Rio (Vidigal)

Jetzt isch de Schwiizer vo Floripa au in Rio ahchoo und min Vater het mer gschriebe, dass sin Couse vo Schwede (36i, hanen no nie vorher gseh gha) au in Rio isch. Denn hani zersch uf en Kafi welle abmache, er isch denn aber grad scharf gsi ufs Fuessball-Derby woni mit eme schwiizer han welle gah, denn ischer halt mitchoo. Nach paar Bier und nomeh Caipirinhas simmer zämme ide Usgangsmeile glandet und die ganz Nacht gfiiret!
200m vo dere Usgangsmeile hets so bekannti, farbigi Stäge gha wommer unbedingt anewelle hend. Vo 6 Persone wommer gfrägt hend obmer ide Nacht chönd gah, hend eus alli 6 gseit, mir sölleds nöd waage. Willmers aber nöd ganz hend chönne lah, hemmer euse Uberfahrer gfrägt, ob er nöd schnell chan anefahre. Für 2.- Trinkgeld hetters denn gmacht :) Das isch de einzig Momänt gsi, wo die Stäge nöd vollpackt gsi sind mit Touris. Am nägste Tag simmer denn bi Tag det ane und hend Caipirinhas truke für 1.80.- (700ml!!).
Am nägste Taag hend ein Australier, e Costaricanerin und ich s Gfühl gha mer chönnd allei ih e anderi Favela. So simmer also mitem Uber bis zum Ihgang vo Vidigal gfahre und vo dete us mit em Töfftaxi (Favelalüüt) ganz ufegfahre wommer denn het chönne z fuess uf en Hügel. Dete hemmer eigentli de Sunneuntergang welle ahluege. Nur isches meeega bewölkt gsi und mer het nöd würkli uf Rio abegseh. Dezue chunnt dass mer verwütscht worde sind bim Videos ufnäh und drum rächt aggressiv zwunge worde sind die Videos wieder z lösche. So simmer also if de Bärg im Wald wommer en Getränkeverkäufer kenneglernt hend. Er het eus denn ufem Abewääg abchürzige zeiged wo alles andere als sicher gsi sind 😂 dezue chunnt no, dass es ufem abewääg rächt fescht het ahgfange rägne und alles mega schliefrig gsi isch. So simmer also wieder dune am Bärg gsi, bzw. obe ah de Favela. De Getränkeverkäufer het eus aber no zunenre Bar mit ussichtspunkt welle bringe wos nur lokali lüg gha het. Uf de Strasse hets nümme viel lüüg gha wills grägnet het und es iscj bereits dunkel gsi (bi Dunkelheit sött mer langsam us de Favelas). Wills aber so grägnet het hemmer chli müesse warte bis es chli ufhört. Wos denn so wiit gsi isch hemmer wieder mitem töfftaxi abewelle. Leider hets kei meh gha und en chline bueb het eus gseit mir müemd ih de Van vor ihm ihstiige (öppe us de 60er Jahr und vollegstopft mit locals). Will mer aber mal no en Töfftaxistand gseh hend hemmer zersch det mal no welle go luege obs öppis het. Leider nada. Denn simmer halt wieder zu dem Van gloffe und hend scho welle ihstiige. Plötzlich isch aber es Töfftaxi anegrast cho und het öpper abglade. De hett denn netterwiis no 2 anderi organisiert (chli ide Gägend umeghuuped) wo eus denn zum Glück (wie chranki Fahrer) abebracht hend :)

Nach dem ischa lles andere wie z.B. de Zuckerbärg uninteressant gsi!

Fazit: Rio isch top, mer ghört schlimmi Gschichte, d Favelas verleihed extremi Adrenalinkicks, Caipirinhas sind günschtiger als Wasser und es wird nöd bim Alkohol gspared, Precarneval isch scho crazy und ich bin weder usgraubt no ufgschlitzt worde!Read more