Geysir del Tatio & Valle della Luna Pt.1

Hüt Morge hemmer eus in aller Herrgottsfrüeh ufquält - doch mit guetem Grund! Mer sind zum Geysir del Tatio, em drittgrösste geothermale Feld vu dr Welt (nach Yellowstone und irgendwo in Japan). Tatio heisst au de Vulkan hinder dem Feld, uf Spanisch "abuelo llorando" (weinender Grossvater) benennt in Alehnig an Pachamama (Mother Earth). Am Fuess vu dem inaktive Vulkan findet mer 88 Fumadores (oder so :) das sind die räuchelnde Löcher) und ca. 15 teilwis meterhöche Geysire. Vu bis zu 5km tief blubberet resp. sprützt 300-400 Grad heisses Wasser ad Oberflächi. De Geysir del Asasino het sogar in de 80er Jahr es paar Todesopfer gforderet!
Bibbernd hemmer bi -12 Grad de Sunneufgang über de Geysir de Tatio gluegt und dLandschaft bewunderet. Gmäss am Alvaro, eusem Guide vu hüt Morge, hets in Chile fascht 2'000 Vulkän, dervu isch en Viertel aktiv. Im Moment herrscht wohl vil Druck under de Oberflächi, darum sind in letschter Zit so vil Vulkän usbroche (bsp.wis uf Bali oder Hawaii), au in Chile sind chürzlich wieder paar Vulkän erwacht!
A propos Vulkän: de Alvaro het eus verzellt, as sBecki/Tiefland vu Atacama eigentlich en Krater isch, ikesslet vu vier Gebirgszüg (u.a. dAndä und Cordillera del Sal). Der Krater stammi vum ehemalige zweitgrösse Megavulkan vu dr Welt - über Magma-Chammere im Erdinnere sig der immernu mim grösste Megavulkan in Yellowstone verbunde (dem seit mer offebar "dNabelschnuer us Für").
De Alvaro het eus zudem erchlärt, warum de Salar de Uyuni so schön wiss isch - während de Salar de Atacama eher terracotta: im Salar de Uyuni regnets vil meh, so wird sSalz regelmässig "gwäsche" und blibt wiss. In Atacama hingege regnets sehr wenig - sRegewasser vu de Andä versickeret und cha so nid sSalz "sübere". Stattdesse erodiert das Vulkangstei immer meh und sGröll und Sand bildet es Konglomerat mim Salz vum Salar.
Nachere hervorragende Pizza und es paar Schichte weniger simmer Mitti Namittag nu ufen Tour zum Valle della Luna. Weltwit gits vil Täler mim gliche Name, wohl weg de öde und karge Landschaft - aber nur im Valle della Luna in Atacama het dNASA im 1962 au effektiv Roboter und Material für ihri späteri Mond-Expedition testet :) Das Tal isch früener en flache Teil vum Salar de Atacama gsi, durch Plattedruck isch de Bode ufbroche und het sich in Schiibe und Schichte ufgstellt (die hütig Cordillera del Sal). Mer hend da mehreri Sights bsuecht: de Mirador del Coyote, dCueva del Sal (Salzgrotte) und hend vumene Gipfel de Sunneundergang chenne gniesse... sehr idrücklich!
Zum Znacht simmer in staubige Wanderchleider inen Art Gourmet-Tempel da in San Pedro (het eus grad chli an euse letschti Abig in Singapur erinneret) und hend numal so richtig gschlemmt... die negschte paar Täg werded wohl eher karg!Read more