Tag 22: Chugchilàn —> Quilotoa-Loop

Mir sind wieder möglichst früeh go Zmorge esse, dass mer denn würklich de ganzi Tag ziit hend für‘d Wanderig. Mir hend en unglaublich nice Zmorge becho mit ganz viel Frücht, 2 Pancakes und es Omlette. Mir hend wieder es Lunchpaket kauft und hend wieder genau gliich viel fürs Hostel zahlt wie gester. Genau am 8:15 simmer abgloffe. Mir sind nid die einzige gsi. Glii isch scho de ersti derbi Ufstiig cho. Mir und 2 anderi Gruppene hend üs immer wieder gegesiitig überhollt, wärend die andere völlig fertig am Wegrande gstande sind. Usser eh Gruppe vo Franzose wo sozege det duruf gseckled sind. Nachem erste Ufstiig isches wieder recht lang graduus gange und mir hend alli andere Gruppe abghenkt. Obwohl d‘Sunne wieder maximal abebrennt het und es immer stetig duruf und wieder durab isch hemmers nid als mega schlimm empfunde. Aber mir hend immer denkt, mir münd langsam laufe und üsi Chräft für de letzti happig Ufstiig ufspare. Aber ganz plötzlich, nach nur 4 Stund, simmer eifach det gsi. Völlig unerwartet isch de mächtig Karsee det gsi und d‘Ussicht isch überwältigend gsi. Mir hend Zmittag gesse und nah bis nah sind na die andere Gruppene dobe ahcho. Doch s‘Dörfli und de Bus wieder zrugg uf Latacunga sind nid ganz uf de andere Siite vom See gsi. Denn hemmer nomal 1 Stündli ah de Kliffe na müesse laufe, wo scho kriminell gsi isch. Im Dörfli hemmer üs den na es Gipfelbier bstellt und hend denn de Bus am 3 wieder zrugg gnoh. Zrugg ih üsem Hostel hemmer zersch eh wunderbari Duschi gnoh und hend üs denn uf de Weg gmacht zum im Städli neumeds go fein Znacht esse.Læs mere