Medical stuff & sightseeing Pt.1

Sit bi dr Martina vor ca. 3 Mönet Hashimoto Disease diagnostiziert worde isch, mues sie regelmässig ihri Schilddrüse Hormonwert ga überprüefe. Meh oder weniger de ganz hütig Morge hemmer somit im private (& türe) Raffles Hospital verbracht - doch sganze Warte het sich glohnt! DWert sind tiptop und dMartina mues erscht i dr Schwiz wieder ga Bluet kontrolliere la :)
I dr sengende Mittagshitz hemmer en wiiteri HopOnHopOff Tour gmacht, dismal durch Little India, Kampong Glam und Chinatown. Die drü Viertel sind all sehr farbefroh, gruchsintensiv und wiiti Teile dervo stend under Denkmalschutz, so as alles schön erhalte blibt.
Allgemein isch d Stadt sehr gepflegt und au sehr grüen, sogar die meischte Skyscrapers hend hochglagerti Gärte und Terrasse. Vercherschaos gits praktisch nid, dank 100% Import-Zoll uf Autos, begrenzti Azahl Zuelassige und es sehr Stau-sensitivs Roadpricing wo eim dLust am eigne Auto schnell verdirbt... Wiitere Fun Fact: Singapur het 5.5 Mio. Iwohner, dervo sind 40% Usländer! Zudem sind ca. 90% vu ihne ca. en Chopf chliner als mier :) d.h. uf dr Strass het mer sehr vil Übersicht, au wenns vil Lüt het :)
Am Nami hemmer denn en wiiteri Stund dermit verbrätlet, 2 Schwizer Rezept in diverse Apotheke welle izlöse... sProblem isch, as Apotheke eigentlich nur lokali Rezept ilösed, en Usnahm gits nur wenn mer scho für de Rück-/Wiiterflug icheckt isch, denn gelted dMedis als "Export"... naja, probieremers am Mittwuch numal.
Dernach het eusi Touri Tour erscht so richtig agfange: Nacheme Stadtspaziergang a dr Ocean Front und überd Helix Bridge, simmer ufs Marina Bay Sands Hotel es Bierli ga nä - und hend derbi dUssicht über die ganz Stadt gnosse. Na simmer ind Gardens by the Bay, dSupertrees ga bewundere und denn nu ind Shoppes at Marina Bay Sands, en riesigi Luxus-Shoppingmall, inkl. befahrbari Venedig-Kanäl! Da hemmer so richtig sLas Vegas Feeling becho... a propos Glückspiel: Singapur lit nach Las Vegas und Macau ufem 3. Glückspielsstadtplatz. Doch während Vegas mit 75 Casinos 7.5 Millione USD Inahme pro Jahr macht, macht Singapur 6 Millione mit nur 2 Casinos!
Anyway, nach meh als 17'000 Schritt hemmer eus numal en Pause gönnt, i dr Lantern Bar, ufem Dach vum Fullerton Hotel - am Bela sini Lieblingsbar da :)Read more