Taking the lead Pt.1

Geschter Abig simmer scho am 8i mit eusne Bettfläsche is Bett und hend eus vumene Hörbuech in Schlaf la verzelle. Doch chum en Stund später simmer vumene mächtige Gwitter gweckt worde. DBlitz hemmer klar sogar durchs Zelt duregseh, teilwis hets wohl grad i dr Nöchi igschlage und de Donner het eus direkt überrollt, teilwis hets chli wiiter igschlage und denn hemmer sEcho nu paar Mal ghört halle. Nach es paar Minute hets denn nu ghaglet :o euses Zelt isch zum Glück dicht gsi und dank de Wärmi simmer denn au nid allzu spat wieder igschlafe.
Hüt Morge am 6i simmer denn mimne früsche Coca Tee gweckt worde - bis ans Zelt hends eus der zämä mit chli warmem Wasser und Seifi zum Wäsche bracht! Het eus grad sehr an eusi Luxus Safari im Amakhala erinneret :) nacheme super Zmorge simmer denn wiiter gloffe (resp. au nu churz uf eusem "Emergency Horse" gritte), übere Arapa Pass (au Condor Pass gnennt) und zu de Seeä vu Jatun Puchachoca. Wunderschöni Landschafte!
Euse Guide het geschter scho chli Müeh gha zum Mithalte und hüt ischer wohl au gar nid zwäg. Zerscht hemmer dänkt er sig verkatered, weler teilwis über die eigete Füess gstolperet isch, nid het möge laufe und wohl au Chopfweh het - doch bis am Mittag isches offebar keis biz besser worde, er isch ohni Zmittag direkt is Zelt... mit dem Guide hemmer wohl mal chli Päch gha, er schint de Trek au nid würkli zkenne... so hemmer churzerhand de Lead überno und eus teilwis enere andere Gruppe mimne sehr ufgstellte und informative Guide agschlosse.
Churz vor eusem Lager het dMartina nu es Hufise gfunde - doch im Moment bringstere wohl eher nur i dr Liebi Glück, wel dernach het sie sagehafti 7 Mal im Yatzy gege Sämy verlore... Euses Camp isch grad underhalb vum Ausangate Gletschter - ab und zue ghört mer ne chalbere und au scho die eint oder ander Lawine hemmer gseh... zum Glück immer usshalb Riichwiiti vum Lager.Read more