Reset search
Panama bis Kanada
  • Larissa Krummenacher
  • Erich Meienberg

Panama bis Kanada

A 160-day adventure by Larissa & Erich Read more
FollowInsightsCalendarShareShareBucket list
Newest first
  • Trip start
    November 22, 2022
    Panama bis Kanada

    Immerno dihei

    September 7, 2022 in Switzerland ⋅ ☁️ 23 °C

    Liggä grad im Bett und es gaht no 2 Mönet bis mer abreisid...

    See translation
  • Panama bis Kanada

    Abschiedsparty

    November 19, 2022 in Switzerland ⋅ ⛅ 6 °C

    Mer händ gester met ganz villne vo üch no es letschts mal dörfe fiire bevors losgad 🤩 es esch en richtig schöne abig gsi ond mer händ eifach nor e lustigi ond gueti ziit gha! Danke a allne wo verbii cho send ond de obig so legendär gmacht hend 😘Read more

    See translation
  • Panama bis Kanada

    Abschied

    November 22, 2022 in Switzerland ⋅ ☁️ 7 °C

    De lang erwarteti tag esch denn doch ergendwie plötzlich cho...
    Nachere gar ned all zu guete nacht esches am morge früeh losgange rechtig kloten. Mit chli verspötig wägm stau hemmers denn au gschafft. 🤭 D birgit ond d saskia send als überraschig no a flughafe cho 🤩
    Mer händ all zäme no es abschiedskaffi bzw. -rivella trunke i de bye bye bar. De abschied sälber esch ganz komisch gsi... Esch üs ergendwie gar ned so vorcho als wördemer jetzt tatsächlich so lang wäg.
    Jetzt hockemer im flüger ond flüged ändlich üsem grosse abentüür entgäge 😍    Read more

    See translation
  • Panama bis Kanada

    Panama City

    November 23, 2022 in Panama ⋅ 🌧 25 °C

    Zum mit me möglichst chliine kulturschock i die reis z starte, hemmer üs för e start es chics hotel in panama city usgsuecht.
    Am morge simmer zerst eifach mal sprachlos vor üsem fänster gstande im 23igste stock ond hend die riiiiiesig stadt bewunderet. Da mer rächt früeh wach gsi sind (jetlag ahoi) hämmer uf die 10ni en walking tour dur d altstadt bueched. Wells erst 8i gsi esch simmer z fuess losspaziert. Die vom hotel hed üs gseid es sig sicher, aber voll wiit, mindestens en stund, sie wörd es taxi nä. Mer händ gfonde e stund schaffemer locker! Aber womer am laufe gsi sind hämmer de schnell gmerkt wieso...es esch meeeega heiss! Es hed sich aber trotzdem glohnt. Es esch e schöne wäg gsi am meer entlang mit immer wieder tolle blickwinkel uf d skyline vo panama city.
    D tour esch no interessant gsi aber sehr gschichtslastig. Er hed ganz vill über d entstehig vom panama kanal gred ond wies de bout händ. Drum hämmer üs nachär diräkt ufe wäg det hi gmacht. Mer händ glück gha, chum simmer acho esch au scho s erste schiff cho wo durd schlüüsene hed welle fahre. Es esch sehr spannend gsi, mer send erstuunt gsi wie schnell das gange esch.
    Nachär simmer zrug is hotel. Leider han ichs ergendwie gschafft scho am erste tag öpis falsches z ässe ond so bin ich denn zerst mal flach gläge 🙈🤷‍♀️
    De erich esch am nächste morge sälber chli go d stadt erkunde. Am namittag bini wieder chli fiter gsi ond mer send zäme a pool gläge. Denn simmer früeh is bett da üse transport uf d san blas insle üs am nächste morge am 5.30h esch cho abhole.    Read more

