Ab id Grossstadt La Paz

Natürlich simmer wie eh und jeh saufrüeh wach gsi. Mir hend denn im Hostel Zmorge gesse und sind mit Sack und Pack zu de Busstation gloffe und sind det ines Kaffi zum Ziit nachli totschlah. De Kaffi isch leider echt nid guet gsi und so hemmer trurig chli Bieberbandi gspielt. . Am 11i isch den euse Bus nach La Paz gfahre und ich chan sege, das isch echt de engsti Bus gsi, woni je gseh han. Wenni normal grad gsesse bin, hani mini Chnüü dem vor mir in Rugge grammt😅 drum simmer die ganz Fahrt wie en Chrüppel det ine ghockt😂 Zum Glück sinds nur 3.5 Stunde. Die sind aber in San Pedro am Titicacasee unterbroche worde. Mir hend nämlich alli müesse usstiige, damit sie de Bus uf sones, meh oder weniger stabils, Floss hend chöne verfrachte, mit dem sie denn über de Titicacasee gfahre sind. Mir hend miteme normale Boot chöne gah. Das Ganze het schochli kriminell usgseh, aber es hett zum Glück alles klapped. Gli simmer den ih dere Grossstadt ahcho. La Paz zieht sich über es riiise Tal und sogar die einte Felswänd sind wild verbaut worde. Je höcher obe d‘Hüüser stönd, desto ärmer wirds Viertel. So het sich es ganz neus Stadtdistrikt gründet: El Alto. Das isch mittlerwiile grösser als La Paz selber. Da aber ständig neui Backsteihüüsli am Rand entstönd isches schwär zum sege, wieviel Mensche det tatsächlich wohned. Da sich La Paz aber scho uf 3800 müM befindet, hett mer um d‘Bewohner chli z‘entlaste es gewaltigs Seilbahnsystem als ÖV baut. Mittlerwiile hets 11 Linie. Das ganze het mer au nur mit Hilf vonere östricherische Firma chöne finanziere. Wo mir mitem Bus den uf El Alto inegfahre sind het sich en gewaltige Blick ufdah. Im Tal une hemmer scho die moderne Hochhüser gseh und überall die verschiedene Telefericos 🚡. Jedi Linie het eh anderi Farb. De Bus het eus den ah irgend eh Strass usegrüehrt und mir hend es Taxi is Hostel gnah. Mir hend churz ihcheckt und sind den id Stadt gloffd. Zersch hemmer na ah üsem Bankomat des Vertrauens welle Geld uselah, aber de isch den tatsächlich abgstürzt und het de Jenny ihri Bankcharte nüm welle usegeh. Die Frau hinter eus isch zum Glück sehr herzig gsi und het eus us dere Situation gholfe. Nacher simmer chli umegloffe und hend eus versuecht chli en Überblick über die riiise Stadt z‘verschaffe. Go Znachtesse simmer im Carrot Tree, wo wieder voller Touris gsi isch, wo mir schomal gseh hend. S‘Esse isch ganz oke gsi und mir sind sogar no nach de 8i!!!! unterwegs gsi.Read more