Lan Ha Bay (Tag 1)

Dia letschta 2 Täg han a Bootstour in dr Lan Ha Bay mit Übernachtig ufem Boot und ganz a huufa coola Aktivitäta gmacht.
Als erschts simmer as schwimmends Dorf goh aluaga. Denn simmer wiiter gfahra zwüscha unzähliga Karstfelsa duura bis zum na klina Bootaleger. Döt simmer denn usgschtiiga und hend a klini Velotour durch dr Nationalpark zum na kliina Fischerdorf gmacht. D Landschaft do isch dr Hammer, alles mega grüan. Im Dorf hemmer denn no kli meh über Cat Ba Island, dr Nationalpark und dia verschidena Tiar dörfa erfahra und am Schluss au no könna a Fisch-Massage usprobiara. Also natürli hemmer nit Fisch massiart, sondern üsi Füass in as Becki mit Fisch könna inaheba, dia machen denn dia abgstorbena Huutpartikel wäg. Aber Afang rächt ungwohnt, aber mit dr Ziit rächt agnehm und liicht kützlend 😆.
Nochär ischs mim Velo zruck zum Boot und denn wiiter in an andera Tail vur Lan Ha Bay ganga. Döt hemmer denn im Meer zwüscha all dena Karstfelsa könna bada/schwimma... und wiit und brait kai anderi Lüüt. Nochem Bada häts denn Zmittag gäh ufem Boot. Z Ässa isch unglaublich gsi - a riisa Uswahl und super fain 😋.
Nochem Zmittag hemmer denn uf as grössers Boot mit Schlofkabina gwächslet und üsi Zimmer bezoga. Vum gröösera Boot us hemmer denn a Kajaktour gmacht durch a Höhli wo in a versteckti Laguna füart. In dära Laguna hemmer denn schön Ziit kha zum Kajak fahra und au nomol schwimma.
Zruck ufem Boot hemmer kli tschilla könna bis es denn Znacht gäh hät. Au zum Zacht hends mega viil verschideni, mega faini Sacha uftischt.
Nochem Znacht hemmer denn nomol a Kajaktour gmacht zum biolumineszents Plankton goh aluaga (sorry, loht sich nit so aifach fötala). Miar sind alli völlig gfläscht gsi und hend wia klini Kind mit da Händ immer Wasser umaplanscht und mit üsa Paddel Wasser umagsprützt (denn gseht mas am Beschta). Denn isch denn au schu bald Ziit gsi zum go schlofa....もっと詳しく