Te Pa Tü

Hüt Obe hei mir es Maoriadventure buechet. Si zum Zentrum gfahre, hei üs no chli usgrueiht, dassmer de möge dürehaute bis am 12.00i. Süsch gö mir ja immer spätischtens am 10 ni go lige (auso d Froue), d Manne gö meischtens scho ehnder ids Huli.

Am 18.45 Uhr chunnt üs der Bus cho hole und fahrt zirka 20 Minute ines Maoridörfli. Dört starte mir mitere Begrüessig vom Haka. Das isch e Tanz wosi ou im Krieg gmacht hei für em Gägner Angscht i ds jage. Hüt machesis als Tanz und am Bsuecher Respäkt entgäge ds bringe.

De hei mir vier Statione dörfe bsueche. Bim erschte Poschte heimer müesse mit Poibälle (Stoffball are Cordle) Figure istudiere. D Froue üebe das bim Tanz us. Döu heis besser häre brocht, döu weniger…

Bir zwöite Station het der Ädu dörfe bimne Postelouf mitmache. Über Chneble hüpfe uf Awiisig vomne Maori.

Bir dritte Station hets de e Vortrag über d Gschicht gä. Hei nid ganz aus so guet verstange. Aber d Häppchen si guet gsi zwüsche düre.

Am letschte Poschte heisech üsi Manne aus Maorikämfer chönne lo usbilde. Ig hoffe si wändes nid a uf üsere witere Reis…

Nächer simer widr ungerhaute worde vo Haka und Gsäng. Sehr idrücklich, das Live ds erläbe.

Itze hei mir üs es feins, Iheimisches zNacht verdient. Isch sehr fein gsi.

Zum Schluss het üs de der Chauffeur widr zu üsem Camper gfüehrt.Читать далее