Tyhjennä haku
Mexiko-Kuba-Hawaii
  • aannasu
  • Alain Wohlgemuth

Mexiko-Kuba-Hawaii

April - Juli 2019 Lue lisää
SeuraaYhteenvetoKalenteriJaaJaaToivelista
Uusin ensin
  • Mexiko-Kuba-Hawaii

    Havanna & Therapie

    28. toukokuuta 2019, Kuuba ⋅ 🌧 27 °C

    Mir sind in Havanna acho un direkt is Casa Particular wo sehr schön isch. Chuchi terasse wöschmaschine. Im Spital hemmer en Termin für am Mentig gmacht gha ide Physio. Bis dem hemmer chillt, usgruuebt, pasta kocht, massiert gschlafe. Den simmer am Mentig idt Physio nach langem Warte im Spital. SDehne und massiere selber het aber sho biz ghulfe. Voralem stah isch ned so agnehm. Laufe und sitze gaht besser. Mer hend gad für vier täg jede Tag ei behandlig abgmacht. Shilft zwar ned so fescht wie ide schwiiz aber de therapeut de Carlos isch super nett und helfe tutz trotzdem. Sis Credo isch immer: Don’t worry oder keine sorge wie mir im biibracht hend. Am abig simmer amel as meer füre uf dt muur go höckle.
    Die Andere sind während desse go riite in trinidad und go bade in varadero und chemed morn den in havanna ah. Leider spalted sich de Lazi den vo de Gruppe ab zum dt Nevia in Columbie go bsueche. Ab den simmer no 4 wo uf hawaii gönd. Moira Juli Anna und ich.
    Dt Anna und ich hend Cuba langsam gseh. Leider hemmers ned so fescht chönne gnüsse wie erhofft wel cuba halt chli schmutzig und zrugg bliibe isch mit autos und architektur. De Kommunismus het em land sicher ned zu guet ta idere hiisicht. Darum freue mier eus umso meh chene wiiterzgah in drü täg.    Lue lisää

  • Mexiko-Kuba-Hawaii

    Aloha!

    31. toukokuuta 2019, Yhdysvallat ⋅ 🌫 30 °C

    Nüt ahnend & unschuldig simmer in Havanna am 1 am Namittag is Taxi iigstige wo eus an Flughafe bracht het. Mini Formulierig verratets scho; s isch denn nöd sones entspannts reisli worde wie erhofft. euse erst flug vo Havanna uf Mexiko City het 2 Stund verspötig gha. Anschiinend hends zwenig Personal gha, wo t Koeffere het choenne is Flugi lade (🙄?). Ufjedefall isch somit euse aschluss z Mexiko City flöte gsi und mer hend denn vo Interjet en andere flug für am 7i am Morge buecht überchoo. Mer hend denn öppe 7 Stund ufenthalt dete gha & versuecht chli z chröse, aber natürli schlafts sich ufem Flughafebänkli nöd eso guet. Mer hend au versuecht fuer nachher de Flug vo LA uf Honolulu, womer ja denn logischerwiis au verpasst hend, en ersatz z finde mithilf vo de Siite, uf dere mer d Flüg am Afang buecht hend. In LA denn acho am negste morge hemmer scho denkt, sie hend eus en Flug choenne bueche. Das isch denn schlussendlich doch nöd gange... und mer hend versuecht selber no en Flug z bueche, was denn aber leider nur für de Alain & mich klappt het, weshalb mir jetzt auscho in Honolulu im AirBnb sind. T moira & de juli sind no e nacht z LA, und chömed morn morge nah.
    Mer sind mega lieb & herzlich vo eusne Gastgeber daa begrüesst worde & nachher gömmer no churz an Strand, wo recht i de nöchi isch.    Lue lisää

