Camping Bergom

Hüt hemmers gmüetlich gno. Nach em spate Zmorge und em Bade simmer erst churz vor em Mittag los. Nach de Abfahrt hemmer Elch Nummer 6 gseh. Mega nöch hed er über en Hügel neb de Strass gügsled. Bim Zrugfahre nach em Wendemanöver hemmeren leider nur no gseh devo trotte. De Plan vo hüt isch gsie das mer langsam südlich fahred und en gmüetliche Platz gfindet.
De Platz wo mer userkore hend hed en Fürstell gha. Drum simmer no es guets Stuck Fleisch go poste.
Wo mer bi dem Platz acho sind hed scho zwoi Camper det gha und komischi Lüt wo luut "Voodoo"-Musig glost hend. D Wiiterfahrt isch au no versperrt gsie, da zwoi Bäum quer uf de Stras glege sind. Nachere gfühlt 20 Punkt-Wendig simmer wiiter. De zwoiti Platz isch bimene Bergseeli gsie. De Weg isch holprig, eng und voller Schlaglöcher gsie. Und hed amene Grabe gendet. Das mal isch keis Wende möglich gsie drum heds en gueti Strecki im Rückwärtsgang geh. Am Afang vo de Strass zum Bergseeli hemmer euse Nachtplätzli den amene Badeplatz wo Camping erlaubt isch gfunde. Es Füür isch schnell gmacht gsie und mer hend euse Znacht chönne grille. Während em Esse hemmer de Sunneundergang chönne gnüsse. Wo mer zrug im Büssli gsie sind, hemmer no en Bsuecher entdeckt. En Biber isch direkt vor eusem Büssli im See underwegs gsie.
Am morge simmer als erst go bade, bevors den es feins Zmorge geh hed.Läs mer