Pushkar!

Pushkar isch es troumhafts Dörfli umne Piugersee wo d Hindus verehre. Dert het dr Brahma (Schöpergott) e Lotusblüete la gheie u de isch quasi ir Wüeschti e See entstande! Dr Gandi het e Teil vo sich dert la beärdige u drum isches für vili Inder e heilige u mytische Ort. Gliichzitig isches es Travellerkaff mit aune Schattesite vo das mit sich bringt u het wohl Vieles a Scharm wos sicher mau het gha iibüesst. Nach Delhi aber isches e ungloublech gmüetleche u friedleche Ort gsi um in Indie aazcho. Pilgerer, d Händler und ou Travellers gäbe e entspannti Mischig. Es gmüetleches i Tag ine läbe u sich de chliine grosse Kulturungerschiede bekannt u vertrout z mache. Da wär zum Bischbiu "nid Nei" säge. Was immer me e Inder fragt oder mit ihm verhandlet..es chunnt kes klars Nei. Me mues ar Körpersprach erkenne öb Nei oder Ja oder weiss nid. Nei wär e Beleidigung und wird vermide. Mir hei üs de bi aune Bättler, Händler und angerne Lüt wo öppis vo eim wei ("Selfie please") im "nid nei" säge güebt. Mit "Thank you very much" und "it's so nice" oder "have a wonderfull day" gmischt mitere unmissverständleche Körpersprach klappt das wunderbar u fühut sich viu besser a aus eifach "No" ds säge.
Scho chli schwieriger isches mit dr indischi Chopfwackugeschte..es liechts hin u här vo Ungerchifer u Chopfpartie i die jewils angeri Richtig. Es heisst nid öppe Nei, es heisst ou nid ja, es heisst o nid Danke oder iiverstande oder scho rächt..eigentlech heissts eifach i ha di ghört, i ha di wahr gno..dr räscht blibt Spekulation beziihigswiis muesme usem Buuch use gspüre öpps itz es Nei, es Ja, es Danke oder es Iverstande isch. Doch ou für das chunnt me mit dr Zit es Gspüri über... Nach chli praktischem Trainig vo de Gsichtsmuskle u Probe ufs Exempel i de Strasse vo Pushkar muesi säge isch das no ganz gäbig. Mängisch längt scho es liechts Chopfwaggle um ufdringlechi Müettere mit ihrne chliine Ching ufem Arm wo paar Rupies fürne Bättlerorganisation wei er jammere, loszwärde. Oder ihne ds zeige, dasme se zwar ghört het aber ke witeri aktion ( wie z.B. z Portmonet füreznäh) im Sinn het u me wird nid wiiter bedrängt. Mir hei auso scho einiges übere indisch Autag dörfe lehre u versuech üs es bizli ds integriere. Dadrzue ghört ou durch stinkendi Kloake waate, frächi Affe verjage u, natürlech viiu Chai-Tee trinke. Näbe däm, git eim Pushkar unzähligi Müglechkeite sich vom Autag zrüggzzie.
Üsi Erholigsinseli si gsi:
- Säubergmachte Kaffi am Morge usem Esspressochocherli (yes i ha dr Bänzinchocher aabracht u nüt abfgacklet),
- Abestimmige i de Rooftoprestaurants
- es verpönts Aperodrinkli im Paumegarte.

Pushkar het üs auso mega guet ta nach Crazy Delhi u üs dr indische Kultur u am indische Alltag es Millimeterli nöcherbracht.

Pushkar, adieu! Jodhpur, mir chöme!Read more