Culture-shocked in Bena

Geschter Abig hemmer eus es letschts Mal mit Helen und Shane zu Znacht & live Musik troffe und tatsächlich eusi erscht Fuessball WM Halbzit gschafft (Russland-Spanie). Da dr Match aber eher langwilig isch gsi und mer dusse inkl. Primaloft gsesse sind, hemmer die Üebig denn nach 45 Minute la si und sind hei ins Bett.
Euses Happy Happy Hotel het sim Name alli Ehr gmacht - mer hend herrlich usgschlafe und sfeine und sehr grosszügige Zmorge gnosse. Dernach simmer durch Bambus-Wälder uf Bena gfahre, es traditionells Ngada Village (btw, Wae Rebo isch es traditionells Manggarai Dorf gsi). Grad bim Dorfigang het eus de Agus nichtsahnend erchlärt, wie die Hüser baut werded: wenn öpper es neus Huus möcht baue, hilft nid nur die ganz Familie, sondern sogar sganze Dorf und au die umliegende Villages mit. All bringed kunstvoll gschnitzts Holz für Bode und Wänd, Bambus für de Balkon und Vordach, und trochni Grasbüschel fürs hoche Dach mit. Je nachdem wer i dem Huus wohnt, stellt mer zoberscht ufem Dach es Stei-Figürli uf, entweder für "ngadu" (Männer, sprich en Chrieger mit Speer) oder für "baga" (Fraue, es Mini-Hüttli inkl. Strohdach).
Obwohl Flores zum Grossteil offiziell katholisch isch, spielt Animismus immernu en grossi Rolle. So werded zum Bispil ufem Altar i dr Mitti vu Bena regelmässig nu Tier gopferet, zum dAhne günstig zsinne. Au im Zämähang mitem Huusbau wird vil gschlachtet (wie mer denn später gmerkt hend...), so wird für jede Arbetstag vum Huusbau es Schwein gschlachtet, damit all Helfer au gnueg zesse hend. Isch de Huusbau oder dRenovation abgschlosse, wird en Büffel zum Festesse gschlachtet. DZähnd vu dene Schweine resp. dHörner vu de Büffel werded sitlich vum Huusigang ufghänkt, so asmer direkt cha ablese, wie lang de Huusbau duuret het und wie oft as dHütte scho renoviert isch worde.
Womer paar Meter wiiter gloffe sind, hemmer euses "Glück" realisiert - in Bena het genau hüt en sone beschriebne Huusbau agfange! Sicher 100 Lüt hend mitghulfe, Bambus anetreit und das Huus ähnlich wie Ikea-Bauteil zämägstellt. Underem Huus, wo normalerwis dTier vu dr Familie underbracht sind, hends es Huehn mit Federe und allem überem offne Füür gröschtet. Das sell dAhne über de Huusbau informiere und verhindere, as sie us Zorn sHuus zerstöred. Fürd Martina isch nur scho das ganze Huehn sehr gwöhnigsbedürftig gsi... if only she knew...
Dernach simmer wiiter ufe ins Dorf, zunere Gruppe Fraue wo die Betel Nuts-Cashew-Lime Paste chätscht het. Da hemmer gmerkt, asmer de Agus in de letschte paar Täg wohl missverstande hend - mit "Lime" het er nid Limette gmeint - sondern Limestone! D.h. dFraue nehmed es Blatt vum Betel Nut Tree, leged en früschi Cashew Nuss druf, stäubed chli Kalkstei-Pulver druf, rolled sBlatt und fend a chätsche.
Mer hätted eus nu länger mit ihne underhalte, doch plötzlich isch eus de Agus ga hole und het eus nebe Altar i dr Mitti vum Dorf bracht - mit direktem Überblick vum neu zu bauende Huus. Erscht da hemmer gmerkt, as offebar nid nur Säü fürd Verköstigung vu de Mithelfer gschlachtet werded... sondern au Pferd! So hends en chlises bruns Pferd a dr Leine vors Huus gfüehrt und mit eim Machete-Hieb ufe Nacke tötet! Doch leider isches nid en ganz suubere Schnitt gsi, das Pferd het sich nu paar Sekunde (gefühlt Stunde!) dreiht und gwunde und daderbi nid wenig Bluet und wohl nu anders durch dGegend gsprüeht.
Mer sind immernu ganz paff gsi... da gsemmer wie nu es zweits Pferd anezerrt wird! Obwohl es sich mit ganzer Chraft gsträubt het, het au der Schimmel messe dra glaube - diesmal mimne bestialisch-ussehende, wohl aber sehr effektive Machete-Hieb ufe Rugge :o
De wenige Touriste im Dorf, v.a. de Fraue, isch de Schrecke im Gsicht gschribe gstande. Für wohl die meischte isches zerschte Mal gsi, asmer anere Schlachtig zueluegt - und denn erscht nu mit Machete und vu suscht so sanftmüetige Indonesier. Mer hend ja gwüsst, as Schlachtige au bi eus bluetig sind und es eifach derzueghört, wenn mer es Stück Fleisch möcht esse. Doch das da mit eigne Augne i dere Art live zgseh, das werdemer wohl nie vergesse. Mer het gmerkt, as das nid es Show Ritual isch gsi, wo nur für Touris gmacht wird - sondern das ghört eifach zu de Kultur da derzue. So wie mer überall uf Flores scho jungi Chind mit Machete ufem Rugge gseht umelaufe, so selbstverständlich isches gsi, as dChind au in vorderschter Reihe dere Schlachtig/Opferig zuelueged.
Mit immernu liecht zittrige Chnü und flauem Mage simmer zrugg zum höchste Punkt vum Dorf - da het eus en Blinde gege en chlini Spend es paar Lieder ufere Art Bambus Querflöte vorgspilt - sogar Ave Maria und Frère Jacques!
Zum euse Nerve wiiter zberuhige (au de Agus het zum erschte Mal sonen Pferde-Schlachtig gseh), simmer na nu zu de Air Palas Malange (heisse Quelle) gfahre. Hie treffed sich en chalte Gebirgsbach und en ca. 45-50 Grad heisse Strom - in dene Strudel laht es sich sehr guet la ushalte und dErlebnis vum Morge zverdaue.Read more