1. Tag - Anreise nach Innsbruck

Hüt am Mittag isches bi eus langsam los gange und mir händ eus uf de Wäg richtig Innsbruck gmacht. Da de Arlbergtunnel immerno gsperrt isch, hämer drüberd fahre müsse. Ja de Kevin und ich sind no nie drüberd gfahre. Isch no spannend gsii. Mir händ chli Angst gha, dass eusi Velos ned hebed. Sie händ aber ghebed. So gäge die 17:00 Uhr simer im Hotel Huberhof ahcho. Dä hämer rasch ihcheckt und alles usglade. Ja das brucht jetzte amel chli meh Ziit, da mer zerst Velo ablade münd. Womer dä Velos verstaut händ und euses Gepäck is Zimmer tah händ, hämer eus dä au grad id Badhose gstürzt. Schliesslich häts en Ussepool und es isch ja hammer wätter. Ja de Pool isch rächti abchüehlig gsi😅 Bettina isch dä ned so lang dinne gsii.
Nachem Bädele hämer eus fürs Znacht fertig gmacht. Mir händ nümm möge uf Innsbruck ihne z'gah, darum hämer grad im Hotel im Resti gässe. Mhm.... isch das fein gsi😋
Nochli Skipo gspilt und no eis zwei trunke und dä simer au scho bald go pfuuse😴Read more