17. Los Rapidos

Hüt heimer eigentlich nur öppis ufem Programm.
Mir wei zu de Los Rapidos, ds isch e Kanal zwüschem südliche und em nördliche Teil vor Lagune.
Dert chame wie mirs vor Aare kenne chli ufeloufe und sech la abetribe.
Obwohl la tribe isch fasch e chli "übertribe". 😂 Mit Rapidos het ds nämlich nid viu am Huet gha. Mir si fasch nid vorwärts cho wüu mir üs ds chli angers gwöhnt si. Über d Hiwiisschilder mit "Achtung Strömig" und "unbedingt Schwümmwestä" trage heimer nur chönne lache. 😂
Abgseh vo däm isches wunderschön gsy. Wahnsinnig tolli Farbe, glasklars Wasser und mega gmüetlech. Mir si froh heimer üs entschlosse wieder früeh dert z si um dä Masse usem Wäg z gah.

Speziell a dr Lagune und bsunders in Los Rapidos si d Stromatoliten.
I erkläres wi am e 5 Jährige. 😁 Es isch ä Stei wo läbt. Und dä Stei isch haub so aut wie d Ärde und duet im Wasser Suurstoff erzüge. Ohni die häts üs gar nie gäh.
Weder meh weit wüsse über die lebändige Steine de am beste Google. 😉

Öppe am Mittag verlöh mer ds überfüllte Schiff und mache üs ufe Wäg richtig Merida. Mir hei 4 Stund Fahrt vor üs.
Üsi nächsti Übernachtig isch in Ticul. Es Stedtli wo gloub würk nüt z biete het, ussert es Hotel wo nöch a üsem nächste Ziu isch.

Mir göh ga ichoufe und finde es mega schöns Restaurant womer iz gad es Aperöli am näh si. Und später esse mer de no gad z Nacht. 🌯🍹🍸😍🥰Les mer