Jungel Feelings in Manuel Antonio

Die erst Nacht im Hostel esch ned met ganz so vell Schlof gsi wieni ghofft ha. Mer send z dritte im Zimmer gsi ond abem füfi send desi langsam wach worde. Met dene Grüsch ond de Stross wo dosse au langsam verwacht esch hani de eigentli au nömme chönne schlofe. Zmorge hani im Restaurant vom Hostel gässe. Ech ha mi för es typischs costa-ricanischs Zmorge entschede: Riis met Bohne, Rüerei, e Schnetz Wassermelone, brötleti Platanos ond e chli Fladebrot. Nochem Zmorge hani mini Kamera packt ond mech uf e Weg gmacht ufen Trail henderem Hostel. Sie send chliner gsi als erwartet, drom hani 2/3 uf einisch chönne mache. D Natur esch wonderschön. Öberall heds verschedensti Pflanze, mer ghört Tier raschle ond wemmer Glöck hed gsed mer sogar eis. Ech han e Kolibri, es Aguti ond e Leguan gseh.
Am Mittag beni de am Hostel abgholt worde. Ech ha en Tour im Nationalpark bueched. De Nationalpark Manuel Antonio esch de meist bsuechti Park z Costa Rica. Wel er relativ chli esch send d Bsuecherzahle vor es paar Johr uf 2000 pro Tag limitiert worde. Euse Guide hed eus im Hauptteil vom Park omegfüert. Sie hed es Fernrohr debi gha ond eus so Tier höch obe i de Bäum chönne zeige. Mer hend Vögel, Flädermüs, Fuultier, Affe, Chräbsli ond ganz vell schöni Pflanze gseh. Es Paar vo dene gez nor z Costa Rica. Euse Guide hed eus au verzellt das Costa Rica 4% vo de Weltwite Biodiversität abdeckt. Das hani ganz schön beidrockend gfonde för so es chlises Land. Ech ha zerst chli Bedänke gha öbs sech lohnt so vell för e Tour z zahle aber ech be froh dasis gmacht ha wel elei hätti niemols so vell gseh ond erfahre. Noch 2 Stond Tour send no 1.5 Stond blobe de Park sälber no chli azluege. Ech ha mech för e chlini Wanderig zo zwöi Ussechtspönkt entschede. Das hed zwor bedütet dasi ned a speziell Strand im Park cha, aber ech go deför morn ane schöne Strand. D Wanderig hed sech absolut glohnt. Met de Üebig vo de Füerig hani ez au es paar Tier selber entdeckt. Alles i allem hed mer de Park sehr guet gfalle. S einzig negative esch gsi dases so vell Lüt gha hed.
Nochem Park hani mer no de haupt Strand agluegt. D Füess hani is Wasser gha aber weli vell Wertsache debi gha ha beni ned go bade. Vorem Heiweg hani mer no öpis zom Znacht gchauft. Eigentli hätti de vor gha hei z laufe aber well grad e Bus cho esch gani mer die Stond bärguf laufe gspart ond be i Bus.Read more