Swasiland

Bim plane vu euser Route vu de Drakensberge zum Kruger NP isch eus ufgfalle, as da ganz i dr Nöchi das ominöse Swasiland lit. Scho so oft hemmer bi irgendwelchne Internet-Ameldige Swasiland statt Switzerland usgwählt, doch das defti sich bald ändere: hie hemmer erfahre, as de König vu Swasiland sis Rich zu sim 50. Geburtstag am 19. April 2018 churzum in eSwatini umtauft het.
Mer sind chli meh als 100km i dem Land gfahre, wo scho simpler als Südafrika isch. Im Süde, grad nach de Grenze, isches ganz dicht bewaldet - vil dichter und nu nid künstlich apflanzt wie in ZA. D Strasse sind det zwar teert, aber au mit vilne tiefe Schlaglöcher pflastered, darum het wohl au euses Navi kei Gschwindigkeitsbegrenzig meh agä :) ganz nachem Motto: "fahr so schnell wied dich trausch!"
D Hauptstadt Mbabane isch sehr witläufig und verstreut, es schint als gäbis keis richtigs Stadtzentum. Es isch sehr hüglig und grüen, nördlich vu dr Hauptstadt sind denn d Strasse besser, d Lüt uf de Ladeflächi vu de vollbeladne Pickups winked eim zue und singed voller Insbrunst.
Mer sind da die einzige Gäst ufenere abglegne Guest Farm, mit wunderbarer Ussicht, privater Köchin und Chüeli ufem Parkplatz!*Read more