Kelimutu

Hüt hemmer eus am halbi 5i usem Bett kämpft, i dr Hoffnig, pünktlich zum Sunneufgang ufem Kelimutu zsi. Doch trotz em wunderschön wulchelose Abig geschter, isch Moni hüt Morge in dicke Nebel ghüllt gsi. Nichtsdestotrotz hemmer eus es letschts Mal mit eusem Fahrer und Family ufe Weg gmacht - irgendwenn mues sich der Nebel ja liechte!
Doch die halbstündig Fahrt isch en Adrenalin-Achterbahn gsi... eus isch scho paar Mal ufgfalle, as euse Fahrer wohl nüm sooo guet gseht und sis Auto nid halb so guet wie de Sanat in Sri Lanka im Griff het... doch das hüt het numal alles toppt, mer sind froh ases de letschti Tag gsi isch!
De Agus het trotz Nebel schnell deruf welle, d.h. in de Kurve vil zvil Gas gä und nur knapp gwendet... zudem ischer bi de schlechte Sicht hoffnisglos überforderet gsi, alles heter probiert: Vollliecht dri/drus, Schiibewüscher uf volli Gschwindigkeit, Warnblinker din... trotzdem het ihn sin Sohn fascht scho wienen Blinde messe lenke: rechts/links/gradus/chli meh rechts... eus isch gar nüm wohl gsi, hendem gseit er sell doch chli langsamer fahre, mer heiged ja Zit, öb ächt mier gschiider selled fahre? Doch er het nid welle lose, prompt simmer einisch inere Haarnadelkurve gradus und fascht im Grabe glandet...
Nach es paar lange Minute hemmers denn zum Parkplatz gschafft und eus nacheme heisse Tee und süesse Chäs-Cracker (wtf?!?) de Weg deruf gmacht. Zerscht hemmer gar nix gseh und hend i dr Chälti mal gwarted as dSunne höcher chunnt. Mier sind beid dick ipackt gsi, eus hend dTemperature nid so zschaffe gmacht - doch dFamily vum Agus het teilwis nur Flipflops, churzi Hose oder nur es liechts Pullöverli agha... de Sämy het denn sini entbehrliche Zuesatzschichte de beide Jungs abgä.
Wo sich dNebelschwade verzoge hend, het mer die drü Kraterseeä gseh, jede chli en eigeti Farb: eine hellblau, eine chli dünklers blau und eine dunkelgrüen. Idrücklich sind v.a. die tief igrabne Krater mit de schroffe Abriss gsi.
Nachdem mer eus vu Agus & Family in Moni verabschiedet hend, simmer zrugg is Bett - zum chli Schlaf nachehole und de Muskelkater vu de 100 Push up Challenge (vu vor-vorgeschter!) uszkuriere.
Später simmer nu zunes paar Wasserfäll spaziert - wobi de Weg über Bambusbrugge um einiges spektakulärer als dWasserfäll selber gsi sind... mier verwöhnte Schwizer! Etz isches wieder schön warm und fascht wulchelos, gfühlti 20 Grad meh und 100m Nebeldecki weniger als hüt Morge :)*Read more