    See translation
  • Panama bis Kanada

    San Blas

    November 25, 2022 in Panama ⋅ 🌧 28 °C

    Mer send im Paradies glandet 😍
    Mer händ ja scho sehr vill guets über d san blas insle ghört aber dere atemberaubende schönheit hed kei beschriibig chönne grächt wärde. I aller früehi esches losgange. Zämequetscht imne gländwage zerst öber normali strasse aber scho sehr bald en abentürlichi strass mit vill kurve ond löcher. Mer send aso zimlich froh gsi wommer nach 3 stund fahrt de chliini hafe zmitst im dschungel erreicht hend. Denn esches mitm me chliine motorböötli losgange richtig inslene, mer send üs vorcho wie de captain jack sparrow höchst persönlich 😅
    Die erst station esch d pelikan insle gsi. Uf dere esch en szene vo de netflix serie "haus des geldes" dreiht worde, drum heds öberall d maskene us dere serie gha 🤭 es esch e wunderschöni chliini insle gsi. Mer händ imne hüttli am strand gschlafe mit sandbode. Mer händ de tag det richtig gnosse mit bade i naheglägne natürliche pools, schnorchle uf de chliine nachberinsle ond am strand umeligge. Zum znacht heds frittierti banane mit fisch gä... Aso so e ganze fisch... mit chopf drah ond allem... Ich ha mich schön müesse öberwinde, aber es hed sich glohnt, esch super fein gsi!
    De abig hemmer mit üsne mitreisende mit cuba libre us de dose und jede menge gelächter la usklinge 😊😉
    Am nächste morge semmer nachem zmorge vom boot abgholt und zu de nächste insle bracht worde. Die Insle esch üses absolute highlight. Mer esch i öpe 5 minute rund ume gloffe und sie bestahd nor us sand und palme 😍 es hed eis chliises hüttli wos zässe gid ond mer es bier cha chaufe (wenns ned grad usverchauft esch) ond eis wc hüttli. Gschlafe werd i zält am strand. Mer händ also de ganz tag uf dere trauminsle gnosse, am abig im hüttli spiili gspielt ond lääre rum trunke, well s bier usverchauft gsi esch 🤷‍♀️😅
    Denn hämmer no chli d stärne agluegt... Es send sooooo vill gsi, eifach traumhaft! Au traumhaft esch de sunneufgang am nächste morge gsi womer grad us üsem zält us hend chönne bewundere 🥰
    De 3. tag esch definitiv de abentüürlichst gsi. Es esch weder früeh los mitm boot. Zerst simmer en insle go aluege wo es kuna volk, also d uriwohner vo det, läbed. Es esch sehr idrücklich gsi! 1000 mänsche läbed ufere munzige insle. Es esch alles äng und dräckig aber d lüüt send alli am strahle ond d chind hend gar ned gnueg übercho vom winke. Bsunders interessant hemmer natürlich d schuel gfunde. Leider hemmer üs mit üsem guide ned super chönne verständige well sie nämlich ned spanisch reded, sondern en eigni sprach wo mit spanisch öpe glich vill z tue hed wie dütsch 🤷‍♀️
    Aschlüssend hed üs s boot am festland dur en chliine fluss i dschungel bracht. Det esch en guide met de machete vorah ond hed üs en wäg zrächtgsäblet 😅 ich bi schön nervös gsi, mer händ ned so rächt gwösst uf was mer üs da ilönd ond obs da gföhrlichi tier gid 🙈 bis uf ameisi hemmer aber gar kei tier gseh. Mer händ aber au ned so werkli ziit gha zum umeluege, de cheib esch schier gsecklet, de erich esch sich vorcho wie im militär😅
    Nach guet ere stund simmer ane schöne wasserfall cho womer de hend chönne bade. Aschlüssend eschs zrug dure dschungel und uf üsi letscht insle gange. Die esch chli überloffe gsi mit lüüt ond hed üs ned ganz gliich gfalle wie die vorhärige. D mässlatte esch aber au seeeehr höch gsi 🤷‍♀️
    Am letschte tag esch denn zrug as festlang gange ond denn metm auto d holperistrass zrug uf panama city.    Read more

    See translation
  • Panama bis Kanada
    1

    Nomol Panama City

    November 29, 2022 in Panama ⋅ 🌧 26 °C

    Nach üsere traumhafte san blas tour simmer nomol för 2 nächt uf panama city. Mer händ es hostel buechd (mit me sehr unbequeme bett) ond am erste tag hämmer planed, wie üsi reis söll wiiter ga. Am nächste tag simmer i metropolitan national park, de dschungel vo de stadt. Det simmer 2 stund umegloffe (ja, au de erich, freiwillig sogar 😅) ond hend tier gsuecht. Mer hend ganz vill gseh, e nasebär, ameisi, schildchrötli, chliini äffli, verschiedni vögel, öpis wo usgsehd wie es riiese mersäuli ond zum schluss sogar no am erich sini vorfahre: s fuultier.
    Als abschied vo panama city simmer am obig inere rooftop bar go znacht ässe ond d ussicht gnüsse 😍 mer händ e lustige obig gha ond üs no lang mit chli spanisch, chli änglisch & händ und füess mit 2 panamaner unterhalte 😉
    Morn morge früeh gads de mit me bus wiiter a üsi nächsti stadtion, womer üs e wuche strand- und surfferie gönned 😊    Read more

    See translation
  • Panama bis Kanada
    1

    Playa Venao

    December 11, 2022 in Panama ⋅ ⛅ 28 °C

    Zum riiiiichtig chönne abefahre hemmer üs in Playa Venao 10 täg strand- und surfferie gönnt. Mer hend es zimmer binere mega liebe familie gmieted. De erich heds gnosse, ändlich weder mal chönne z choche. S huus esch de wahnsinn, vorallem d ussicht vom balkon 😍 s allertollste esch aber, dass mer i nor 5 minute am strand esch ond tolli wälle grad vor de huustüre hed! Is städtli, wos lädeli, strandbare und restaurants hed, lauft mer öpe 20 minute am strand entlang. So sind üsi "ferie" im nu verfloge: surfe, läse i de hängematte, strandspaziergäng, bierle i de strandbare, spieli spiele ond eifach nor s läbe gnüsse! Natürlich hemmer de chlaustag au chli gfiired mit me kaffi schnaps am strand 🤭 Höt gads mit me nachtshuttle wiiter uf bocas del toro.Read more