    Katso käännös
  • Mexiko-Kuba-Hawaii

    Honolulu, Oahu

    5. kesäkuuta 2019, Yhdysvallat ⋅ 🌫 25 °C

    Am 2. Juni am Morge sind de Alain & ich go Zmorge esse imene sehr feine Kafi fast am Strand. Denn hemmer am Waikiki Beach es Surfbrett gmietet und de Alain het mer bitzli Surfe biibracht, was mega Spass gmacht het (am negste Tag het mer eifach ALLES weh gmacht). Denn simmer no churz paar chlini Sache go poste & öppe am halbi 1 am Namittag sind t Moira & de Juli acho. Wiedervereint simmer denn nomal an strand (selbstverständlich hets zerst no en Nap geh), go shoppe und denn go esse. Am negste Tag simmer mit em Bus go Zmorge esse. Denn hemmer eigentlich welle Pearl Harbor go aluege, aber de wiit Weg & de hoech Priis hets eus denn chli unsympatisch gmacht & mer sind stattdesse an Strand. T Moira & de Juli sind no go Surfe. Am Abig hemmer welle uf de Diamond Head ufe, zum vo det us de Sunneuntergang go luege. De isch aber scho abgsperrt gsi will mer z spaat gsi sind, und mer sind denn kurz entschlosse stattdesse is Kino de neui Aladdin go luege (😍😍😍😍😍). Gester Morge het de Alain uf de andere siite vo de Insle, in Kailua, en Termin gha binere Osteopatin. De Juli & Moira sind währenddesse an Kailua Beach, wo miir nach em Termin au no churz gsii sind. Mer sind denn zrugg & denn uf de Diamond Head ufe, womer die schoen Ussicht gnosse hend. Hütt simmer wieder im gliche Kafi go zmorge esse wo de Alain & ich am 1. Tag gsii sind. Denn simmer churz go shoppe & denn an Strand. Det simmer denn de ganz Namittag gsii & sind jetzt wieder zrugg i de Wohnig am
    iichegge für de Flug morn uf Hilo.    Lue lisää

    Katso käännös
  • Mexiko-Kuba-Hawaii

    Hello Big Island, Hilo Side

    7. kesäkuuta 2019, Yhdysvallat ⋅ ⛅ 28 °C

    Am Dunnstig Morge hemmer packt & sind an Flughafe. Ca 50 min simmer denn vo Honolulu uf Hilo gfloge. Leider simmer zfrüe dete gsi, und nachdem mer s Mietauto gholt hend, simmer drumm zu de Rainbow Falls und de Peepee Falls gfahre & dete go bädele. Nach paar Stund dete hemmer denn chöne zum Airbnb womer vo de Gastgeberin Teresa & ihrne zwei Labradoodles (Mischig zwüsched Pudel und Labrador) Cooper und Fritter begrüesst worde. Mer sind denn de Rest vom Tag eifach fuul umeglege. Ich han endlich wieder mal chöne bache 😍 und han no Bananebrot gmacht. Gester simmer denn nach usschlafe in Vulcano National Park. Leider isch det vill abgsperrt bzw nonig offe gsi, da de Kilauea ja erst gad usbroche isch & dt Weg zum Krater it nöchi luut dene vom Park no am ‘schaffe’ und drum ned sicher sind. Mer hend denn eifach t Steam Vents ahgluegt, das sind Löcher wo Wasserdampf und Schwefel use ‘steamt’. Denn simmer no uf en Ussichtspunkt womer en andere Krater het chöne aluege, de Mauna ulu, und sind denn auno uf de Krater ufe.
    Am end vom tag simmer all recht erschöpft gsii. Trotzdem hets no e Grillade geh (Julian). Grad bi eusere Wohnig hets no enart chliini Terrasse mit emene Grill, womer natürli nöd ungnutzt hend chönne lah. Mer hend denn gmüetlich verusse gesse & no eine vo de Frösch gsichtet, wo die ganz Ziit (va i de Nacht) en saulärm mached. Hütt simmer an Punalu’u Beach, en Strand mit schwarzem Sand. Dete hemmer denn sogar e Schildchrot bim esse chöne beobachte. Denn simmer no go poste & jetzt hemmer grad Lachs mit Nudle (Alain) zum Znacht gha.    Lue lisää

