Wreck & coral diving in Beqa

Nachere mittel-erholsame Nacht in Suva (dank betrunkne / abreisender Hotelgäst) simmer wieder zrugg uf Pacific Harbour zum Tauche gfahre. Mer hend glese, as dInsle Beqa au "Mecca of Pacific Diving" gnennt wird - vilicht en würdige Nachfolger für de Komodo NP? So simmer mitere grössere Gruppe ufeme Stahlschiff (yay, kei Nussschale!) zur Insle usegfahre.
De erschti TG hemmer bi de "7 Sisters" gmacht, da gits es 20-jährigs Wrack wie usem Bilderbuech, kombiniert miteme Koralleriff und so gueter Sicht wiemer sie suscht nur us Tauchmagazin kennt. Für eus beid isches serschte Mal imene Wrack inne gsi, so hemmer zum Bispil ind Fahrerkabine oder is Heck chenne inetauche... Bilder womer hoffentlich für immer mental gspeichert hend! Au sRiff isch sehr schön und farbig gsi, wenn au mit weniger Fisch als im Komodo NP. Szweite Highlight vu dem TG isch en enge, ca. 10m lange Swimthrough gsi - liecht versteckt vu Fächerkoralle.
Bim zweite TG simmer zum Rainbow (irgendwas), au da schöni Koralle und zwei Swimthroughs - aber scho gli hemmer chli chüel becho... isch halt nid ganz so warm wie in Indonesie und die Nutella-Stärchig und Schläfli derzwüschet hend gfehlt :)
Nacheme spate Burger Zmittag hemmer eus ufe wiit Weg uf Rakiraki, a dr Nordküste, gmacht. DKings Road füehrt derbi durchs Landesinnere, wo nid so hüglig isch wiemer vu dr Küste chennt vermuete - es isch eher en dicht bewachsni Hochebeni. Doch statt Zuckerrohr gseht mer da v.a. Palme, buschigi Bäum mit orange Blueme und immer wieder Chüe oder Pferd am Strasserand.
Wieder hemmers leider erscht nachem Idunkle zu eusem Hotel gschafft - dismal chli es chliners und familiärers Resort. Prompt isch hüt au nu grad Lovo Abig, das isch speziell inere Erdgrube garts Fleisch. Derzue hets en Kava Zeremonie gä, das isch sFiji Nationalgetränk usere Wurzle - sell beruhigend wirke und isch erstunlicherwis alkoholfrei! Es schmöckt eigentlich wie Erde... also chli wie Süessholz, aber eher bitter als süess, mit chli Pfeffer und sonen sandige Nachgschmack... plus dZunge wird so chli taub, wie mitere starche Zahnpasta... sehr speziell :) Während de Kava Zeremonie gits kei formelli Sprüch, sondern es wird fiirlich klatscht. Früener hend nur dHäuptlinge 3 Klatscher becho, hüt bechunnt jede die Ehr - bevor mer die chli Kokos-Schale ext :)Read more