    See translation
  • Panama bis Kanada

    Im Nachtbus

    December 12, 2022 in Panama ⋅ 🌙 20 °C

    Es isch morgä am 4i... Schlafä im Nachtbus isch gar nid mis Ding. Es rüttelt und schüttelt. Am Busfahrer chönnti de Chopf abriissä. Kurvetechnik ganz schlecht. Meh chönnt meinä, er gseht Kurve amig erscht im letschtä Moment, denn sticht er inä und mues no 3 Mal nachästüürä.
    Nachdem mir in Playa Venao als Schwiizer natürlich fascht diä einzigä gsi sind wo pünktlich ufä bus cho sind, mini Närve scho kochet hend, wil einä no verpennt hed, git mer das ez no de rescht.
    Hoffentli simmer öppä det... D Larissa schlaft gmüetlich näbädra. Und denn piipset no öppis im bus diä ganz ziit.
    D Decki, d Schiibä und d Sitz gfrüüret ez denn au ih vor luuter Klimaahlag...    Read more

    See translation
  • Panama bis Kanada
    1

    Bocas del toro

    December 16, 2022 in Panama ⋅ 🌧 28 °C

    De erich hed d nachtbusreise tatsächlich no öberläbt 😅 de bus hed üs zumne hafe bracht, vo wo mer denn es boot uf d bocas insle gno hend. Das esch au es abentüür gsi. S boot esch scho komplett öberlade gsi met vell z vill lüüt ond ehrne ichäuf (under anderem mehreri tortene, eini esch no us de schachtle gheit ond all sind voll gsi 🤭 ond e haas imne chäfig 🤷‍♀️). Sie hend de tatsächlich no probiert alli 12 lüüt us üsem bus drufzquetsche inkl. teils riesigi koffere. Mer händ üs de entschiede lieber e stund ufm bänkli a de sunne ufs nächste z warte ond hännd zuegluegt wie das boot sehr tüüf im wasser, under gekreische vo de lüüt wo nass worde send, lostuckered esch.
    Mer händ es hostel uf de isla solarte gha. Es hed sehr gueti bewärtige gha ond das zu rächt. Mer händ sogar no es upgrade übercho ond hännd denn es bungalow im dschungel för üs elei gha.
    S hostel esch eher wie es hotel gsi, so hemmer ned sälber chönne choche sondern det gässe. Es esch aber immer sehr fein gsi. Scho am erste abig hemmer es päärli vo südafrika länneglehrt. Met dene hemmer de no lang spiili gspielt ond cuba libre trunke 😊
    Am nächste tag hämmer e bootstour dur die inslene gmacht. Au das esch werkli sehr idrücklich gsi. Vill lüüt hend üs gseid, wemmer scho uf de san blas insle gsi esch, sig bocas nöm so spannend, das hämmer aso gar ned gfunde. Es esch gar ned z vergliiche, vill me dschungel, deför weniger palme ond wiisi stränd. Met dem boot hemmer a dem tag delfine ond seestärne gseh, sind go schnorchle ond uf e chliini insle. Det hends üs gseid mer chieng rundumelaufe, es gieng aber öpe e stund. Mer händs natürlich gwagt aber ich mues säge rundumeLAUFE esch chli untertriebe gsi...eher chlätere/wate/wägsueche 😅.
    Am nächste tag simmer mitem wassertaxi uf d hauptinsle wos es städtli hed. Det hämmer velos gmieted ond send zumne strand gfahre es bier go nä ond chli de surfer go zueluege. Zrug im hostel hämmers mit üsne kollege no gwagt d rutschi is meer uszprobiere, das esch werkli rechtig geil gsi, chas ned anderst säge 😂
    Am tag druf hämmer ändlich das gmacht won ich unbedingt ha welle uf dene insle - mer send go surfe! Es boot hed üs zumne spot zmits im meer zwüsched de inslene bracht. Uiii esch das cool gsi! Am Abig hend üs üsi südafrikanische kollege no verzellt, dass sie sich hüt verlobt heiged! Ouuu das hemmer natürlich müesse fiire. Zerst im hostel ond de simmer sogar no wiiter mitm boot a eini vo dene sageumwobene superparties uf dene inslene. Mer händ zwar gfunde chinderparty tiffts eher, de dj esch gschätzt 17ni gsi, aber mer wärded wohl oder übel eifach alt 😅🤷‍♀️
    Hüt eschs de, gar ned mal so fit nach dere party die halb nacht, mit boot ond bus wiiter richtig costa rica gange.    Read more

