Lan Ha Bay (Tag 2)

... i han super gschlofa ufem Boot, aini vu da beschta Nächt sit i do in Viatnam bin 😊. Und d Ussicht am Morga usem Fenschter isch aifach genial gsi.
Am zwaita Tag simmer nochem Zmorga vu 2 klina Ruaderböötli abgholt worda. Miar hend denn a Höhli mit Tropfstai und nomol a versteckti Laguna könna goh aluaga - zum Glück hemmer hüt nit müassa sälber paddla, as isch nämli zimli windig gsi am Morga.
Nochem Usflug mit em Ruaderböötli simmer zruck uf üses Cruise-Boot und denn no in a andera Tail vur Bucht gfahra, wo miar nomol hend könna bada, bevors denn laider schu wider Ziit gsi isch zum üsi Koffer etc. z packa und "uszchecka".
Miar hend denn no andera super faina Zmittag kriagt ufem Schiff, bevor miar denn vum klinera Boot (das Boot, wo üs am erschta Tag ufs Cruise-Schiff brocht hät) abholt und zum Hafa zruckbrocht worda sind.
Uf Hafa simmer denn alli wider in üsi Hotel resp. uf da Bus brocht worda sind.
I han gar nüm vum Cruise-Schiff weg wella, as isch so schön gsi und i bin immerno völlig gflasht vu dära Tour mit dena viila Iidrück, Aktivitäta und vor allem vum bioluminesziarenda Plankton 🤩😍🤩もっと詳しく