerhalb vo öppe 5 Minute 26 Büros zählt.

För Tag zwoi i de trochnigschte Wüeschti of de Wält stohd vor allem Autofahre med glägentleche Stopps ofem Programm. Mer möched üs of de Wäg noch Argentinie, wo mer am 29. März d'Melissa vom Sprochufenthalt ond d'Rachel, e Fröndin vo de Melissa, träffed.
En erschte chorze Halt hemmer gmacht, zom de Vulkan Licancabur us de Färni betrachte. Wiiter esch es gange zom Mirador Quebrada Quepiaco. Wo mer ugsgstege send, esch üs zom erschte mol bewosst worde, dass mer do scho no höch obe send: D'Chipspackig chorz vorem Platze ond d'Chälti hed üsi Atemloft i chliini Wolche verwandlet. Das Füechtgebiet, wo zo dem Ziitponkt fascht ganz gfrore gsi esch, bietet i dere Trocheheit e gueti Wasser- ond Salzquelle för d'Tier. Chorz drufabe hemmer d'Offroadfähigkeite vo üsem Auto teschtet, indem mer die schön asphaltierti Stross verloh hend zom Monjes de la Pacana gnannti Felsformatione go aluege. En Allradatrieb hätts wohl ned wörklech bruucht, aber Secherheit geds eim scho. Wär blöd, det obe stecke z'bliibe... Nochdem mer chrüüz ond quer zwösche dene loschtige Süülene omegfahre send, semmer wiiter. D'Laguna de Tara hemmer scho vo de Monjes us gseh gha, vo Nöchem heds üs au guet gfalle. Das esch denn de letschti Halt in Chile gsi, wel nochhär esch d'Gränze cho. De Gränzöbertrett esch gwöss ned weniger spannend gsi als üsi bishärige Stopps, deför aber weniger entspannend. Mer hend üs zom Glöck anes anders Paar met Mietwage chönne hänke ond send rekordverdächtigi 40 Minute und 5 Stämpfel spöter scho in Argentinie gsi. Of Google schriibeds vo Warteziite vo 2h ond meh, anderi seiged det obe feschtghanget, wel sie Benzin bruucht hend ond d'Tankstell tagelang usgschosse gsi seig. Alles Problem, wo mer zom Glöck ned könned a dem Tag.
In Argentinie hed mer relativ glii e Veränderig vo de Landschaft chönne feschtschtelle, es esch emmer grüener worde. Vo grüen wächslets i de Salinas Grandes zo wiiss, anere riesige Salzflächi (schiinbar die drettgröscht of de Wält). Wel mer gwösst hend, dass mer met de Melissa ond Rachel nomol wärded do äne cho, hemmer nor ganz chorz aghalte. Es hed ämu glänget zom merke, dass mers ohni Sonnebrölle ned lang ushaltet det. Mimikfalten ahoi! Nochhär eschs durab gange, wobii mer of de Bärgstross schöni Usblech gha hend, leider aber au rächt vel Laschtwäge. Öberhole chamer ned öberall so guet, Schlaglöcher erschwäred d'Manöver zuesätzlech. In Purmamarca hemmer no en Halt gmacht zom de siebefarbig Bärg aluege, zom Ussechtsponkt semmer de aber ned. Noch dem lange Tag semmer e halb Stond spöter in Tilcara acho, wo mer üses härzige Hostelzemmer bezoge hend (inkl. rechtigem PP) ond super fein send go ässe. Do sends scho z'metzt i de Oschtervorbereitige ond mer hend anere Prozession chönne biiwohne.Lue lisää