    See translation
  • Panama bis Kanada

    Puerto Viejo

    December 17, 2022 in Costa Rica ⋅ 🌧 29 °C

    Üse erst stopp z costa rica esch in puerto viejo gsi. Es chliises hippie dörfli a de karibikküste. Mer händ imne chliine hostel gschlafe. Am erste tag hämmer ned so vill gmacht, send chli go s städtli aluege, früeh go znacht ässe ond denn früeh is bett well mer immer no kaputt gsi sind vo dem ganze fiire am tag vorhär 😅
    Nach ehre ned so guete nacht wells heiss ond füecht gsi esch ond de erich bi lebändigem liib vo mugge ufgfrässe worde esch, simmer am morge ine bäckerei go zmörgele. Aschlüssend hämmer en roller gmieted ond send met dem chli d küste deruf gfahre. Mer send de no ine nationalpark "chli" go spaziere, was sich schlussändlich als 3 stündigi wanderig usegstellt hed...ups 🤭
    Am obig simmer ines asiatischs resti go znacht ässe well de erich öpis scharfs hed welle ond ich weder mal lust uf riis gha ha. D bedienig hed met üs de im breitischte bayerisch gret...üsserst amüsant gsi. Denn simmer nomol relativ früeh is bett well mer am nächste morge früeh ufe shuttle uf san jose send.    Read more

    See translation
  • Panama bis Kanada
    1

    Ei tag in san jose

    December 18, 2022 in Costa Rica ⋅ ⛅ 21 °C

    Da mer am nächste morge üses auto z san jose müen abhole, hämmer dänkt mer schlofed doch grad ei nacht da, de hämmer kei stress...
    Mer sind am morge acho, hend im hostel igcheckt ond sind denn chli dur d stadt gschländeret. Nüd werkli schöns aber immer wieder interessant so neui ort. De erich hed de e mc donalds entdeckt, ond da er scho e monet uf entzug devo esch, ond sini auge sooo glüchted hend, simmer gange 🤭 er hed sich sehr gfreut, hed aber uf de föteli ned chönne lache vor luuter ässe 😜. Wells in costa rica no kei veggie burger gid im mc hed mis zmittag usere portion pommes und me mc flurry bestande 😅
    Nachär hed am erich sini verchältig ehn definitiv igholt. So simmer zrug is hostel, er hed chli gschlafe ond ich ha gläse, tagebuech gschriebe ond met de irina telefoniert 😊 zum znacht hemmer üs ganz fuul e pizza is hostel bstellt...seehr gsunde tag gsi 😂
    Am nächste morge simmer go zmörgele ond denn go s auto hole.    Read more

    See translation
  • Panama bis Kanada
    11

    Quepos

    December 22, 2022 in Costa Rica ⋅ 🌧 27 °C

    Üse nächsti stopp esch quepos gsi, es chliises städtli am fuess vom manuel antonio nationalpark.
    Mit üsem auto, em umberto, simmer det abe gfätzt ⚡🚀🚘
    Mer händ es härzigs airbnb gha, chli oberhalb vo de stadt mit genialem usblick! Well mer beidi nonig ganz fit gsi sind, so verchältigstechnisch, simmer am erste tag eifach go poste, hend spaghetti gchoched ond chli spiili gspielt ufem balkon, ond send denn früeh is bett. Am nächste tag hemmer lust gha uf en strandtag. Also simmer a gross strand vore nationalpark gfahre ond händ det de tag mit schättele (zum sünnele eschs definitiv z heiss gsi), bädele, läse, chli schlofe ond natürlich au chli surfe verbracht. Znacht hemmer weder dehei gchoched ond dezue nomol de schön sunneuntergang gnosse.
    Am tag druf hemmer eigentlich ändlich i nationalpark welle. Mer händs au versuecht, leider sind alli tickets usverchauft gsi bzw üsi theorie esch, dass die guides alli tickets chaufed ond sie der denn sehr tüür mitere tour wennd atreie... Uf das simmer aber ned dri gfloge. Mer händ denn tickets före nächst tag chauft ond send stattdesse uf dominical gfahre, es chliises surferörtli chli wiiter de küste entlang. Det simmer öpis go zmittag ässe, chli dur en märt gschländeret, nachär ben ich go schättele (dito) ond de erich hed sich nach me monet hostelbett mal e massage gönnt.
    Am abig simmer weder bi ziite is bett, well mer am nächste morge früeh uf hend welle zum uschecke ond denn i nationalpark. Es momäntli hemmer friedlich gschlafe bes denn um mitternacht bi de nachbere e party mit luuter musig ond bass wo üses bett duregschüttled hed losgange esch 🤦🏼‍♀️
    Bes am morge am halbi 5i simmer wachgläge, händ de nachbere zueglost wies abem balkon chotzed händ ond händ üs gnärvt ond zwüsched dure au weder glacht ab dere unmögliche situation...
    Rächt übermüedet simmer de am nächste morge i nationalpark. Mer händ det gli de schönsti strand entdeckt wo mer üs zerst mal e siesta gönnt händ 😅
    Am spötere namittag esches de wiiter gange uf jaco.    Read more