    Katso käännös
  • Mexiko-Kuba-Hawaii
    1

    Hello Kona Side

    9. kesäkuuta 2019, Yhdysvallat ⋅ ⛅ 27 °C

    Am 9. Juni am Morge simmer anen grosse Farmer’s Market, enart Märt mit Frücht, Gmüess, allgemein Essens- und Saftständ, Kleider, Chetteli ect. Dete hemmer paar Sache pöstelet und natülich gesse. Nachher simmer in Zoo. De iitritt isch gratis gsi & es het vor allem Affe & Vögel gha, aber überraschenderwiis au 2 Tiger, en wisse & en normale. Mega schöni Tier, dementsprechend vill Ziit hemmer au vor dere ihrem Gheg verbracht, bis mer denn verschücht worde sind, will de Zoo gschlosse het. Denn simmer no zumene Wasserfall go bade. mer sind es ziitli emene Fluss entlang gloffe und hend en mega schöne Ort gfunde zum bade, womer ganz ellei gsi sind. Nachher simmer zrugg go Pasta (Moira) esse. Am 10. Juni het de Alain en Massage Termin gha in Hilo für sin Rugge. De Masseur isch mega en interessante, liebe Mensch gsi womer vill mitem gschwätzt hend. Nachher hemmer t Moira & de Juli wieder troffe, womer vorher z Hilo abglade gha hend, und sind zu de Akaka Falls, mega grossi wasserfäll, womer aber leider nöd hend chöne bade. Denn simmer no zum Honoli’i Beach Park, womer t Sunneuntergangs-stimmig gnoss hend. Go bade isch niemmer det, wills z chalt gsi isch. Am abig hets Herdöpfelgratin geh (moi). Am Ziistig hemmer eusi Sache packt, sind churz imene Kafi epis go esse & denn nomal bi de Rainbow-Falls go bade. Gege die 4i/5i hemmer eus uf de Weg gmacht zum ca 4205m höche Mauna Kea. Mer sind vorher no inen Supermarkt zum eus Sache chaufe womer denn Picknick-mässig dobe hend chöne esse. Bim ufefahre hemmer zwar Pause gmacht, zum eus akklimatisiere (und damit de Alain sich chan vergwüssere, das mer nöd die einzige sind, wo kein 4x4 hend - leider ischer nachher nome beunruhigt gsi, will mer doch recht die einzige gsi sind), aber womer dobe acho sind, isch eus doch allne bitzli schwindlig gsi. Trotzdem hemmer de wunderschön Sunneuntergang mega gnosse. T sterne sind leider nöd so schön gsii wie erwartet, will de Mond z hell gsi isch, aber s isch trotzdem es cools & speziells erlebnis gsi.
    Am 10i am Abig simmer denn da z Kona im neue Airbnb acho. Vo dem Huus bzw vo dere Wohnig simmer bis jetzt mit abstand am meiste begeisteret. Hütt hemmer usgschlafe, sind denn de ganz Tag am White Sand Beach gsii und nachher no go poste. Jetzt gahts nach Pizza (moi) go chröse.    Lue lisää

    Katso käännös
  • Mexiko-Kuba-Hawaii

    Last Days In Kona

    15. kesäkuuta 2019, Yhdysvallat ⋅ 🌙 21 °C

    4 Täg zum Todschlah. Seinzige wo staht isch de Znacht wo jede vo eus eine macht.

    Tag 1
    Kaffi Farm Tour. 10 Dollar für die ganz Gruppe - Fair. Gaht nume 5 min. Nüm so Fair. Trotzdem schöni Ussicht, vo lawa gformti höhli, Kafi Pflanze und Gratis Kaffi am schluss. Wiiter gaht de Tag an Strand. Dur es Lawa Feld ufere Holper strass simmer nach 20 minute amne Strand acho. Ab go schnorchle. Juli und Ich (Alain) findet 15 minute nüt ussert zwei drü fisch. Plötzlich pakt mich de Juli am fuess und zeigt durs trübe wasser uf eppis grosses ide Ferni. En Manta Roche. So schnell er cho isch so schnell hemmer en au us de auge verlore. Verzwiifled hemmer en gsuecht und sind isini richtig schwumme. Plötzlich pakt mich de Julian Nomal und zeigt uf zwei meeres schildchrote. Und wels gad so schön gsi isch hemmer gad no eh dritti gseh. Alli drü hend fridlich seegras gfresse. Eusi aweseheit het si nöd gjukt. Spöter het de Juli es volleyball feld baut. Ja. Baut. zwei riise Äst und en Palmwedel us demm ich no es irgendwas gflochte han eifach us spass. 3 mal uf elf hemmer gspillt. Giele geg. fraue. Natürlich hemmer sie gwünne lah. 2 zu 1 für dt Fraue hemmer sganze beendet. Bevor mer hei sind hanich no churz mit zwei schwiizer gredt. Nenner mers mal Ueli und Umbert. De Ueli und de Umbert sind ide Ferie und schaffed süsh. sind gleb so 25 gi gsi
    Dihei hets Fajtias vo mir und de anna geh.

