Sigatoka Sand Dunes NP

Bis zum spate Mittag hemmer numal euses Resort gnosse - eusi letschte 5 Stern uf Fidschi - und sind denn es paar Kilometer zrugg uf Sigatoka zum Sand Dunes National Park, de erscht NP vu Fidschi. Det hemmer en churzi, aber schöni Wanderig underno, durch Wälder, über Raseweg und denn an Strand. Die Wanderdüne enthülled offebar immer wieder neus, wie steinzitlichi Werchzüg und Chnoche. Doch au ohni archäologischi Fund isches ganz es schöns Plätzli, womer sich fühlt als wär mer alei uf dr Welt.
Später simmer denn wiiter uf dr Queens Road in Südoste uf Pacific Harbour gfahre (btw, dRoute im Norde heisst Kings Road :)). Da hemmer im charmante Baka Blues Cafe en Burger, Chili con Carne und Corn on the Cob gesse - Zitat Sämy: "Wenn de Sanath, de Agus oder dMoana Crew würded dich gseh das Chili esse, sie würded dWelt nüm verstah!"
Gstärkt simmer wiiter uf Suva, dHauptstadt vu dr Insle Viti Levu, wo bekannt fürs Regewetter isch... und tatsächlich, in de halbstündige Fahrt vu Pacific Harbour uf Suva simmer 3 Mal verschiffet worde! SWetter isch da v.a. vum Passat-Wind prägt und sehr lokal - zwüsche de Regeschauer isch dStrass au wieder ganz troche gsi...
Etz sitzemer im Scherme bimne Bier, losed am Rege zue und hend vor, eus mit "Finding Nemo" uf die morgige Tauchgäng izstimme.*Read more