Surfside beach

Die letschte 4 täg hämmer in surfside beach under houston verbracht. Womer acho sind hämmer grad s badzüg montiert ond send ab a strand 😍 mer händ nor öpe 50 meter vom meer entfärnt gschlafe. Am erste obig simmer no e halb stund am strand entlang is dörfli gloffe ond det ine bar mit live musig. Es hed sich als lustige obig usegstellt. Mer send als schwiizer d attraktion vo der bar gsi, händ met allne müesse astosse ond de erich schlussändlich no met de band eis spiele 😉
Am nächste tag hämmer nomol de strand gnosse. Am obig simmer mit campingstüehl, tisch, ässe, trinke und füürholz a strand. Det hämmer es füür gmacht, znacht grilliert ond zum abschluss no marshmallows brötled 😋
Am nächste morge simmer früeh ufgstande ond uf houston gfahre, mer händ nämlich tickets förs space center gha. Es esch sehr idrücklich gsi: mer händ racketene ond space shuttles gseh, de original kontrollruum vo de erste mondlandig chönne besichtige ond met färngstüürede roböterli marserkundig spiele 😂
Am obig simmer zrug is dörfli gfahre. Üsi barkollege händ üs scho bim letschte mal verzellt dass am samstig denn die grossi st patrick's day party sig ond mer die ja ned dörfed verpasse. So simmer nomol i die bar. All sind verkleidet gsi, es esch tanzt worde, hed guinness bier gä (eifach nor us de fläsche, määsig fein gsi) ond natürlich weder live musig....die händ zwar keis einzigs irischs lied gspielt 🤔 jaaa mer send da wohl doch chli wiiter wäg vo irland ond es esch st patrick's day im texas style gsi 😎
A üsem letschte tag simmer nomol chli am strand umegläge ond de erich hed zum znacht feini älplermagrone gchoched 😉En savoir plus