18. Uxmal, Cenoten & Merida

Leider müesse mir ds schöne Städli scho wieder verlah. 😜

Hüt steit dr Bsuech in Uxmal ufem Programm. E Maya Stadt mitemne grossä Tämpu.
Da mir chli Füchslis si 🦊, simer natürläch am morge am 8i dert.
Mir chöme no gad vor de 30 Räntner zur Kassä und löse d Tickets.
Einisch meh simer wieder absolut schockiert über di Organisation.
Eis Billet längt drum nid, du muäsch am Schauter näbä dran no es zwöits Billet löse und achtung! Diä wärdä oh no seperat im Abstand vo 10 Meter kontrolliert!! 🤦

Die Maya Ruine si atemberoubend schön und sehr idrückläch. Es het sogar öpis wines Fuess- Basketballfeld mit Tribüni wome es Ballspiel het gspiut.
Mir wandere öppe 2 Stund dür die Gebäude und Tämple us vergangänä Zytä und göh när witer.

Uf dr Agendä steit Cenote suchä.
Uf dr Haubinsle Yucatan hets schetzigswiis um di 6'000 Cenote.
Wie si diä enstande: vor 60 Millionä Jahr isch e Meteorit i dr Karibik igschlagä und het d Haubinsle Yucatan ad Oberflächi bracht. Das isch frücher es Riff gsy und het dür Steinkorallä eigentlich nur us Kalkstei bestande. (Steinkoralle wachse ufe und sterbe unge ab). Dürä Rägä si die Kalksteindechine afa ibräche und hei di Cenote bildet. Z Rägewasser het die Höline gfüllt und z Wasser hetsech e Weg iz Meer gsuecht. Drum gits in Yucatan Cenote und mehreri 100 Kilometer längi Tunnlä. 😊😅

Mir hei uf Google Maps zwöi Cenote gfunde, X'Batun und Dzonbacal. Natürlich zahlä mir Itritt und fahre witer. Mir entscheide üs für Dzonbacal wo chli witer hinge isch aus X'Batun. Womer dert achöme steit nur eis Outo ufem Parkplatz. Mir hei fröid, zieh üs um und göh zum Iigang. Di schiinbar einzige Bsuächer chöme üs gad entgäge und mir hei die absolut atemberoubendi Cenote Dzonbacal für üs allei. Öpis vom schönschte wo mer je hei gseh! 🥰😍
Mir gniesses i däm kristauklare Wasser z bade und göh nachdem mer öppe 20 Minute später Bsuech überchöme zur andere Cenote.

Es isch klar, dass dr erst Cenote Bsuech d Mässlatte ungloublech höch gsetzt het, drum simer oh nid erstunt wo's bir 2 Cenote meh Lüt het gha unds üs dert nid so gfaue het.
Spannend isch aber gsy, dass mir gad are Gruppä Höhletoucher hei chönne zueluegä bim abtouche. 😳

Drum sueche mir witer und mir finde witeri Cenote nur öppe 20 Minute entfernt. Es het oh dert wieder meh Lüt aber die einti gseht so cool us, dass mer de glich göh ga bade. D Cenote Yaal Utzul, so heisst si, isch eifach es 12 Meter Tiefs Loch mitere Stägä abe.
Mir gumpe iz Wasser und gniesse mit de andere Bsuecher di Troumhafti Oase. 🥰

Es isch iz öppe 13:00 und mir fahre nach Merida wo üses nächste Hotel isch. Mir erkunde no chli z Fuess d Stadt. Mit 900'000 Iwohner für üs gad chli e Tapetewächsu. 😅 Mir gniesse chli z Stadläbe und fröie üs scho wieder morn Merida chönne z verlah. 😂👋

Natürlich darf, Happyhour Daiquiri und Guacamole nid fähle. 😍
Zum Znacht gits Burrito 🌯 und Enchilladas. 🥰Read more