Satellite
Show on map
  • Day56

    Singapore Zoo

    June 13, 2018 in Singapore ⋅ ⛅ 30 °C

    Hüt simmer numal de Tierli nache, diesmal in Singapore Zoo, chli usserhalb vum Stadtzentrum. Es sig eine vu de schönschte Zoos vu dr Welt - leider aber au mit vilne kreischende und klopfende Kiddies, so as sich mängi Tier verständlicherwis ins hinderschte Eck vum Gheg verchrüched... es het hie unglaublich vil Arte Schildkröte und au suscht vil Tier, womer nu gar nie (oder zumindescht nid in Echt) gseh het. So zum Bispil Alligator Snapping Turtle, Pygmy Hippo (öppe 10x chliner als es normals Nilpferd), Cassowary (schwarzi Laufvögel mit farbigem Chopf us Australie), 3-horned Rhino Beetle, Puma, Otter oder au euse erscht Komodo Waran. Am beschte het eus de Malayan Flying Fox gfalle, en zuetrauliche flügende Hund wo sich in aller Rueh am putze und am fresse isch gsi.
    Natürlich hemmer da au paar neui Fun Facts glernt: so wachsed Kängurus es Lebe lang, de Unterschied vu Monkeys zu Apes isch de (fehlend) Schwanz und Komodo Warare essed bis zu 90% vu ihrem Körpergwicht pro Mahlzit. Zudem hemmer numal riesigi Krokodil bstunt: während de Mänsch grad mal 41kg Bisschraft het, sinds bi de Krokos 1'361kg! Trotzdem hends nur sehr schwachi Muskle zum dSchnauze ufzsperre, darum langed es eifachs Gummiband um es 2m Krokodil unschädlich zmache!
    Passend zu dere riesige Masoala Halle hets hüt immer chli gregelet und meh oder weniger durchgehend donneret... währendem stärchste Platzrege hemmer i eim vu de Pavillions es Nickerchen ghalte :)
    Dernach simmer mimne sehr gschwätzige Taxifahrer zrugg id Stadt gfahre - sini halb Lebensgschicht heter eus verzellt! Als Singapore Abschluss simmer (zimli underdressed aber dankem Rege mal nid verschwitzt) zumene feine Italiener ga esse... und da het dMartina bi dr Wii-Charte nid schlecht gstuuned, sogar ihre Lieblingswii Ripassa hends da gha! Somit lemmer euses Zivilisations-Erlebnis gediege usklinge und schlemmed numal so richtig westlich :)*
    Read more