29. Mexiko City

Ja.. Wo söumä da afa. 😅
Am Donnschti Abä heimer afang wöue iichecke füre Flug vom Friti Abä. Jedoch heimer üse Flug niene gfunde u si de chli stutzig worde. Mir si de däm chli nachägange u hei miter Hiuf vor Nati usegfunde dass dä Flug storniert isch worde. Nur leider het das üs niemer gseit!

Mir hei auso praktisch die ganzi Nacht vo Donnschti uf Friti drmit verbracht usezfinde wies itz witer geit. Z Problem isch gsi das d Airline seit si chöi dr Flug nit umbueche dass muess dr Reiseverastalter mache. Dr Reiseverastalter seit aber si chöi nit umbueche sondern nur ä Guetschrift mache.

Scho gli isch 5i am Morge und voruse wartet üses Taxi wo üs a Flughafe söt bringe füre Inlandflug uf Mexiko City. Mir probiere z Cancun am Flughafe no diräkt ä Flug id Schwiiz z bueche, hei aber ke Chance. Die meischte flüge über d USA oder Kanada u dert brüchte mir no äs Visum was so churzfrischtig natürlech nit müglech isch.

Auso flüge mir mau nach Mexiko City. Nach ewigem hin u här zwüsche Airline und Reiseveraastalter entscheide mir üs eifach säuber ä nöie Flug z bueche ir Hoffnig dasmer de das Gäud vor Reiseversicherig zrügbechöme. Leider finde mir aber ersch ä Flug für am Samschti Abä, aber houptsach mit chöme irgendwie hei!

Nach däm riiiise Theater gö mir afang mau öppis feins ga z'Mittag ässe😅 Mir bringe üsi Sache is Hotel u erkunde am Nami de no chli Mexiko City.
Mir si sehr positiv überrascht gsi vo dere Stadt! Wunderschöni Gebäude u Strassä, so hätte mir üs das gar mit vorgstellt😁

Zum z'Nacht gits ä feine Hamburger und Tortas u nähr gö mir aber de gli is Hotel. Nachdäm mir letscht Nacht quasi nüt hei gschlafe fröie mir üs scho mega ufs Bettli😴😴Read more