Back to nature in Riung

Hüt hättemer eigentlich am Morge am 2 welle zumene Vulkan-Hike ufe Gunung Inerie starte, zum de Sunneufgang ufem Krater-Rand zgniesse. Doch leider het eus sWetter en Strich durch dRechnig gmacht - au am Morge isch de Vulkan nu in dicki Wulche ighüllt gsi.
Somit simmer scho früener wiitergfahre, and Nordküste i dr Nöchi vu Riung. Ufem Weg hemmer chenne beobachte, wie die grüene Berge vu Bajawa durch roti und trochni Hügel ersetzt worde sind - da gsehts us wie uf de Insel im Komodo NP.
In Riung simmer ind "Eco Eden" Lodge - vu Lonely Planet passenderwis als "Robinson Crusoe Paradies" beschriebe. Paar Bambus Hütte am Strand, mit Hängematte, Muschelchettene und em Philipp, de schrägi Kauz wo die Lodge baut het. De Philipp isch früener selber Guide gsi - biser sich entschlosse het, sich da niederzla zum "relax, enjoy and talk nonsense". Wahrlich macht nid alles Sinn woner seit - wohl au am usgiebige Palmwii-Konsum zuezschribe - aber mängi gueti Sprüch und Weisheite heter scho zbiete. So heter eus zum Bispil vunere Redewendig in Flores verzellt: "dMilch stammt vum Büffel, de Name vu dr Chue"... offebar isch hie Büffelmilch verpönt, zum si trotzdem chenne zverchaufe, wird sie als Chuemilch vermarktet. So giengs nu mit mänge Sache da uf Flores. De Agus het eus au mal verzellt gha, as de Leiter vu dr Anti-Korruptions-Stell imene Korruptions-Fall verwickelt gsi isch - chunnt eus irgendwie bekannt vor :(
Nachem Zmittag hemmer de Philipp, Agus & Friends bim Palmwii la schwafle - der Wii schmöckt für euse Gaume chli wie vergorni Milch! - und sind ind Hängematte ga entspanne und sherrliche Klima gniesse. De Namittag hemmer denn mit chli Yoga, 100 Push up Challenge, emene Strandspaziergang und Schwumm zum Sunneundergang verbracht.
Etz sitzemer uf dr chline Terrasse vu eusem Bambushüttli und chenneds in Abetracht vu was da chrücht und fleucht scho recht entspanne! Langsam chenned mer das eifache, naturverbundne Lebe gniesse und eus nid vu typisch Schwizerische Bedenke plage la - obwohl mer aktuell nu sehr froh ums Malaria-Mittel sind!*Read more