    Tag 2
    Waipio Valley
    1 h30 Fahrt und scho simmer det. Riiise Kliffe am Meer entlang. Welmer ken 4x4 hend unds 17 grad stiigig het laufemer. nach 40min chemmer amme black sand beach ah mit ultra fiinem sand. unterwegs hemmer avocados papayas banana und pomelos gfunde. Alli unriif. Noice. Nöd nur frücht sondern au eppis anders hemmer gfunde. De Ueli und de Umbert. Die zwei freche Cheibe hend natürli en 4x4 und hend gschneu in 10 minute chenen ufefahre. Währemer ned gad acho hetteds eus gad chene ufe mitneh. Serscht mal wommers lang schlafe bereued. Trotzdem en lustige Zuefall gsi die wieder zgseh. Nach Kokussnus esse vom Juli und chille am Strand simmer wieder ufe. 1h ischs gange. Rechtziitig für de Sunneuntergang simmer acho. Nachr heizue. Gesse hemmer Crepes vo de Moira und de anna. Fein Gsi.

    Tag 3
    Nomal wandere. James Cook Monument. 40 min Wanderweg dur Gebüsch und vulkan gestei a ziege verbii. Monument isch ned so speziell. De James Cook isch de Dude wo Hawaii entdeckt het. Also de erst us de Westliche welt zumindest. Polynesier sind ja sho det gsi. und bi dem monument isch er als ersts glandet in ganz hawaii. Spannend. Det simmer bi strache strömige go schnorchle in zweier teams. Leider kei schildchröt defür schöni koralle und fischli.
    Nachher ufelaufe.
    Dt anna hetme eltere ma wo abe gloffe isch gseit es lohni sich ned nur fürs monument abe z gah. Mer hend vermueted er isch nachr wieder ufe. Ich han dt brülle Vergesse. scheisse. umchere. Bim zrugg laufe zum dt brülle hole lauft mr de glich ma entgege. Mit de Brülle. Nice. Obe acho fangts gad ah schiffe. Heizue.
    Grillade vom Julian und de moira giz zum Znacht. Ufrume wel morn gömmer. Packe. Film luege. Ab go pfuuse.

    Tag 4 ide Zuekunft
    An flughafe, auto abgeh, Uf Kauai flüge. Fortsetzig folgt...    Lue lisää

    Katso käännös
  • Mexiko-Kuba-Hawaii

    Hello Kauai, "Garden Island"

