Soaking up more sunshine

Hüt isch numal en herrlich warme und perfekt sunnige Tag in Sucre gsi! Bevor mer zu eusem Lieblings-Plätzli zur Ricoleta sind, simmer nu zum Mercado Central zum ga Würfel zum Yatzy spile poschte... nur as dMartina nach "dedos" (Zeche) statt "dados" (Würfel) gfragt het :D nach es paar strube Blick hemmer denn doch nu en Stand gfunde, wo eus 5 Stück (also Würfel, nid Zeche) verchauft het :)
Dernach simmer wie gseit numal zur Ricoleta deruf, hend swunderbare Wetter gnosse und phantastischi home-made Pasta gesse - was will mer meh?
Zum denn nid doch nur Sunne sondern au chli Kultur ztanke, simmer ind Casa de la Libertad, es Museum über de lang Freiheitskampf vu Bolivie. Da numal die wichtigste Eckdate zum Merke: 1825 isch in Sucre dUnabhänhigkeitserchlärig vu Bolivie underschribe worde - faktisch isch aber nur sLand vu dr spanische Chrone unabhängig worde, die indigen Bevölkerig isch nach wie vor bitterarm gsi und het für die riiche Europäer gschaffet. Bolivie isch nachem Simon Bolivar benennt - der het zwar in vilne latinamerikanische Länder fürd Unabhängigkeit kämpft, aber nie in Bolivie! Er het lediglich mal en Gruppe Kämpfer zur Understützig nach Bolivie gschickt, er selber isch aber nie involviert gsi... nach dere bluetige, aber leider nid tiefgrifende Revolution het sich Bolivie als Republik proklamiert. Doch sit 1825 het Bolivie über 60% vum ursprüngliche Landesumfang verlore, teiwis durch schlechti Deals, teilwis durch bluetigi Usenandersetzige mit Brasilie, Argentinie, Peru und Chile. Für die indigen Bevölkerig het sich bis zur zweite Revolution 1952 nüt gänderet, sie hend kei Land derfe bsitze und oft hend sich dRegierige gegesitig putscht.
Zum Abschluss simmer nu ufs panoramische Dach vum Templo de la Senora de Merced und hend die letschte paar Föteli vu dere schöne Stadt gmacht.
Etz sitzemer im erstunlich warme Nachtbus uf La Paz und hoffed uf en ruhigi 12-stündigi Fahrt.Read more