    See translation
  • Panama bis Kanada
    1112

    Wiehnachte

    December 24, 2022 in Costa Rica ⋅ ⛅ 25 °C

    Es esch zwar eigentlich nonig nache well mer nonig wiiter reised, aber mer händ gfonde de tag brucht en eignige footprint. Üsi erst wiehnachte i de wärmi 🤭
    Mer händ soooo vill gmacht höt, ond trotzdem en sehr en gmüetliche tag gha.
    Am morge womer verwached sind, simmer zest mal id stadt go zmörgele. Seeeehr fein gsi, aber au vill z vill 😅
    Nachär simmer i park näbedra go d wiehnachtsbelüchtig aluege, ond denn a strand. Mer send im meer go wällegumpe bes mer kaputt gsi send, denn ide sonne gläge beses üs z heiss worde esch, ond denn weder hei. Wells werkli sehr heiss gsi esch semmer de zerst mal chli i chüehl pool ghocked ond hend es bier trunke...
    Die heissiste mittagsstunde hemmer i de klimatisierte wohni verbracht (wommer üs extra för wiehnachte gönnt händ). Mer händ mit üsne familiene telefoniert, de erich hed de härdöpfelsalat för am obig vorbereited ond ich ha schoggicornfakesguetzli gmacht als dessert. Denn simmer go surfe. Es sind sehr tolli wälle gsi, die einte sogar scho chli z gross för üs 😂
    Nachär hämmer am pool sälber gmachte piña colada trunke zum apero ond denn znacht gchoched: zum härdöpfelsalat dezue heds mit cornflakes marinierti zucchetti-mozarella täschli gä (ja mer händ no cornflakes räste müesse bruche 🤷‍♀️).
    Es bitzli komisch isches scho gsi, so wiit wäg vo dehei, ond mer händ au üsi liebste dehei höt speziell vermisst, aber es esch ganz secher es wiehnachtsfäst womer üses läbe lang ned wärded vergässe ❤️    Read more

    See translation
  • Panama bis Kanada

    Jaco

    December 27, 2022 in Costa Rica ⋅ ☀️ 28 °C

    Über d fästtäg hemmer üs es schöns airbnb in jaco gönnt. Es esch e härzigi chlini wohnig gsi und dusse heds no e pool gha för de ganzi komplex. Am erste obig simmer grad pünktlich ufe sunneuntergange a strand cho....uuuunglaublich schön gsi 😍
    Denn simmer no go znacht ässe ond früeh is bett. Am nächste tag hemmer vill vor gha. Es esch de tag vor wiehnachte gsi ond mer hend no welle go poste zum härdöpfelsalat mache. Es hed sich als üsi tagesufgab usegstellt, essiggürkli go sueche 😅 mer händs de tatsächlich au gschafft, send aber grusig gsi 😜 womer all die stränge pflichte erledigt hend simmer no go surfe.
    De nächst tag esch wiehnachte gsi, öber de tag geds ja scho e footprint 😉
    Am tag nach wiehnachte hemmer gmüetlich usgschlafe ond sennd nachm mittag go zip line dure dschungel. Das esch mega genial gsi, ich ha sogar papageie ond en tukan gseh...de erich esch me beschäftigt gsi mitm zip line a sich ond hed drum leider d tier verpasst 😂
    Als belohnig, dass sich de erich mit mir so wagemuetig i das abentür gstürzt hed, hemmer nachär am pool chli spieli gspielt ond bierli trunke 🤭 am obig simmer de no ganz chic go znacht ässe.    Read more

    See translation
  • Panama bis Kanada
    1Chuum esch de ralf 5 minute da... 🥴

    Labrador

    December 28, 2022 in Costa Rica ⋅ ⛅ 28 °C

    De Ralf esch cho 😍😍😍
    Am spötere namittag simmer ihn am flughafe go abhole. För die erst nacht hemmer es guesthouse in labrador reserviert, irgendwo im nirgendwo, aber äbe ned z wiit wäg vo san jose, dass mer ned z lang im dunkle hend müesse fahre, ond scho in richtig santa teresa, womer am nächste tag wiiter wennd. Mer händ igcheckt ond üses gastmami gfragt, wo mer chienged go znacht ässe. Mer send ehrere beschriibig gfolgt ond hend tatsächlich es resti gfunde. Mer send die einzige gäst gsi ond d bedienig hed nor spanisch gret, aber mer händ scho nach churzem es riise chäferfäst gha mit dene 😅😜Read more