    18. kesäkuuta 2019, Yhdysvallat ⋅ ⛅ 29 °C

    Am 16. Juni simmer vo Kona uf Lihu’e uf de insle Kauai gfloge, en Flug vo schüche ca 50 min. Mer sind acho im Hotel (!), wo mer fuer die nögste 8 Nächt werded bliibe. Das zimmer womer hend hemmer ueber Airbnb gmietet, mer chönd aber trotzdem vo allne agebot im Hotel profitiere, inklusive Pool (juhee). Besagte Pool isch denn au natürli grad inspiziert worde. Am spötere Namittag hemmer denn no welle öppis mache, und sind no zu de Wailua Falls gfahre. Die sind aber nöd sooo interessant gsi, will mer nöd het chöne abe go bade (nöd bade -> wasserfall langwilig). Mer hend denn no versuecht en lookout z finde, und hend denn debi aber nur de sleeping giant trail head gfunde, wos lang gange wer zum ue laufe. Mer hend denn no churz en Park am Meer ahgluegt womer denn beschlosse hend, mal det z grilliere. Denn simmer im coconut market place go znacht esse und ich ha no shaved Ice usprobiert, wo denn de Juli het döfe (müse) fertig esse, wills VILL zvill gsi isch.
    Am 17. Juli hemmer im hotel zmorge gesse und sind den zu de hoopii falls. Dethi füehrt en Wanderweg, vor allem dur Wald, wo immer mal wieder bitzli über umgstürzti Bäum und ufe und abe chlettere beinhaltet het. Bi de Wasserfäll hemmer eus denn chöne abchüele. Nach de wanderig zrugg simmer go poste fürd grillade und sind zum lydgate park (de womer gester agluegt hend) go grilliere. Mer hend vill zvill kauft, weshalbs nomal e grillade wird geh dete. Womer zrugg gsi sind simmer no in whirlpool und denn go chröse.
    Am 18. juni simmer nachem Zmorge bimene coole Foodtruck uf em Kalalau Trail go wandere. Recht illegal hemmer det parkiert und sind (wiemer erst nachher cheggt hend) de Wanderweg au recht illegal abe gloffe. De Weg isch wunderschön gsii mit Blick uf de Meer und zmizt i de grüene Natur. Mer sind bis zumene Strand abe gloffe und det go bade imene chline Süesswasser Seeli, wo sich aahgsammlet het weg de Wasserfäll wo zum Strand abe flüssed. Mer sind nachher alles wieder zrugg gloffe und imene chline, herzlige Dörfli imene mexikanische Foodtruck go esse. Nachher simmer no anen Strand de Sunneuntergang go luege. Im Hotel hemmer eus denn sehr müed uf de kommendi Muskelkater iigstellt vo de beide Wanderige i de letschte Täg.    Lue lisää

    Katso käännös
  • Mexiko-Kuba-Hawaii

    Jurassic Falls, Monkseal & Waimea Canyon

    22. kesäkuuta 2019, Yhdysvallat ⋅ ⛅ 28 °C

    Mer sind denn am 19. juni putzmunter und doch ohni muskelkatergo zdritte go zmorge esse (wer de zmorge des schlafes wegen usglah het, mueni glaub nöd erwähne 😉). Denn simmer churz an Pool, und denn sind de alain & ich en helikopterfluug go mache, während die andere zwei am Pool bliebe sind.
    Es isch es mega beidruckends & wunderschöns erlebnis gsii! Mer hend sooo vill gsee, womer sust nie t chance gha hettet z gse. De Pilot het alles erklert & verzellt & mer het gmerkt, wie gern er sini heimatsinsle het. Dezue isch ueber t chopfhörer no t filmmusig vo verschiedene film wos da dreiht hend gloffe (Pirates of the Caribbean, Jurassic Park, bi dem simmer denn grad ueber t « Jurassic Falls » gfloge, Indiana Jones...)
    Mer hend no es Foti mit em Pilot defe mache & sind denn zu de Moira & em juli zrugg. Mer sind denn go poschte & nomal det am Meer go grilliere.
    Am 20. Juni simmer an Poipu Beach park, womer cha schnorchle, surfe & eif am Meer sie. Mer hend dete sogar en Seehund gse! Sie hend um ihn ume alles abgsperrt gha, damit er in rueh gla wird, aber mer het en trotzdem sehr guet choenne bim sünnele bestuune. Spöter am Namittag het eus denn no en betrunknige Maa ahgsproche, wo em Juli & em Alain eppe 7 mal die glich gschicht verzelt het, während dt moira & ich am volleyball spiele gsii sind.
    Mer sind nachher ines Resti go znacht esse, und denn nomal in Whirlpool.
    Am 21. Juni sind de Alain & ich am 5.30 uf, zum de Sunneufgang am Meer go luege, was mega schön gsii isch. Nach nomal 4 Stund schlaf simmer go Zmorge esse im Hotel. Denn simmer zum « Spouting Horn » en Ort, wo s meerwasser us emene loch im stei use spruetzt. denn simmer zum red dirt waterfall. Beides isch ufem weg gsi zum waimea canyon, womer denn verschiedeni ussichtspünkt abklapperet hend, mengisch ischs aber zu neblig gsii zum wuek vill gsee.
    Nachher simmer an Kalapaki Beach, womer aber nüm sind go bade sondern eifach chli am fuulenze. Mer hend imene Resti nebedra Pizza gholt & sie am Meer gesse. Am abig simmer no abe an Whirlpool, und mer hend mega vill Frösch gsee🐸.    Lue lisää

