Rechtig acho z Costa Rica

Höt Morge esch mine Abstächer id USA scho weder zomne Endi cho. Die paar Täg send wie im Flog vergange ond de Moment esch cho wo d Bry ond de Joe mech a Floghafe gfahre hend. Dasi mine Flog am halbi 8i verwötscht ha semmer am 5i losgfahre. Relativ knapp för mis empfende aber mer hend s Hotel jo direkt nebem Floghafe bueched. Zerst hend sie mech as International Terminal gfahre, was logisch erschint för en internationale Flog. Det acho hed mer e Service Mitarbeiter aber gseid das ech för mini Airline ned det cha ichecke. Zom Glöck send d Bry ond de Joe no vorem Floghafe gstande ond hend mech chönne as rechtige Ort fahre. E chli närvös beni aber scho worde öbs de au länged metem Security Check ond allem drom ond dra. Es hed au ned zo de Stemmig biitreid das s Personal am Check In so onfröndlech gsi esch. Deför hani am Security Check Glöck gha. Wäri 5 Minute spöter dra gsi hätti 3 mol so lang mösse astoh. Au mis Gepäck esch ohni Problem dore cho (was för 2/3 vo de Lüt in minere Schlange ned de Fall gsi esch). Drom hani mi de ohni Stress chönne ufe Weg zom Gate mache. Hätti im Vorus gwösst das mer 40 Minute Verspötig hend wär wahrschindli alles chli gmüetlecher abgloffe. Aber met schöne Erennerige vo dere Woche mer de Bry ond met Vorfreud uf das wo mi z Costa Rica erwarted beni abgfloge Rechtig San Jose. Bis uf die wendig Landig esch de Flog tiptop gsi. Z San Jose beni schnell dor d Passkontrolle cho ond ha de als ersts mi Koffer im Hotel gholt. Im Lade näbem Hotel hani nocher chli Colones, d Währig vo Costa Rica, abghobe ond mer öpis z Ässe för d Reis bsorgt. Ech ha am Nomi nämli no e Bus rechtig Manuel Antonio gno. D Reis hed öpe 4 Stond dured ond esch dor wonderschöni Berge ond Wälder gange. Met dere Ussecht send die Stond wie im Flog vergange. Ech has rechtig gnosse ond ha s erst Mol s Gfühl gha so rechtig acho z si. Acho im Hostel (es heisst Teva Hotel & Jungle Reserve) hani s Zimmer bezoge, es Bett im ne 4er Fraue Schlag met Kajütebett, ond ha im Hostel Restaurant es sehr feins Znacht gässe.Read more