    See translation
  • Panama bis Kanada

    Santa Teresa

    January 3, 2023 in Costa Rica ⋅ ☀️ 28 °C

    Die letscht wuche hämmer zäme mit em ralf in santa teresa verbracht. Es esch sehr e lustigi wuche gsi! Mer händ es air bnb mit chuchi ond garte gha. Am erste tag simmer acho, no chli go de strand agluege ond denn go znacht ässe. Am nächste tag hämmer chli welle go d gägend erkunde ond mer send zu de montezuma wasserfäll. Das send 3 wasserfäll, under 2 devo chammer bade ond bim einte sogar inegumpe. Richtig e lustige ond erfrüschende namittag gsi. Am tag druf han ich ändlich mal welle go surfe. So hämmer üs 3 brätter gmieted ond händ üs id wälle gstürtzt. Das hed sich als sehr asträngenden usegstellt, d wälle send gross ond chräftig gsi ond es hed mega strömig gha 😅 so simmer de nach dem namittag au zimli kaputt gsi. De nächst tag esch silvester gsi. Mer händ welle bi üs dehei grilliere. Mer send go poste ond hend alles vorbereited, denn simmer zerst no as meer go de sunneuntergang luege. S grilliere esch sehr witzig gsi ond üsi ego party esch bes am morge am 4i i vollem gang gsi. De erich hed währed de party sogar no sine eltere aglüted ond es guets neus gwünscht, well die sind i de schwiiz scho weder wach gsi 🤭 fazit vo dem abig: scho grillierti hüehner chönnd nüm flüge, au ned mit hilf vom ralf 😂
    Am erste januar hämmer üs de erst am spötere namittag möge bewege ond send de no chli a strand.
    Am tag druf hemmer weder chli meh action brucht ond händ drom e bootstour inkl. schnorchel-erläbnis bueched. S wasser esch zwar leider rächt trüeb gsi aber mer händ glich sehr vill fisch gseh. Denn esch scho üse letschti gmeinsami tag abroche. De hämmer nomol am strand verbracht ond send chli go surfe. Als krönende abschluss semmer no imne schöne strandrestaurant go de sunneuntergang luege ond znacht ässe. Am nächste tag heds de gheisse früeh ufstah, packe ond los rechtig flughafe. S highlight vo dere fahrt esch d fähri gsi. Es hed sogar früschi popcorn gä, das hed de ralf ond mich bsunders gfreut 😅    Read more

    See translation
  • Panama bis Kanada
    "Zmorge" inere dütsche bäckerei
    Anti-Überschwämmigs-AktionE brüetende KolibriDa laufed die 2 flüss zäme ond das schöne blau entstahd

    Nuevo Arenal

    January 7, 2023 in Costa Rica ⋅ ⛅ 24 °C

    Nachdem mer de ralf a flughafe bracht hend, semmer grad wiitergfahre uf nuevo arenal. Es chliises dörfli am arenalsee, womer sehr es günstigs airbnb ufm hügel obe gha hend. D lag hemmer so gwählt, dass es öpe zwüsched em arenal vulkan und em rio celeste gsi esch, beides sache womer no hend welle go aluege. Leider esch s wätter i dere gägend ned das wo mer üs vom strand gwöhnt send: nur knapp über 20 grad, windig, ond d sunne ond räge händ sich abgwächslet. Am erste tag hemmer nach de lange fahrt vom vortag chli welle chille ond üsi wösch wäsche. Das met em wäsche hed sich denn als tagesufgab usegstellt 🙈 d wöschmaschine womer det hätted dörfe bruche hemmer eifach ned welle zum laufe bringe. Nachdem met d wöschchuchi gflueted hend ond s wasser mit bäse händ müesse usewüsche, hämmer ufgäh ond sind ine wäscherei gfahre...dumm nur, dass die nächst e stond entfärnt gsi esch. So hemmer de tag demit verbracht det äne z fahre, üsi wösch abzgäh, 4h imne kaffi z hocke ond üsi wiiteri reis z plane, denn d wösch weder go hole ond weder zrug fahre 😅
    Am 2. Tag hemmer en tour zu de lavafälder vom vulkan bueched. Es esch no e estuunlich strängi wanderig gsi wells halt immer deruf gange esch aber es hed sich glohnt, d ussicht esch wonderschön gsi. Nor de vulkan sälber hed sich leider hinder wolke versteckt. Als abschluss simmer no ine heisse fluss go bade.
    Am 3.tag simmer zum rio celeste go de strahlend blaui wasserfall aluege. Das esch au sehr idrücklich gsi. Am namittag semmer de zrug is airbnb ond send zur fiir das ändlich mal richtig d sunne schiint grad i pool ghüpft ond händ denn de tag gmüetlich mit apero und spiili la usklinge.    Read more

    See translation
  • Panama bis Kanada
    1
    212Behind the scenes1De hed uf üsem balkon uf üs gwarted...

