Mexiko & Belize

Hüt morge dörfe mir z Paradis Cozumel verlah.

Mir mache üs nomau es feins Zmorge im Hotel und göh am 11i richtig Fähre.
Diä fahrt planmässig am 12i ab und bringt üs nach Playa del Carmen.

Mir hole vom Parkplatz üses Outo ab und fahre nach Cancun. Ds Cancun sötte mir spätestens am haubi 5i z Outo abgäh.
Mir fahre in Playa del Carmen am 1 ab und gmäss Navi häts nid meh aus 1 Stund 15 söue dure. Aber kurz vor Cancun hets eifach brutau afa chnoorzä. Mir si im Stop & Go Verchehr bis nach Cancun ine.

Am 3 chöme mir i üsem Hotel in Cancun ah und wei afa ga d Rücksäck ids Zimmer due. Nur leider simer bim fauschä Hotel... 🙈 Uf Booking heisst z Hotel Casa Balam und weme ds uf Maps i git chunnt es anders Hotel wo oh Casa Balam heisst. Und ds wo uf Booking Casa Balam heisst heisst in Google Maps Palapas Boutique Hotel. 😂🤦

Guet de fahre mer zum andäre Hotel. Womer dert achöme und ke Iigang finge sondern eifach e Türe mitemne Zahleschloss wärde mer chli stutzig.

Iz schicke diä eim es Mail mitemne Link zum ds Zimmer z zahle när bechunnsch dr Code für ine. Ds Mail heimer natürlich nid gseh bismer vor dr Tür si gstande. Und weme nid innerhalb vo 24 Stund zahlt wirds outomatisch storniert. Da mer ds gester morge hei buechet heisst ds witer sueche. 😂

Langsam wird d Zyt chli knapp und mir bueche es witers Hotel.
Dert isch zwar genau glich mit Schlüssu Code, aber mit derä heimer kurz chönne Whatsapple und si het üs de afa dr Code gseit ohni das mir scho hei müsse zahlä.

Aber es het glich nüm glängt d Rucksäck ga z deponiere. Drum simer när wi dr Blitz zur Outovemietig ga z Mietouto abgäh und haut mit de schwärä Rucksäck e viertu Stund zum Hotel gloffe.

Nachdem mir im Hotel si göhmer de no chli in Cancun ga umeluege und chöme zum Schluss das ds nid schön isch.
Mir göh fein ga znacht ässe, nomau mexikanischi Spezialitätä🤤

Morn geits am 5i richtig Flughafe drum isch hüt früh Bett agseit. 😅Okumaya devam et