    Katso käännös
  • Mexiko-Kuba-Hawaii

    Hello Maui, Napili-Honokowai

    26. kesäkuuta 2019, Yhdysvallat ⋅ ⛅ 27 °C

    In de letschte beide Täg in Kauai hemmer nüme allzu vill gmacht, dt Moira & de Juli hend no de Helikopterflug gmacht am 2. letschte Tag und nachher simmer an Pool go sünnele, und am letschte Tag isch sehr schlechts Wetter gsii, womer eifach am fuulenze gsii sind im & ums Hotelzimmer.
    Am 24. früe am Morge hemmer denne euses Mietauto abgeh & hend s Flugi gnoo ufd Insle Maui, s letschte Kapiteli vo eusere Reis. Mer sind denn zfrüe det gsi & hend drum noni is Airbnb chöne, und sind no an Strand bi Lahaina, denn go esse & go poschte, und denn hemmer is Airbnb chöne. Det hemmer churz chillt & am Abig hets Pasta geh (Moira). Nachher simmer no churz an Strand wo gad nebed eusem Airbnb isch. Gester simmer zerst zu de Honolua Bay go schnorchle, sind denn aber ned zlang gsi, wills en Steistrand isch wos nöd sooo gmüetlich gsi isch zum ligge. De Alain & ich hend e Muräne gsee und e Schildchrot! Mer sind nachher no an Kapalua Beach. De alain & ich sind nomal go schnorchle & mer hend nomal zwei Schildchrote gse😍. Dehei hets Pizza geh (moi) & de juli dt moira & ich sind nomal churz da an strand go höckle wos scho dunkel gsii isch. Jetzt hemmer grad zmorge gesse & gönd hütt an Beach.
    (leider gits no kei fotis, folged denn!)    Lue lisää

    Katso käännös
  • Mexiko-Kuba-Hawaii

    chli Bay, chli Trail, VILL Beach

    28. kesäkuuta 2019, Yhdysvallat ⋅ ⛅ 27 °C

    Am 26. Juni simmer an Oneloa Beach (wieder e Schildchrot gsichtet!) wo va t Moira isch go bodyboarde. Leider isch de Bode steinig gsii & ihri Füess gsend jetzt nüm so ästhetisch us. Am Abig sind de Juli & dt Moira no mitemene Uber uf Lahaina, de Alain & ich sind dehei blibe, hend kocht und Film gluegt. Am 27. simmer zum Nakaleke Blowhole, en mega schöne Ussichtspunkt ufs Meer wos aber saumässig gwindet het. Denn hemmer de Ohai Trail gmacht, en churze Wanderweg mit ebefalls schöne usblick ufs Meer use. Nachher simmer zu de Olivine Pools, chlini Pools bzw Wasserlöcher im Stei am Meer, wome cha bade. Mer sind denn recht früe zrugg gsii & no vis a vis an Strand go ligge & im Farmers Market nebedraa go Snacks chaufe. Hütt simmer am Kaanapali Beach gsi. Det hemmer au chöne go surfe, wos eus ordentlich verschnätzlet het. Jetz hemmer grad Zmittag/Znacht gesse & gönd no uf Lahaina spöter.Lue lisää