    Monteverde

    January 9, 2023 in Costa Rica ⋅ 🌧 23 °C

    Die letschte 2 täg hämmer in monteverde verbracht. Ich ha unbedingt no welle de näbelwald gseh, de erich hed aber definitiv gnueg vom wandere gha...er chäm nor mit, wenn mer üse eignig whirlpool heiged 🤷‍♂️. Wer sucht, der findet: zägg hani es (erstuunlich günstigs) airbnb mit eignigem whirlpool bueched 🤭
    Am tag womer acho sind, simmer grad no uf en kaffi-, zuckerrohr- und schoggitour, extra ohni vill laufe 😅 es esch sehr interessant gsi aber leider hed de tourguide gfalle am erich gfunde ond so hed de arm cheib glich no müesse schwitze bim kaffi pflücke ond zuckerrohr presse. Am abig hemmer de üses airbnb ond vorallem de whirlpool gnosse.
    Am nächste tag simmer früeh uf und i nationalpark damits au no näbel hed wemmer chömid, mer händ nämlich ghört, dass sich de im verlauf vom tag uflöst 🤨😅
    So simmer vorem zmorge scho 2 stund dure nationalpark gwanderet. Es esch sehr mystisch gsi ond ich ha paar tolli bilder gschosse...ond de erich au: vo mer wien ich bilder mache 🤪
    Aschlüssend simmer go zmörgele ond denn grad no i schmätterlinggarte - wemmer grad so unterwägs sind... Das esch werkli au sehr schön gsi, mer händ vill über die iheimische summervögel glehrt ond zudem no tuusigfüesslee, skorpion, tarantula ond kalerlake agluegt (ond zum teil dörffe uf de hand hebe.............)
    Nachär hemmer definitiv e siesta brucht. Zum de tolli tag la usklinge hemmer welle ine brewery grad ume egge ga. Chum simmer usem huus cho esch aber üse host uf üs zue gsecklet mer müesed cho luege, da sig es fuultier. Ond tatsächlich: a de stromkabel (!) vor üsem huus esch es fuultier gsi. Mer händs chönne beochachte wie öpe 30 meter dem kabel entlang zu de nächste bäum gchlättered esch, rechtig idrücklich gsi! Nachär simmer de wie planed id brewery de abig go usklinge la ond hend mit jedem vo ihre huusgmachte bier uf de tolli tag agstosse 😊    Read more

    See translation
  • Panama bis Kanada
    Surferbude 🤷‍♀️Sälber choche esch immer am beste....zumindest wenn de erich chocht 🤭🤤IMPERIAL-MANTamarindoE Steistei

    Playa Grande

    January 14, 2023 in Costa Rica ⋅ ⛅ 30 °C

    Mer händ üsi letschte paar täg z costa rica unbedingt am meer welle verbringe. De erich hed üs es sehr schöns air bnb in playa grande usgsuecht. Chli es luxuriösers surferörtli näb tamarindo. Bim acho simmer zest chli verschrocke well mer dur en barriere hed müesse fahr mit security. Das ganze viertel esch sone überwachti gmeinschaft gsi...das hämmer ned gwösst aber hed dem ganze ergendwie es canpingplatzfeeling gä. Mer händ vor üsem airbnb (wo eigentlich es zimmer imne hotel gsi esch, met eigner chuchi dinne) chönne parkiere ond send i 5 minute z fuess am strand gsi, verbi a anderne hotels ond villene, chliine kaffis ond ganz vill wald ond natur 😊 unne i üsem hotel esch no e chliine lade gsi ond grad näbedrah e surfshop. Mer händ grad för die ganz ziit 2 surfbrätter gmieted ond so hend de au üsi täg usgseh: entweder am morge go surfe oder gäge obig oder beides 🤪
    Einisch hemmer no en usflug uf tamarindo gmacht. Well playa grande uf ere halbinsle denäbed isch onds i dem öpe 30 meter breite fluss wos vo tamarindo trännt anschiinend krokodil hed, hed mer sich mit me chliine böötli müesse la öbere fahre. Tamarindo sälber esch sehr touristisch, de strand esch voll lüüt, s meer au ond es hed ganz vill bare, restaurants ond lädeli. Mer händ de tag gnosse ond sind chli i strandbare ghöcklet, händ glace gschläckt ond de erich hed sich imne touristelädeli ideckt mit imperialchleider - de lokale biermarke 😉
    Es anders mal hemmer no mit em auto e usflug uf playa flamingo gmacht...det heds kei flamingos deför jede menge luxushotels ond tüüri yachte im hafe 😅
    Einisch simmer am obig no a en lokale handwärkermärt mit live musig ond hend es paar mitbringsel gchauft 😊
    De räst vo de ziit hemmer üs id wälle gstürtzt (s hed fast kei lüüt gha), de gross pool womer ganz för üs ellei gha hend gnosse, gchoched ond spiili gspielt. Die letscht nacht in costa rica verbringemer jetzt no imne hostel i de nöchi vo san jose well mer morn morge s auto müend zrugbringe ond am mittag wiiterreised - mexico, mer chömmed!    Read more

    See translation
  • Panama bis Kanada
    Es bier zum zmorge 🤷‍♀️😅
    BingoSowohl in costa rica als au in mexico...

    Hola Mexico!

    January 16, 2023 in Mexico ⋅ ☀️ 28 °C

    Sooo liebi lüüt, jetzt wärdeder zuegspamt 😅
    Üsi erst wuche z mexiko möchemer nämlich e chline roadtripp a de küste vo oaxaca entlang.
    De reisetag es wie erwarted sehr müehsam ond langwiilig gsi...üses reisebingo heds chli ufglockeret aber es esch gliich no vill warte ond astah gsi...
    Mer send vo san jose in costa rica zerst mal uf mexico city gfloge wommer denn meeeega lang hend müesse astah bim ireise, bi üs esches de nor 3 minute gange...keeei ahnig was die alli möched 🤷‍♀️
    Zum glück hemmer gnueg ziit iplaned ond so hemmer denn nomol chönne go ichecke ond denn esches wiitergange uf puerto escondido. Es esch scho halbi 11i gsi i de nacht ond so semmer denn diräkt mitm taxi is hotel ond is bett.    Read more

