Anuradhapura Pt.1

Anuradhapura isch zwar die 7. grösst Stadt in Sri Lanka, glicht aber meh amene Dorf und isch Znacht sehr ruhig gsi. Mier hend gmeint mer siged v.a. weg de Ruine in Anuradhapura...derbi hets unzähligi Sehenswürdigkeite und ghört zum UNESCO Weltkulturerbe. Da mer aber scho recht vil Tempel gseh hend, hemmer sSightseeing chli in Grenze ghalte.
Zerscht simmer zu einem vu de ältischte Bäum vu de Welt, en Bodhi Tree wo über 2'000 Jahr alt sell si. De Buddha het offebar immer under emene Bodhi Tree meditiert, vu dem Original Bodhi Tree hends denn Same in die ganz buddhistisch Welt verbreitet - und ebe au uf Anuradhapura. Der Baum isch zwar nu ganz grüen und gseht gsund us, wird aber trotzdem vu goldige Stütze treit.
Dernach simmer die grösst Stupa vu Sri Lanka ga aluege. Stupas sind wissi oder bruni Glocke-ähnlichi Gräber vu wichtige Persönlichkeite, wie Könige oder Senior Monks.
Last but not least simmer denn au nu en Teil vu de Ruine ga aluege, wo teilwis sehr ufwändig us Stei gmeisselt sind. Euses Kulturreisli hemmer mitere liecht emotionale Diskussion zu Tierrecht und artgrechte Haltig abgrundet...
Am Namittag simmer nu die letschte paar Kilometer and Westküste gfahre, uf Kalpitiya, womer etz die letscht Wuche mit Kiteboarde verbringed. Bim Znacht hemmer erfahre, as au de 6-fachi dütschi Kite-Meister da im Camp isch - somit hoffemer uf top Bedingige!

Hüt hemmer eus au messe vu eusem treue Fahrer Sanat verabschiede. Er het eus 10 Täg lang sehr sicher gfahre, vor Schlitzohre bewahrt, bezüglich Sehenswürdigkeite berate und isch immer für alles und jede Umweg zha gsi. Eis Wort uf Englisch het glanget, scho heter bremset: "you wanna go? you wanna stop?" Unvergesslich isch au sin Leitspruch gsi: "no problem Sri Lanka". Trotz sprachliche Differenze hemmer eus herrlich über Anti-Brumm, stuti (Danke) und niamai (perfekt) chenne erheitere.*Read more