    Katso käännös
  • Mexiko-Kuba-Hawaii

    Road to Hāna

    1. heinäkuuta 2019, Yhdysvallat ⋅ ⛅ 29 °C

    Am 29. Juni simmer zum Iao Valley gfahre & hend unterwegs no bimene lookout ahghalte. I dem Valley simmer denn imene Fluss go bade, wobii eus en nette, aber recht spezielle maa ahgsproche het & eus verzellt het, was fuer luege s « governement » eus alles unterjubled. Nach dere höchst belehrende (s governement kontrolliert anschinend s wetter, mini dame & herre) begegnig hemmer eus uf de heiweg gmacht & sind unterwegs no amene strand de sunneuntergang go luege.
    Am 30. Juni hemmer eus, nachdem mer s gmietete Camping Züg z Kihei abgholt hend, uf de Weg zum « Road to Hana » gmacht, und wills chli vill gsi isch was mer det alles gmacht hend, fassi das churz zeme:
    - ho’okipa beach park (ussicht ahglueht & de surfer zuegluegt, schildchrote gsichtet!)
    - twin falls (zvill lüt aber schön -> nöd go bade -> wasserfall ohni bade -> langwilig -> nur churz blibe)
    - bamboo forest (sehr schöni wanderig dur en wald nur mit bambus, sind det no churz go bade)
    - garden of eden (nur churz go esse hehe)
    - upper waikani falls (nur moira & juli sind go bade, drum so mittelmässig lang blibe)
    - Bi eusem camping platz acho; Honokakani Beach, zelter ufbout, go esse, go schlafe
    1.Juli
    - Sunneufgang go luege am Strand, nachher alli nomal go schlöfele, zmorge, zemmeruume
    - churze Trail vom platz uus
    - kaihalulu red sand beach gsuecht & ned gfunde
    - ohe’o pools nöd chöne bade (langwilig)
    Alles in allem ischs mega schön gsii. Mer hend denn zrugg in Kihei s camping zueg wieder abgeh & sind go poste & zum airbnb gfahre. Znacht isch Pizza gsi (Aläng) & bald gömmer go chröse.    Lue lisää

    Katso käännös
  • Mexiko-Kuba-Hawaii

    Last Day in Kihei

    6. heinäkuuta 2019, Yhdysvallat ⋅ ⛅ 31 °C

    Die letschte täg in Maui hemmer vor allem mit fuulenze i de verschiedene Beach Parks daa verbracht. Natürli hemmer auno fein gesse; freestyle ceasar salat (moira), cinque-p (juli) und crepes (moi).

    Am 4. Juli hemmer eus eigentlich es grosses fürwerch erhofft, womer denn leider entdüscht worde sind, vilicht hemmers au verpasst. 🤷🏼‍♀️

    Am 5. juli hemmer nomal grilliert und hend am pool gesse & sind nachher am strand de sunneuntergang go luege.

    De 6. Juli hemmer denn sehr sehr fuul im huus & am pool verbracht. Am Abig simmer no teil gsii vomene Lu’au; es hawaiianisches Fest, mit Buffet & Show, was en mega schöne chline Abschluss gsi isch für eusi gross reis. Nachher simmer hei go packe.    Lue lisää

    Katso käännös
  • Mexiko-Kuba-Hawaii

    Heicho heicho heicho grad jetzt 7-9 Juli

    9. heinäkuuta 2019, Saksa ⋅ ⛅ 16 °C

    7 Juli
    Ufgstande, check in mache, merke dasmer zersch no es visum für Kanada bruched, brüelle, notfall eis beaträge wo grad per mail cho isch, erliechteret i checke.

    Nachher hemmer fertig packt alles is auto gruumt & sind an beach. Det simmer chli verfuult, s het no geile zmorge ge (waffle, avocado brötli, egg benedict) und zmittag/znacht (mahi burger, quesadillas), denn simmer gos mietauto abgeh und sind 3h zfrüe am flughafe gsii. Nach bag drop und security check het nomal gheisse warte. Denn hemmer de ca 6h flug uf vancouver uf eus gno.

    8. Juli
    Glandet in Vancouver. Gepäck abgholt und eppis go esse. Den hemmer no 4h müsse todschlah bis check in. Stattesse sind mir eifach tod gschlage go penne. Bim check gfregt ebmer de koffer grad uf ZRH chend wiiter schicke. Positiv. Dt chance dasmer de flug schaffed sind guet. Pizza esse und ab is flugi. 9h 20 min hocke. Göttlicher wiis hets gnueg platz dasich chan ligge wases sehr vil agnehmer macht mit rugge weh🔥

    9. Juli
    Achoo in Frankfurt! Nomal churz durt sicherheitskontrolle & denn zum gate. Denn hemmer bald is flugi chönne & sind nach ere knappe stund flüge denn endlich z Züri glandet. Jetzt laufemer use & gsend all wieder 😍
    Anna isch safe & happy dehei. & die andere drü natürli au.😊
    schön wars♥️    Lue lisää

    Katso käännös
    Matkan lopetus
    9. heinäkuuta 2019
  • 2025© FindPenguins
  • Koti
  • Tietoa meistä
  • Ryhmän seuranta
  • Lehdistö
  • Ehdot
  • Yksityisyys & Cookies
  • Ohjekeskus
  • Merkintä