Lima sightseeing

Obwohl mer zimli Stadt-fuul sind, chemmer eus dSights vu Lima nid ganz la entga la - somit hemmer hüt eini vu dene Doppeldecker-HopOn-HopOff-Toure gmacht... anderscht als in andere Städt fahrt mer da aber nid nur mim Bus, sondern hoppt au mal als Gruppe drab und macht en Spaziergang durch es Quartier oder Museum. So hemmer zerscht Mal sHippie- und Künstler-Quartier Barrancos entdeckt und sind an de Ruine vu Huaca Pucllana verbigfahre. Die idrückliche Überblibsel stammed vu dr alte Kultur "Lima", wo zwüschet 200 und 700 nach Christus da glebt hend. Sie hend en spezielli, Erdbebe-sicheri Bauwis entwicklet, derwi werded Lehmziegel wie Büecher ufeme Regal ufrecht anenandergreiht - passenderwis nennt mer die hüt "tecnica del librero". Wie später au dIncas hend dLimas au Mänscheopfer gmacht - allerdings ans Meer und die heilige Haie (nid and Sunne oder Erde wie dIncas).
Nach dene Ruina in Miraflores simmer durch de Financial District San Isidro ins Stadtzentrum vu Lima gfahre. Rund 9 Millione Mänsche lebed in Lima - das isch fascht en Dritte vu dr ganze peruanische Bevölkerig. De Himmel isch zwar meischtens bedeckt, aber es regnet nie (es nieslet höchtens Mal) - so het dStadt mit grosse Wasserproblem zkämpfe. De öffentlich Vercher isch völlig chaotisch: es git hunderti privati Bus-Undernehme, doch keis konsolidierts und abstimmts Netz... sogar fürd Locals isches so unübersichtlich, asmer es App brucht zum sich chenne durch sAgebot-Gwirr zorientiere. Was eus hie au ufgfalle isch: anderscht als no in La Paz oder Cusco gits hie kei Cholitas meh! All sind modern azoge und wiit und breit gits kei Baby Alpacas meh (wo btw immer Lämmli und nid Alpacas sind...)
Im Stadtzentrum simmer de Hauptplatz (Plaza de Armas) ga aluege - doch sit fascht zwei Mönet isch de ganz Platz fürd Bevölkerig gsperrt. DReqierig fürchtet sich vor Protest gege skorrupte Parlament - und so isch sHärze vu Lima erstuunlich leer.
Als letschte Stopp simmer nu ins San Francisco Chloster, hie hend abem 16. Jahrhundert rund 200 franziskanischi Mönch glebt (btw euses erschte Mönchs- statt Nonne-Chloster). Da gseht mer au en ungwöhnlichi Darstellig vum letschte Abigmahl: einersits sitzed Jesus und dJünger amene sympathische runde Tisch, zudem gits geografisch passends bratnigs Meerschwein und Chilli-Schote zum Znacht :) Würklich beidruckend isch hie aber nid seigentliche Chloster, sondern dKatakombe drunder, Entstande sinds als chlini privati Gräber under separate Kappelle - doch dStadt het beschlosse die einzelne Gäng und Gräber mitenand zverbinde und het so de erscht öffentlich (!) Friedhof vu Lima erschaffe. Rund 25'000 Lüt (Arm und Riich nebedenand) sind da uf zwei Stöck in bis zu 4m tiefe "Massegräber" begrabe worde.
Nach dere interessante Tour hemmers eus wieder kulinarisch la guet ga la und hend eus de Buuch mit Pasta und Meeresfrücht vollgschlage (also de Sämy :)...Read more