Island hopping

Trotz schrägem Bett und Martinas Insektestich-gschwullner Hand hemmer hüt Znacht sehr guet gschlafe - wie im Tsitsikamma NP het eus dBrandig in Schlaf begleitet.
Riung isch es "end-of-the-road" Dörfli, de einzig Grund für Touriste hie ane zcho isch de 17 Islands Marine Park... aber: eigentlich sinds 24 unbewohnti Insle, doch die zueständig Behörde het gfunde, 17 wär doch en gueti Zahl, abgleitet vum indonesische Unabhängigkeitstag am 17. August... jedefalls hemmer hüt 3 vu dene wie-vil-au-immer Insle abklapperet. Klapperet resp. gröchelt het au de Traktor-Motor uf euser Nussschale: en alte 2-Takter-Dieselmotor, mit meh Rost als Stahl, wo nu vu Hand het messe akurbelt werde und nachem Starte zerscht mal zganze Böötli in dunkle Rauch ghüllt het. Dernach het er sich zumene ohrebetäubende Knattere "beruhigt", so als ob er churz vorem explodiere wär...
Naja, eigentlich derfed mer eus nid zgross beklage, de Motor het eus brav zu de beseite Insle bracht. Det het türkises Wasser und wisse fiine Sand uf eus gwartet - perfekt für de erschti richtig Strand-Tag vu euser Weltreis! Passend zum Strandfeeling hets au Kokoswasser und -fleisch zur Vorspis gä, de Fisch zum Hauptgang isch denn uf verchtrochnete Kokosschale brätlet worde.
Es het zwar gheisse, mer chängi bi dene Insle au schnorchle, aber nachdem mer en Wuche im Komodo NP verwöhnt worde sind, hemmer vu dr Underwasserwelt nid allzu vil erwartet. Da simmer sehr positiv überrascht worde, die farbige Korallegärte und Schwärm an chline Fisch hets durchus mit de Riffplätz im NP chenne ufnä!
Ufem Rückweg het sich au klärt, was das mit dene "Cloth" Bäum uf sich het, wo zum parfümiere vu Zigarette brucht werde... eigentlich hätti das "cloves" selle heisse, Nelke uf Dütsch. In Indonesie brucht mer Nelke zwar au zum choche, aber wohl hauptsächlich fin gmahle in starche Zigis. DMartina het so eini probiert - die erschte Züg sind nu ganz guet, aber nach de Hälfti het sies la sii, sind doch eifach zstarch.
Ermattet vu de vile Sunne freuemer eus etz uf es chalts Bintang und BBQ am Strand inkl. crazy Stories vum Philipp.Read more