    See translation
  • Panama bis Kanada
    1

    Agua blanca

    January 17, 2023 in Mexico ⋅ ⛅ 28 °C

    Am morge simmer als erst üses auto go abhole. Denn hämmer üs no e mexikanischi simcharte gholt, damit mer immer mobil sind. Denn hed sich definitiv de hunger gmäldet, well mer eh au no sunnecreme und wasser brucht hend simmer ine grosse lade ond hend üs det brötli posted. I dem Lade heds au no so en kuscheltierli-automat gha, wösseder was ich meine? So eine mit griifarm wommer mues stüüre ond versueche es tierli z fische. Mit em erich chammer a so eim natürlich ned verbi laufe ohni ehn uszprobiere ond so esch üses auto zu sim name "piggy" ond sim maskottchen am "heilige pignotius" cho 😂
    Mer send denn ane strand gfahre zum zmörgele...wobi mittlerwiile eher zmittag 🤔
    Vo det us hemmer de chli googled ond gforscht womer äne wennd. Mer händ üs för agua blanca entschiede, nöch, schöne strand, vill restauräntli ond es schöns, günstigs air bnb. Mer sebd also det hiigfahre, hend icheckt ond sind denn a strand, hend es sunneuntergangsbierli gno ond denn imne strandresti gässe 😊    Read more

    See translation
  • Panama bis Kanada
    1

    Mazunte

    January 18, 2023 in Mexico ⋅ ☀️ 29 °C

    Am nächste tag vo üsem roadtrip simmer mal wiitergfahre ond glii is härzige dörfli Mazunte cho. Es esch es touristischs hippiedörfli voll backpacker, lädeli, restauräntli ond bars. Natürlich heds au e wonderschöne strand. Zerst simmer mol öpis go zmorge/zmittag ässe ond denn i üses air bnb icheckt. Det heds dank de klimaalag zerst mal e erfrüschendi siesta gä. Wo die schlimmst mittagshitz verbi gsi esch simmer a strand: bädele, sünnele ond i de strandbar höckle 😊.
    Am obig hemmer de im dörfli sälber no e härzigi bar gfunde womer de obig la usklinge hend...    Read more

    See translation
  • Panama bis Kanada
    D ussicht usem hotelzimmer26

    Crucecita

    January 19, 2023 in Mexico ⋅ ⛅ 28 °C

    Üse nächsti stopp esch s städtli crucecita gsi. Es hed jede menge hotels da, die meiste aber völlig usgstorbe....fast chli unheimlich, wie e geisterstadt. Üses hotel esch aber sehr schön gsi, vorallem d ussicht! Im stadtzentrum heds de doch no vill lüüt gha, huufe lädeli, restaurants ond food ständ. Langsam merkemer aber dass mer mit üsem limitierte spanisch a aschlag chömed, werd ziit för de spanisch kurs nächst wuche 😉
    Mer hend da de strand ond s städtli gnosse ond sind am obig ine cooli bar go znacht ässe....eigentlich hemmer nachos welle als vorspiis teile ond denn no öpis anders ässe, aber mer hend ned mal d vorspiis möge 😅    Read more

    See translation
  • Panama bis Kanada

    Nomol Mazunte

    January 20, 2023 in Mexico ⋅ ☀️ 29 °C

    Wells üs in mazunte so guet gfalle hed ond mer i 2 täg eh weder in puerto escondido müend s auto abgäh ond mer ned a eim tag mega wiit wend fahre, hemmer üs entschlosse nomol uf mazunte z ga. Dasmal hemmer üs es cools hotel gno wo ned so tüür gsi esch 😊 nachdem mer das am morge entschiede ond bueched hend simmer zerst mal go zmörgele. Denn simmer uf mazunte gfahre, go ichecke ond denn a strand. Mer händ gsünneled, bädeled ond spiili gspielt. Nachere duschi im hotel simmer go znacht ässe ond denn no uf en schlummi i üsi lieblingsbar vom letschte mal 😁Read more

    See translation
  • Panama bis Kanada
    124

    La Punta

    January 21, 2023 in Mexico ⋅ ☀️ 29 °C

    Die letscht nacht vo üsem roadtrip hemmer in la punta verbracht. D irina esch uf ehrere wältreis 2 wuche det am surfe ond spanischlehre gsi ond hed üs das wärmstens empfohle 😊 i de letschte 5 jahr hed sich de ort aber stark verändered, jetzt eschs en hippe backpacker ort met vill lädeli, restis, bare ond vorallem jede menge lüüt. De gmüetlich ond entspannti vibe esch aber immer no vorhande.
    Ufen wäg det hi hemmer nomol amne strand ghalte zum chli bädele, nachär hemmer det im hostel icheckt ond zerst mal uf de dachterasse es biet trunke. Denn simmer chli durs städtli gschländeret ond spöter de sunneuntergang am strand go luege 😍
    Zum znacht hed üs d irina es chliises örtli empfohle, wos anschiinend de besti burrito ged, ond mer send ned enttüscht worde! Völlig öberässe simmer de zrug is hostel ond grad is bett 😅    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice