Death Valley

Am nächste morge simmer relativ früeh los richtig death valley. Unterwägs hämmer no e posti-halt gmacht, zmitzt im schnee 😅
Gäg de obig simmer de bim camping, womer för die nacht reserviert hend, acho. De esch in panamint springs gsi, aso sträng gno nonig im death valley sondern im panamint valley, aber es ghört glich scho zum nationalpark. Womer acho sind heds grad langsam ufta, aber es esch glich no rächt früsch gsi, so um die 10 grad. Mer händ denn de obig no mit füürle (zum warm ha) ond spiili spiele verbracht.
Am nächste morge simmer früeh abgfahre ond dasmal werklich is death valley. Es hed det verschiedni zältplätz, aber mer cha sie ned reserviere. Mer händ nachegluegt, dass mer am mittag mues uschecke ond so esch üse plan gsi, ume mittag ume dete z sii, damit mer sicher no es plätzli chönnt ergattere. Ufem wäg det äne heds aber no sehr vill schöns gha, so hemmer extra vill ziit iplaned ond bim fahre immer mal wieder aghalte. Was mer secher au no hend welle gseh esch de mosaic canyon gsi. Mer send denn guten mutes losgwanderet, aber scho bald hed sich zeigt, wieso die wanderig ned als "easy" igstuuft esch: mer hed rechtig müesse chlättere zum wiiter cho. Das ganze abentüür hed üs aber so vill spass gmacht ond mer händ welle bes as ändi cho. Einisch wäri ohni erich glaub nöm wiiter cho, ond einisch hämmer en abzwiiger ned gseh ond send ratlos vor ere riise felswand gstande, aber söscht semmer ohni zwüschefäll bis as ändi cho, e grosse dryfall, also e wasserfall ohni wasser😅de rückwäg hed denn sehr vill spass gmacht, well mer all die vom wasser gschliffne stei, womer ufem ufewäg müehsam hed müesse ufechlättere, hed chönne aberutsch 🤣🤩
Nachär simmer zum camping gfahre ond schwiizerisch pünktlich am 12i acho. Mer hätted aber gar ned müesse pressiere, de platz esch fast läär gsi ond es send de au s ganze wuchenänd nie vill lüüt da gsi 😅🤷‍♀️ Also hämmer üs zerst mal e siesta gönnt nach ere churze nacht ond üsere doch no chli stränge wanderig. Aschlüssend simmer no s visitor center go aluege, es hed e film über s death valley gha ond es chliises museum, esch no spannend gsi. Denn heds apero vorem wohnwage gä, im t shirt ond de churze hose, mittlerwiile eschs agnähmi 25 grad worde!
Am nächste tag simmer weder früeh uf well üs d erfahrig vom vortag zeigt hed, dass es am morge definitiv vill weniger lüüt hed. Mer send als erst zum badwater gfahre - mit 85.5 meter underem meeresspiegel de tüüfsti punkt in nordamerika. Det heds en salzsee gha ond es esch werklich sehr idrücklich gsi....ond hed au spass gmacht zum lustigi föteli mache 🤭
Nachär simmer dur de artist drive gfahre. E schmali, kurvigi eibahnstrass wo nor fahrzüg bes 25 fuess zueglah sind (ond mer send exakt 25 fuess lang👌). Es esch dur en wunderschöni landschaft met farbige felse gange, es naturschauspiel pur 😍 also mis mami hätt mer det glaub nüm wägbracht 🤭😉
Nächste stopp esch de golden canyon gsi. Det hemmer nomol e miniwanderig gmacht ond womer e siitliche abzwiiger gseh händ simmer det no es stückli go en schmale canyon deruf chlättere.
Womer de am nami zrug ufe camping cho send hemmer üs e siesta gönnt ide mittagshitz, hüt esches no wärmer gsi als gester.
Gäge obig hämmer üs ufe wäg gmacht zum zabriskie point. Det hed mer e wunderschöni ussicht über s tal ond so mega schön farbig gmustereti felse. Mer händ üsi campingstüehl mitgno ond hörndlisalat zum znacht 😋 so hemmer zerst de sunneuntergang gnosse ond aschlüssend d stärne bewundered. Leider hemmer weniger stärne gseh als erwarted well de mond so hell gsi esch 🙈
Nach dem tolle erläbnis simmer zrug ufe camping gfahre ond müed vom lange tag is bett 😊Read more